Наа техника арығларны арачылир
21.06.2024
Хабарлар
Палыхтығ суғдағы ағас хонии пӧлиинің устағҷызы Сергей Сигов квадроцикл алған
Нацпроект. Ағбандағы Пастағы май ачығында Хакасия пазы Валентин Коновалов республиканың ағас хонии устағҷыларына ӧрттердең тоғыр наа техниканың клӱстерін читірген
Пастағы май ачығында иртерге сидік хайдағ даа орыннарҷа чӧрҷең улуғ тӧрт наа «КамАЗ» автомобиль паза харлығ, састығ чирлерҷе чӧрҷең 14 наа квадроцикл изере турғаннар. КамАЗ-тарда арығларда ӧрттең тоғыр кӱресчең прай оборудование пар. Квадроцикллер ағас тоғынҷыларына арығ-тайғаларҷа патрульнаң чӧрерге кӧстелчелер. Прай пу техника ээлерін сахтап турчатхан.
Хакасияның арығларын ӧрттердең арачылир наа техника «Экология» национальнай проект хоостыра паза «Хакас Республиканың ағас хониин тилідері» республика программазын толдырып алылған. Аны садызарға регион бюджедінең 19 миллион салковай позыдылған.
Хакасия пазы Валентин Коновалов наа техниканың клӱстерін ағас тоғынҷыларына читірер алнында хысха чоох тутхан:
– Прайзын мындағ танығлығ, ӧріністіг кирекнең алғыстапчам. Республиканың арығ-тайғаларын хайраллиры хазна экономиказын тилідерінің чардығы полча. Арығларны ӧрттердең арачылиры сірернің ӧӧн пӧгініңер полар. Амғы оой нимес тус полза даа, піс арығларны ӧрттердең арачылаҷаң 18 наа техника алғабыс. Аның сылтаанда муңарлап гектар арығлар ӧрттердең арачылаларына ізенербіс. Национальнай проекттерде Хакасия сыбыра араласча. Ағас хониин арачылир техниканы нааҷылирын піс мыннаң мындар узарадарбыс. Ам пирілчеткен наа техника ӱр тоғынзын, Хакасияның арығларын хорғыс чох идерге хабассын.
Чооғын тоозып, Валентин Олегович полған на техниканың клӱзін паза пічіктерін аннаң тоғынар специалистке читірген. Іди 18 техника ағас хонииндағыларға пиріл парған. Улуғ тӧрт наа «КамАЗ» автомобиль «Бея-Лес-Сервис», «Копьеволессервис», «Горячегорсклессервис» паза «Леса Хакасии» автоном учреждениелеріне пирілген.
«Гепард» квадроцикллер прай даа ағас хонииндағыларға ызылғаннар. Площадьта оларны, таарлап, апарарға прицептіг автомобильлер сағып турғаннар.
Хайди чоохтаан Палыхтығ суғдағы ағас хонии пӧлиинің пастығы Сергей Сигов, ағаа наа квадроцикл пирілді. Пу техника Хыдатти, че аны ам Россияда сығарчалар. Арығларҷа патрульнаң чӧрерге амды ағас тоғынҷыларына чахсы полар. Халғанҷы туста лесничество тоғынчатхан арығларда сыхчатхан ӧрттер саны хызырылча. Анзы ідӧк ағас тоғынҷыларының тоғызы сылтаанда хызырылча полар. Ӧріністіг, хаҷан хазна наа техниканаң полысча.
Пайрамнығ мероприятие тоозылғанда, анда араласхан прай кізі Хакасия пазынаң хада наа техника алнында сомға суурынғаннар.
Сом Дмитрий Сунчугашевти
Автор :
Николай Султреков
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
