Хакасияның 27 инвестициялығ чӧбі – 120 миллиард салковайға
07.06.2024
Хабарлар

Рустам Миннихановнаң Валентин Коновалов
ПМЭФ-2024. Сибирьнің регионнары хазнаның ӧӧн форумының араласчыларына паза аалҷыларына пос чирлерінің инвестициялығ паза чуртас-экономикалығ кӱзін кӧзіт пиреріне хати пірігіп алғаннар
6 хандыхта Петербургтағы чоннар аразындағы ХVІІ форумда Сибирьдегі федеральнай округ субъекттерінің «Улуғ Сибирь» пірге ӧмеліг экспозициязы пайрамнығ азылған.
Пӱӱл чӧптезіглер иртірҷең ікі хадыллығ стилизованнай павильон тимнелген. Анда ідӧк чӧптезіглерде хол салҷаң зоналар паза телестудия пар.
Чиит артисттер, тізең, Россиядағы Сӧбіре чылына чарыдылған театрализованнай ойын кӧзіт пиргеннер.
Форум араласчыларынзар паза аалҷыларынзар чолабиттіг сӧснең Россия правительствозы кнезінің орынҷызы Дмитрий Патрушев паза Россия президентінің СФО-дағы полномочиеліг кізізі Анатолий Серышев айланғаннар.
«Улуғ Сибирь» площадкада «Сибирское соглашение» Россия субъекттерінің экономикаҷа пірге тоғынҷаң регионнар аразындағы ассоциациязы чӧбінің чыылии ирткен. Губернаторлар Сибирьдегі федеральнай округтың 2035 чылға теере чуртас-экономикаҷа тиліс стратегиязын ӱзӱргеннер. Ол чарым чыл мының алнында тоғынып пастабысхан. Регионнар пу тус аразына кӧп ниме идерге маңнанғаннар. Россия президенті позының айланызында турғысхан пӧгіннерні санға алып, тиліс стратегиязы паза аны чуртасха кирҷең план тӱптестірілер.
Хакасия Сибирьнің піріктірілген кӧзідиинің тоғызы хоостыра 27 инвестициялығ чӧбін сығарған, оларның тиксі паазы 120 миллиардча салковайға читче. Оларның аразында аал хонииндағы, металлургиядағы, тимнепчеткен промышленностьтағы, туризм сферазындағы паза пасха даа отрасльлардағы проекттер.
Форум тузында тоғысчы тоғазығлар, чӧптезіглер, дискуссиялар иртер паза интервьюлар пирілер. Регионнар паза компаниялар аразында республика экономиказының ӧӧн отрасльларын тилідер сурығларҷа чӧптезіглер идері кӧріл парған.
Полған на чӧптезіг Хакасияның паза тиксі хазнаның чуртас-экономиказын мыннаң мындар тилідеріне ӧзіс орны полар. Мындағ сағыс-кӧрізін искірген республика пазы Валентин Коновалов.
Пастағы чӧптезіг, тізең, Татарстаннаң иділген. 6 хандыхта Петербургтағы чоннар аразындағы форумның тоғызы хоостыра Хакасия пазы Валентин Коноваловтың паза Татарстан раизі Рустам Миннихановтың тоғысчы тоғазии ирткен.
Сарилар республикалар аразында пірге тоғынардаңар иділген чӧптезігні чуртасха кирҷең мероприятиелер планын ӱс чылға узарадыбысханнар. Ол чӧптезіг 2016 чылдаң сығара тоғынча.
Пу тус аразына регионнар промышленностьты паза инвестицияларны тилідерінде чахсы опытнаң ӱлескеннер, туризм паза культура сферазында палғалыстарны тыыдып алғаннар.
Санкт-Петербургтағы чоннар аразындағы экономика форумы 8 хандыхха теере иртер.
Сом r-19.ru сайттаң
Автор :
Хакасия пазының паза Хакасия правительствозының пресс-службазы
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 1 | 2 |
Кӱн таңмазы
Хакасияда
Россияда
Тилекейде