Налогтарҷа закон проектіне чон чӧпсінче
14.06.2024
Хабарлар
Хакасияның Ӧӧркі Чӧп кнезі Сергей Сокол паза аның пастағы орынҷызы Пётр Воронин сессия тоғызын апарчалар
Ӧӧркі Чӧп. 11 июньда федеральнай закон проекттеріне ӱндезіглер кирер cурығларҷа Хакасияның Ӧӧркі Чӧбінің теестегі нимес сессиязы ирткен
Алызығлар
Хайди таныхтаан Ӧӧркі Чӧптің кнезі Сергей Сокол, 10-ҷы теестегі нимес сессияның тоғызын азып, Россияның финанстар министерствозы хазнаның президенті позының Айланызында налог системазын, ол санда олаңай кізілернің парыстарына налогты (НДФЛ), алыстырардаңар чарлааны хоостыра закон проектін тимнеп салған. Аны Россияның правительствозы Хазна Думазынзар кирер алнында, тиксі хазнада ӱзӱріглер парча.
Прогрессивнай налог парыстарға кирілчеткені уғаа сын, чон ағаа чӧпсінче, ол кізілернің парыстарын тиңнирге, ӱрге планнар тимнирге кӧстелче. Улуғ парыс алчатханнар кӧп налог тӧлирлер, чуға чуртапчатханнарға хазна полызар. Прогрессивнай налогтың пис шкалазы ӧӧнінде тоғынчатхан чонға теелбес, олар хайди 13 процент тӧлееннер, алызығлар прай чонның улуғ парыс алчатхан ікі процентіне ле теелер. Мындағ алызығлардаң хоза кірчеткен ахча хазнаның чуртас-экономиказын тилідеріне, сӧбірелерге, чииттерге хабазарына, чоллар, школалар, олған садтарын пӱдіреріне, хазых хайраллирына ызылар.
Ідӧк Сергей Сокол сессияның кӱн суриина Ӧӧркі Чӧптің комитеттеріндегі алызығлардаңар хоза сурығ кирілгеннеңер искірген.
Налогтар
«Россия Федерациязының Налог кодексінің пастағы паза ікінҷі чардыхтарына паза алынҷа законодательнай акттарына алызығлар кирердеңер» федеральнай законның проектіне ӱндезердеңер сурығҷа чоох тутхан республиканың Ӧӧркі Чӧбінің бюджетче паза налог политиказынҷа комитедінің кнезі Валерий Марков.
Хайди ол искірген, Россия президентінің Айланызында налог системазын алыстырардаңар чоох парча. Іди закон проекті хоостыра прогрессивнай шкала кирілері кӧрілче. Аны хоостыра, айда 200 муң салковайдаң тӧбін парыс алчатханнарға НДФЛ амғы 13 процент синде халча. Чылда парыстар 2,4 – 5 миллион полза, 15 процент тудылар, 5 – 20 миллион салковай полза – 18 процент, 20 – 50 миллион салковай полза – 20 процент, чылда 50 миллион азыра салковай парыс алчатса, 22 процент налог тудылар.
Мында таныхтирға кирек, кӧдірілген ставка прай парыс ахчазына теелбинче. Кӧдіре налог 2,4 миллион салковайдаң асчатхан чардығынаң на алылар. Финанстар министерствозының саннарынаң, налогтар ікі миллионҷа кізінің ӧс парар алай хазнада тоғынчатхан чонның 3,2 процентінің не. Посха пос тоғыс таапчатханнарға налог сині алыспас.
Дивидендтерге 13 проценттіг НДФЛ 2,4 миллион салковайға теере тудылар, 15 процент налог аннаң асчатхан парысха салылар, че аннаң андар ол паза ӧспес. Ахчалығ чаҷыннарға андағох оңдайнаң налог тудылар. Пуох оңдайнаң налог тудылар тибіреділбинчеткен объекттерні сатхан парыстардаң.
Наа системада льготаларнаң тузаланары кӧрілче. Іди ӧнетін чаа операциязы араласчыларына кӧдіре НДФЛ теелбес. Ікі паза аннаң даа кӧп палалығларға, сӧбіредегі пір кізінің айдағы ортымах парызы чуртап парыбысчаң иң асхынах cиннең 1,5 хати аспинчатса, оларға 13 процент НДФЛ тӧлелгеннің 7 проценті айландырылар.
Бюджеттеңер
Валерий Марков пасха даа кӧп сан адаан. Ідӧк ол «Россия Федерациязының Налог кодексінің пастағы паза ікінҷі чардыхтарына паза алынҷа законодательнай акттарына алызығлар кирердеңер» федеральнай законның проектіне ӱндезердеңер сурығны чарытхан:
– Республика бюджедінеңер чоохтаза, Хакасияа федеральнай бюджеттең ахчанаң полызары, ол санда нацпроекттерні чуртасха киреріне, уғаа кирек пол парча. Аннаңар налог законодательствозындағы алызығлар, налогтар тӧлирінҷе орта шкала турғызылғаннаң пасха, хазна бюджедіне хоза ахча кирер оңдай пирче. Ол ахча регионнарға ызылар, социальнай сфераа, пӱдіріге, коммунальнай паза транспорт инфраструктуразын нааҷылирына паза национальнай проекттерні чуртасха киреріне.
Россияның финанстар министерствозы саннарынаң, федеральнай бюджетке пу алызығлардаң хоза 2,5 триллион салковай кірер. Ол ахча, регионнарның чуртас-экономиказын тилідеріне, инфраструктураа, чурт пӱдіриине, чолларға, ол санда президент чарлаан наа нацпроекттерге парар: «Сӧбіре», «Чииттер паза палалар», «Узах паза ӧткін чуртас», «Кадрлар».
Сӧбірелер
Ӧӧркі Чӧптің хазых хайраллирынҷа паза социальнай политикаҷа комитедінің кнезі Людмила Кауфман «Ікі паза аннаң даа кӧп палалығ тоғынчатхан паба-іҷелерге чыл сай ахча тӧлирдеңер» федеральнай законның проектіне ӱндезердеңер сурығҷа хысха чоох тутхан. Аның искіриинең, чыл сай тӧлег пирілер, хаҷан сӧбіредегі пір кізінің ортымах парызы регионда турғызылған чуртап парыбысчаң иң асхынах cиннең 1,5 хати аспинчатса, чоохталча проектте.
Социальнай фонд 18 часха читкелек алай ӱгренчеткен 23 часха читкелек паланың паба-іҷезінің полғанына ла чыл сай тӧлег пирер. Аны аларға айланған чылның ирткен чылда НДФЛ тӧлелген ахчаның 7 процентін айландырарлар. Пу проект алыл парза, закон 2026 чылның 1 январьынаң кӱзіне кірер.
Ӱзӱріглерде араласханнар депутаттар Михаил Молчанов, Олег Иванов, Григорий Назаренко, Татьяна Краснова паза даа пасхазы. Ӧӧркі Чӧптегі прай фракциялар закон проектіне чӧпсінізін кӧзіткеннер. Сессияның тоғызын тоозып, Сергей Сокол прайзын, Россия кӱнінең алғыстап, хазнаны паза республиканы тилідерге тӱзімніг тоғынарға алғаан.
Сом Дмитрий Сунчугашевти
Автор :
Николай Султреков
| Пн | Вт | Ср | Чт | Пт | Сб | Вс |
| 25 | 26 | 27 | 28 | 29 | 30 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
