Хэбэйнең хайызығлар алғыдылар
19.06.2024
Хабарлар
Валентин Коноваловтың устаанынаң республика делегациязы Хыдаттың Хэбэй провинциязының губернаторы Ван Чжэнпунаң паза устағ-пастағ кізілерінең хада
Тоғыс чорығы. Пу наада Хакасия пазы Валентин Коновалов паза республиканың делегациязы тоғыс чорығынаң Хыдат Чон Республиказында пол килген
Валентин Коноваловтың устаанынаң Хакасияның делегациязы Хэбэй провинциядағы Ланфан городта чыл сай иртчеткен чоннар аразындағы садығ-экономика ярмарказының тоғызында араласхан. Ол позын пос киреене хада-пірге ӱр тоғынар партнёрларны тапчаң орын чіли кӧртіскен. Анда Хыдаттағы паза пасха хазналардағы 2500 азыра садығ палатазы, тилекейдегі иң килкім 500 предприятие, транснациональнай компаниялар паза Хыдаттың кӱстіг вузтары, наука-істезігліг институттары араласча.
Пу чылда ярмарканың ӧӧн кӧcтее электроннай садығ кирее полыбысхан. Аның ӧӧн ачығында улуғ конференция ирткен. Анда ӱзӱрілген сурығлар санында ідӧк полған: саннығ паза «ноған» хада-пірге тоғыс, электроннай хырығлар аразындағы садығ киреенде саннығ алызығлар паза пасхазы. Ӧӧн хайығда – чоннар аразындағы паза регионнар аразындағы пірге тоғыс, Валентин Коноваловтың таниинаң, анзы амғы туста уғаа кирек, хаҷан Запад ыырластығ хатығластар политиказын апарчатханда.
Ярмарка тоғызы тузында ол Хыдаттың предприятиелері, пос кирее паза ӱлгӱ кізілерінең нинҷе-де тоғазығ иртірген.
– Россияның паза Хыдаттың амғы хайызығлары – ол наа тусха кірчеткен тиксі саринаң хада-пірге тоғыс паза стратегия хайызығлары. Хакас Республика Хэбэй провинциянаң ынархасты пӧзік паалапча.
Піс киртінчебіс мыннаң мындар тӱзімніг хада-пірге тоғынарына паза тузалығ хайызығларны алғыдарына, – таныхтаан Хакасия пазы, тоғазығлар салтарларын идіп.
Валентин Коновалов Хыдатсар тоғыс чорығы тузында ідӧк Хэбэй провинцияның губернаторы Ван Чжэнпу арғыснаң тоғасхан. Олар хайызығларны алғыдарынҷа сурығларны ӱзӱргеннер паза мыннаң мындар Хэбэй провинциянаң хада садығ-экономика хайызығларын тилідердеңер сағыстарынаң ӱлескеннер.
Пӱӱнгі кӱнде Хакасия паза Хэбэй провинция алюминий киреенҷе хада-пірге тоғынчалар. Мыннаң мындар хайзы даа сариның ниме-ноо тимнеҷең сығарыстың, ас-тамах промышленнозының, аал хонииның ниме-ноозын читірерін ӧскірерінҷе, турист кӧстеен тилідерінҷе пӧгіннері пар.
– Хакасия правительствозы Хыдаттың инвестор полар идінҷектерінең, республикаа хайығ салчатханнарнаң ӧткін тоғыс апарча. Піс хакас предприятиелернің сығарызын, садығ айланызын ӧскірерінҷе тоғысты ипти апарчабыс, ол, тізең, бюджет парызын ӧскірерге полысча.
Хэбэй провинция чахсы чирде орныхчатханнаңар, ол Хыдатта иң килкім транспорт-логистика кіні полча. Анда инфраструктура чахсы тиліпче, ол санда амғы тусха килістіре порттар, аэропорттар, тимір чоллар паза автомагистральлар пар. Ол тиксі чир ӱстӱнең таарлағ аларға полысча. Аннаңар провинция правительствозына регионнар аразында кӧні рейс азардаңар чӧпнең сыххам, – чарытхан Хакасия пазы, чӧптезіглер ирткен соонаң.
Валентин Коновалов Ван Чжэнпу арғысха хакас делегациязынаң тоғасхан паза аны удурлаан ӱчӱн алғызын читірген. Ол регионнар аразындағы хада-пірге тоғыс ӧткін тилиріне киртінчеткенін таныхтаан.
Таныхтирға кирек, сілкер айында Москвада Валентин Коновалов Хыдаттың Россиядағы чрезвычайнай паза полномочнай илҷізі Чжан Ханьхуэйнең тоғасхан, хайда пірге инвестиция проекттерін чуртасха кирері кӧрілген.
Хыдат Чон Республиказы – Хакасияның тӧреміл садығ партнёры паза тастындағы экономика киреенің пастағҷызы. Ирткен чыл салтарларынҷа Хыдаттың ӱлӱзі республиканың тастындағы экономика айланызының тӧртінҷі чардығын даа асча.
Сом r-19.ru сайттаң
Автор :
Хакасия пазының паза Хакасия правительствозының пресс-службазы
| Пн | Вт | Ср | Чт | Пт | Сб | Вс |
| 25 | 26 | 27 | 28 | 29 | 30 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
