Очыр аалда - наа имнег амбулатория
26.06.2024
Хабарлар
Алтай аймааның Очыр аалында имнег амбулаториязы азылды. Пайрамнығ мероприятиеде Хакасия пазының пастағы орынҷызы Татьяна Курбатова, Алтай аймаа пазы Ирина Войнова, депутаттар чöбінің кнезі Александр Марачков, Хубачардағы имнег туразының ööн имҷізі Михаил Мальгин, аал чуртағҷылары паза аалҷылары араласхан.
Имнег амбулаториязы орныххан иргі тура 1960 чыллардох пӱдірілген. Аннаңар амғы тустағы санитарнай, пӱдіріг паза пасха даа кирексіністерге нандырчатхан амбулатория пӱдірерге чарадығ алылған. Аны "Хакасияның хазых хайраллирын тилідері" республиканың хазна программазынҷа пӱдіргеннер.
Табырах пӱдірілчеткен модульнай тураның пӱдірии 2023 чылның чарыс айынаң пасталған. 2024 чылның кöрік айында аны тузаланысха кирердеңер чарадығ алылған. Пӱдіріге 12,1 млн салковай хорадылған, аның ибіркізін иптиріне - 1,5 млн салковай, оборудование аларына - 3,5 млн салковай. Тиксі 17,1 млн салковай хорадылған, пу ахча толдыразынаң республика бюджедінең позыдылған.
Наа имнег амбулаториязында имҷінің, фельдшернің, олғаннарны, ипчілерні кöрҷең, тіс имнеҷең, соона салдырбас имнег полызииның, процедуралар иртірҷең, прививкалар турғысчаң кабинеттер пар. Ідöк анда кӱнöрткі стационар, аптека пункты тимнелген. Амбулаторияда электрогенератор турғызылған. Ідöк суғ паза чылығ пирчеткен позының системалары турғызылған. Имнег учреждениезінің ікі автомобиль пар.
Очыр аалдағы имнег амбулаторияда 1 имҷі-терапевт, 2 фельдшер, 1 тіс имҷізі, 1 улуғ медсестра, 3 медсестра, 2 водитель паза 1 уборщик тоғынча. Оларзар имнег полызиина 3 аалның (Очыр, Новомихайловка, Монастырка) чуртағҷылары айланчалар. Тиксі 3 муңа чағын кізі.
Сомнар r-19.ru сайттаң
Автор :
Тимнеен Татьяна Кыштымова
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
