Алызығлар ӱрӱгіс ағылбинчалар
26.06.2024
Хабарлар
Пос кӧрізі. Хакасияның идінҷектер праволарын арачылирынҷа уполномоченнай Василий Кудашкин Россияның налог кодексіне кирілген алызығлардаңар сағыскӧрізінең ӱлескен
– Россияның налог кодексіне илееде алызығлар кирілген, – чарыдып пастаан Василий Кудашкин. – Олар налог саларын тиксі алыстырчалар. НДФЛ-ны алза, чуртағҷыларның ӧӧн чардығының парыстары 2 миллион 400 муң салковайны аспинчалар. Идінҷектернің дее андағ пӧзік чал ахчазы чоғыл. Че олар налогты нииктелген (УСН) оңдайнаң тӧлепчетселер, 2025 чылдаң сығара НДС тӧлеп пастирлар. Парыстары 60 миллион салковайны аспинчатхан идінҷектер ле аннаң позыдыларлар. Че республикада андағ идінҷек саннығ ла. Пос киреенең айғасчатханнар парысты сығарбинчалар, аны тиліске, техника паза тиріг садызарына позытчалар. Хорадығлар даа читкіҷе. Ӧӧн чардығы кредит тӧлепче, холда, тізең, ол син пос ахча халбинча. Аннаңар идінҷектер аразында ӱрӱгіс чоғыл.
Пу наада идінҷектернең хада Хакасияның садығ-промышленность палатазында тоғазығ ирткен. Налог алызығларын ӱзӱрерге чыылысхабыс. Идінҷектерні НДФЛ кӧдірілчеткені сағыссыратпинча, че тибіреділбинчеткен ис-пайға налог 2 проценттең 2,5 процентке ӧскірілері сағысха тӱзірче. Пірдең, пасхазы чоғыл, ол ис-пай хайдағ кӧстеге тузаланылча, олаңай ла турча алай идінҷек аннаң парыстанча...Че алында кирілген алызығларҷа пос киреенең айғасчатханнар ис-пай налогын тӧлееннер, пу даа алызығларға тудынарлар.
Пӱӱнгі кӱнге минзер, Хакасияның идінҷектер праволарын арачылирынҷа уполномоченнайзар чіли, налогтарҷа айланыстар кірбеен. Прайзы алызығларға амыр хайған. НДФЛ-даңар чоохтаза, кемге 15 паза аннаң даа кӧп процент тӧлирге килізер, олар оңарчалар, ол ахча чуртас оңдайларын чахсыландырарына, социальнай проекттерні чуртасха киреріне позыдыларын.
Россия президенті позының айланызында ідӧк алынҷа категорияларны налогтаң позыдарға киректелчеткенін таныхтаан. Аны хоостыра 2025 чылдаң сығара палалығ тоғынҷыларға налог тӧлеглері сині ӧскірілер. Пастағы пала ӱчӱн ідӧк халар – 1400 салковай, ікінҷі паза ӱзінҷі палаа ікі хати ӧскірілер: 2800 паза 6000 салковай полар. Іҷе-паба налог тӧлеглерінең парыстары 450 муң салковайға читкенҷе тузалан поларлар. Сағам ол оңдай 350 муң салковайға теере пирілче. Хазна пасха даа алызығларны кирерін ӱзӱрче, олар тӧбін парыстығ сӧбірелерге теелерлер.
Сом «Хакас чирі» газета редакциязы архивінең
Автор :
Пазып алған Наталья Сюптерекова
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
