Сергей Труфанов "Сибирьдегi хыра кӱнi" форумда араласхан
15.07.2024
Хабарлар
Хакасияның аал хонии паза ас-тамах министрi Сергей Труфанов, Алтай крайында "Сибирьдегi хыра кӱнi" аал хонии форумында аралазып, чоох тутхан. Регионнар аразындағы аал хонии форумы от айының 10-12-ӌi кӱннерiнде ирткен.
Анда Россияның аал хонии министрi Оксана Лут, Сибирь Федеральнай округында Россия президентiнiң уполномоченнайы Анатолий Серышев, Хазна Думазының депутаттары паза менаторлары араласханнар.
Аал хонии сурығларынӌа хазна комитедiнiң чыылии паза наа чирлернi таарып пастаанына 70 чылына чарыдылған тегiлек стол алғым ирткеннер.
"Сибирьдегi хыра кӱнi- 2024" форумның пайрамнығ азылғанында Россия президентiнiң кiзiзi Анатолий Серышев Сибирьде аал хонии ниме-ноо сығарызы öсчеткенiн таныхтаан.
- Санкцияларға хыза пастырған оңдайларда пiске чуртирға паза тилирге харығ полчатхан туста, пiс сығарчатхан ниме-нообыснаң, ол санда Сибирьде сығарылған нимелернең, тилекейдегi чырғалзар сыхчабыс. Пӱӱн андағ оңдайлар пар, кибiрлiг чырғалдаң пасха, пу чағында Латин Америка хазналарынзар сығар оңдайлар, - таныхтаан Анатолий Серышев.
Россияның Хазна Думазының аал хонии сурығларынӌа комитет наа чирлерде таарып пастапчатханының 70 чылына чарыдылған чыылығның паза тегiлек столның тöстегӌiзi полған. Россияның аал хонии министрi Оксана Луттың таниинаң, пӱӱн хазнада тузаланылбинчатхан чирлернi тузаланысха кирерiнде улуғ тоғыс арарылча. Халғанӌы iкi ле чылға iкi миллионӌа гектар чир тузаланысха кирiлген.
Хакасияның аал хонии паза ас-тамах министрi Сергей Труфанов Хакасияда наа чирлернi таарып сыхханының тархынынаңар чоохтаан.
- Хакасияда наа чирлернi таарирына Шира аймаанда "Борец" совхоз тöстелген. Анаң Уйбат чазызында тузаланылбинчатхан чирлерде 4 совхоз тöстелген. Пу ла хоныхтар 138 гектар наа чирнi тузаланысха кирген, - теен Сергей Труфанов.
Ол чылларда чииттер пу тоғыста öткiн араласханнар. Комсомолецтер чаа соондағы чылларда ас-тамах сығарызын öскiрер программаны чуртасха кирерiнде часхы полысханнар. Ол программа тоңастығларны паза иттең, сӱттең тимнелген ас-тамах паазын тӱзiрерiне кöстелген. 1954 чылда часхызын Хакасиязар тиксi хазнадаң чииттер чыылыс сыхханнар. Олар наа чирлерде аал хонии öзiмнерiн öскiрерге килгеннер. Пастағыох чылда пос кöңнiнең тоғынарға килген чон Хакасияда 18 муң гектарны тартыбысхан. Ол чирде прай öзiмнер чахсы сыххан. Ол туста Шира аймаандағы чирлерге мындағ пiлдiрiг пирiлген: "Аал хониинаң айғазарға чарабинчатхан орын".
Че тоғынарға килген чон таарыға чарабинчатхан даа чирлерде аал хонии öзiмнерін чахсы öскiрiп аларын киречiлеен.
Автор :
Оксана Челтыгмашева
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде
