Cамокат – хорғыстығ транспорт
07.06.2024
Хабарлар
Ирина Дельхман, Сергей Смирнов паза Ирина Ауль
Брифинг. Хакасияҷа МВД-да республиканың Хазна автоинспекциязының (ГАИ) устаа пӱӱл олғаннар удаа саайға кірчеткен сурығҷа брифинг иртірген
Мероприятие иртірерінде араласханнар Хакасияҷа МВД-ның Хазна автоинспекциязы устааның пастығы Сергей Смирнов, Хакасияҷа МВД-ның ГАИ устааның пропагандаҷа пӧлии пастығы Ирина Дельхман паза республиканың пала праволарынҷа уполномоченнайы Ирина Ауль.
Пастап Сергей Смирнов республикада пӱӱл, олғаннар аралазып, саайлар полған саннарны адаан. Аның чооғынаң, Хакасияда полған 29 саайда 38 чазы читкелек пала палығлатхан. Пылтырғы олох туснаң тиңнестірзе, пу сан 58 процентке ӧс партыр. Олғаннар постары сизіктіг тудынмаан сылтаанда 15 саай полған, анда 17 пала палығлатхан. Мында ӧзіс 183 процент кӧзіділче.
Улуғ чолларда (трассаларда) полған читі саайда 13 пала палығлатхан, ол санда: федеральнай чоллардағы ікі саайда Ағбан пилтірінең ікі пала, Боградтаң пір пала. Регионның паза муниципалитеттер аразындағы чолларда полған пис саайда Саяногорсктаң паза Ағбан пилтірінең ӱзер пала палығлатхан, Сорығдаң – ікі пала, Ағбаннаң паза Боградтаң – пірер пала.
Город-аалларда полған 22 саайда 24 пала палығлатхан, ол санда: Ағбанда полған тоғыс саайда 10 пала, Харатастағы пис саайда – алты пала, Алтай аалдағы ікі саайда – ікі пала, Асхыстағы ікі саайда – ікі пала, Ағбан пилтіріндегі ікі саайда – ікі пала, Саяногорсктағы пір саайда – пір пала, Сорығда полған пір саайда – пір пала.
Аннаң андар Ирина Дельхман чоох тутхан. Хайди ол таныхтаан, транспорт урунысханы саайларның ӧӧн сылтаа пол парча. Іди андағ 13 саайда 19 пала палығлатхан. Оларның ӱзінде палалар олған одырчығы чох алай хурнаң хаптырылбин апарылчатханнар. Пис саайда чазы читкелек, правазы чох мототранспорт водительлері араласханнар. Чазағ парчатхан алай чол кисчеткен 10 палаа автомобиль урунған, олғаннар анда ідӧк палығлатханнар.
Правазы чох кізілерге мототранспортты чӧрерге пирген ӱчӱн 128 кізі административнай нандырыға тартылған. 50 азыра мототехника штрафтар тӧлеҷең ӧнетін орынзар турғызылған.
Чолны чазағ кисчең орыннарда уғаа сизіктіг поларға кирек. Светофорда чаратчатхан ноған ӧң чарыпчатса даа, аар-пеер чахсы кӧрерге, транспорт тохтапчатханын сағып алчадарға кирек. Транспорт тохтап парза ла, чолны кизерге чарир. Ам городтағы олғаннар тынанарға аалзар парчалар, аалдаң городтарзар килчелер. Аннаңар пілерге кирек – велосипедті, самокатты ідіп ле чолны кизерге чарадылча. Ідӧк чазы читкелек олған, транспорттың рульы кистінде полып, саай ит салза, паба-іҷезі штрафтар паза иділген ӱрег ӱчӱн тӧлир. Пала, тізең, профилактика санына турғызылар, анзы аның прай чуртазына хомай теелер.
Чазы читкелектер мотоциклнең, скутернең ӧӧнінде права чох ойлат чӧрчелер. Олар саай ит салзалар, кізілер дее ӱрепчелер, палығлатчалар. Мотоциклдең аңдарылбаан кізі чоғыл. Паба-іҷелер палаларына скутерні, мотоциклні ойнаҷах чіли сыйлап пирчелер, че андағ «сыйых» чобағлығ кирекке ағыларынаңар сағынминчалар.
Амды пос алынҷа чӧрҷең мобильнай техника (СИМ) транспорт кӧрімі тарапча, андар кірчелер пір паза аннаң даа кӧп тегілектіг техникалар, аннаң пір ле кізі чӧр поларға кирек, ӧӧні – аның двигательі пар. Хакасияда двигательліг самокаттар кӧп пол парир. Пілерге кирек – самокат ойнаҷах нимес, олғаннарға велосипедтіг чӧрерге килістіре полча.
Хакасияда «СИМ хорғыс чох» социальнай кампания иртірілче, аны хоостыра чазы читкелектерні чолларҷа, тротуарларҷа хорғыс чох чӧрерге кӧніктірер пӧгін турча. СИМ-наң тузаланар правилоларны пілерге кирек. Ол пір ле кізіні тарт чӧрерге кӧріл парған, аннаң ікілер паза аннаң даа кӧп кізее чӧрерге чарадылбинча. Аны ӧнетін турғысчаң орында ла артызарға чарир, пасха кізілерге ол харығ полбазын. Чолны кизер алнында электросамокаттаң тӱзіп, чазағ парарға.
Электросамокаттың двигательі пар, аның кӱзі 230 ваттха теере полза, аннаң хайдағ даа кізее чӧрерге чарадылча. Че аның кӱзі 250 ваттаң асчатса, водитель правазы киректелче. Электросамокат – ол машина осхас транспорт, аннаңар, саайға кірбес пӧгіннең, сыбыра уғаа сизіктіг поларға кирек. Ізілік полып, самокатха хаҷан даа турбаңар. Ол правилаа тудыныңар, чуртазыңарны, хазииңарны хайраллап халарзар.
Читі часха читкелек пала самокаттығ улуғларнаң хада ла чӧрзін, 14 часха теере палаа тротуарҷа велосипедтіг чӧрҷең полосаҷа чӧрерге чарадылча, че часта 25 километрдең табырах ойлатпасха. 14 час ас парған саарбахтарға чолның оң саринҷа часта 60 километрге теере парарға чарадылча. Ол водитель чіли нандырығ тудар.
Ирина Ауль паба-іҷелернің палалары ӱчӱн нандыриинаңар чоох апарған. Хайди ол таныхтаан, палаларнаң удур-тӧдір киртіністіг чоох апарарға кирек. Чолны кисчетсе, кӧрінче – паба-іҷезі паланаң чоохтасхан ма, чох па. Чоохтасхан соонда пала правилоларға тудынчатханы кӧрінче. Паба-іҷе постары палаларына чахсы кӧзідім поларға кирек. Олғаннарға хорғыс полдыртпас ӱчӱн, паба-іҷелернің нандырии уғаа улуғ.
Сом Дмитрий Сунчугашевти
Автор :
Николай Султреков
| Пн | Вт | Ср | Чт | Пт | Сб | Вс |
| 29 | 30 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
