Тынағ кӱннері хынығ иртсін
05.06.2024
Хабарлар
Чайғы лагерьінзер чӧрчеткен олғаннар
Чайғы. Ирткен неделяда Хакасияның школаларында чайғы лагерьлері тоғынып пастааннар
Асхыс аймааның Казановтағы школа лагерьінзер пӱӱл 15 пала чӧрче.
Лагерь пастығы Ирина Михайловна Сербигешева полча. Ідӧк анда ікі воспитатель палаларнаң тоғынча – Валентина Иннокентьевна Майнагашева паза Людмила Алексеевна Саражакова. Англия тілі ӱгретчізі Эмилия Митрофановна Кидиекова лагерьнің улуғ воспитательі полча. Чоохтирға кирек, пу школада ол иң улуғ частығ ӱгретчі. Анда ол 30 чыл азыра тоғын салған.
Ӱгредіг чылы тоозыл парған даа полза, олғаннар школазар уроктарғаох чіли иртеезін чыылызып пастапчалар. Олар, зарядка идіп, читіре усхунғлапчалар. Кӧңнілері улам кӧдіріл парар ӱчӱн, ас-тамах устары оолах-хызыҷахтарға тадылығ чиис тимнепчелер. Ол аймах кашалар, сӱттең тимнелген ӱгре. Бутербродтарға олар хынчалар, ідӧк компотты, сӱттіг какаоны пір-ікі ле ізібісчелер.
Харын тохта, ноға пірее тузалығ кирекнең айғаспаҷаң? Кӱнӧрте лагерьдегілернің тоғыс кӧп. Оларға отряд істінде паза тиксі лагерьде мероприятиелер иртірілче.
– Піcтің спортха чарыдылған кӧп мероприятие иртче. Чахсы кӱн турза, олғаннар тасхар футбол ойнапчалар. Оларнаң Анастасия Петровна Саражакова чахсы айғасча. Хомай кӱн полза, палалар спортзалда аймах ойыннар ойнапчалар: арғамҷы тартысчалар, тобит ойнапчалар паза даа пасхазы. Чоохтирға сағынчам, пістің школада тобит чахсы тиліпче. Ағаа оолах-хызыҷахтарны пасталығ класстар ӱгретчізі Ирина Михайловна Сербигешева кӧніктірче паза марығларға ал чӧрче.
Ирткен чылларда піс лагерьдегілернең «Казанов аал» музейзер чӧрҷеңміс. Анда олар охчаадаң атчаңнар, арғамҷы тартысчаңнар, урух тастаҷаңнар. Пӱӱл олғаннарыбысты андар апарарға киліспинче.
Пу чылдаң пасти пістің школада театр кружогы апарыл сыххан. Ол «Кӱмӱс сурнағастар» адалча. Аннаң Ирина Григорьевна Кыржинакова устапча. Ол чайаачы специалист. Театрда олғаннар хакас ла тілінең чоохтазарға кӱстенчелер. Школада халғанҷы саң ирткенде, кружок араласчылары улуғ нимес ойын кӧзіт пиргеннер. Прайзыбысха ол уғаа чапсых пілдір парған. Ам пістің лагерьдегілер андар ідӧк хынып чӧрчелер, неделяда нинҷе-де хати репетиция иртче. Театр олғаннарға уғаа тузалығ тіп санапчам. Иң пастап анда палалар чон алнында орта тудынарға ӱгренчелер. Піс хылиибыс хоостыра сала туйух арахпыс нооза. Анда олар чалтанмасха ӱгренчелер. Анаң олар чуртаста ізестіг тудынарлар тіп сағынчам. Костюмнар ӧӧнінде паба-іҷе кӱзінең тимнелче. Пістің чайаачы олғаннар пар. Сарнап полчатханнар илееде. Оларға хабазарға кирек.
Аннаң пасха піс палаларны холнаң узанарға ӱгретчебіс, – чоохтапча Эмилия Кидиекова.
Лагерьге чӧрчеткеннернің аразында льготниктер кӧп. Ол санда ӧнетін чаа операциязында араласчатханнарның палалары. Оларға путевка тикке пирілген.
Сом Альбина Чистогашевани
Автор :
Оксана Сунчугашева
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде
