ЕГЭ-2024. 11 класс тоосчатхан ӱгренӌiлернiң пiрге хазна сыныхтағларының тузы читтi. Киӌее олар географияӌа, литератураӌа паза химияӌа пiлiстерiн сыныхтадылар.

Ағбанда пу предметтерӌе ЕГЭ iкi ӱгредiг организациязында ирткен. Ол городтың 19 паза 12 №№ школаларында. Сыныхтағ иртчеткен орынзар (ППЭ-зар) ӱгренӌiлер 10.00 частаң иртöк чыылызып пастааннар. Оларға обложка чох паспорт, хара гелевай ручка, суғ алып аларға чарадылған. Сотовай телефоннарны, смарт-часыларны ППЭ-зар иртiрерге чарадылбаан. Сыныхтағ хатығ ирткен.

– Пiстiң школада 65 пала литература паза 16 пала география предметтерӌе сыныхтағ тутхан. Пӱӱл географияӌа ЕГЭ-да ӱгренӌiлерге калькуляторнаң тузаланарға чарадылча. Ирткен чылда чарадылбаан. Ағаа хоза литератураӌа cыныхтағ тузында iкiнӌi чылы орфография сöстiктерiнең тузаланарға чарадылча. Палаларға суғ, шоколад хада алып аларға чарир. Экзамен ӱр иртче нооза, олғаннар кӱс кöп хоратчалар, – чоохтапча 19№ школа директоры Елена Сморгова.

Хайди искiрче Хакасияның ӱгредiг паза наука министерствозы, пӱӱл тиксi республикада пу предметтерӌе экзаменнернi 500 азыра ӱгренӌi тутхан. Географияны – 43 олған, литератураны – 137, химияны – 371. Оларға сигiс ППЭ тимнелген. ЕГЭ салтары хандых айының 5-ӌi кӱнiне теере пiлдiстiг пол парарға кирек.

Пӱӱл 11 класс тоосчатханнарның пiрге хазна сыныхтағлары хандых айының 11 кӱнiне теере иртер. Iдöк оларға хоза резерв кӱннерi кöрiл парғаннар. Ол от айының 4-5 кӱннерi. Пу туста балларынаң чараспинчатхан оол-хыстарға пiр предметче сыныхтағны хатап тудыбызарға чарир. Пу алызығ хазна президентi Владимир Путиннiң чарадиинаң пастағы чыл кирiлдi.

Чағдапчатхан неделяда, тiзең, 11 класс тоосчатханнар ööн предметтерӌе ЕГЭ тударлар – ол математика паза орыс тiлi.

Iдöк пу неделяда хазна сыныхтағларын 9 класс тоосчатханнар тутханнар. Пастағызы пасха хан тiлi предметче полған. Аны 300 азыра пала таллап алған. Сыныхтағ iкi кӱн ирткен. Пастағызында олар англия тiлiнең аудио пастыра текст истiп, аны хоостыра сурығларға нандырғаннар. Iдöк чахсы хығыр полчатханын, пас полчатханын кöзiткеннер. Iкiнӌi кӱнiнде ӱгренӌiлер англия тiлiнең хайди чоохтасчатханын кöзiткеннер. Пу предметче паалағларны чииттер хандых айының 3-ӌi кӱнiне теере пiлiп аларлар.

Аннаң пасха, 9 класс тоосчатханнар тöреен тiлӌе хазна сыныхтаан ирткеннер. Пӱӱл хакас тiлi предметтi 107 пала таллап алған. Сыныхтағ iкi орында ирткен – Н.Ф.Катановтың адынаң Хакас национальнай гимназияда паза Асхыс аймааның Калининдегi школазында. Сыныхтағ iкi чардыхтаң пӱткен. Пастап ӱгренӌiлер изложение пасханнар, анаң тест ирткеннер. Пу тоғыстарны толдырыбызарға оларға ӱс час пирiлген.

Тиксi алза, пӱӱл хазнада 700-че муң ӱгренӌi ЕГЭ тудар, ол санда школаны пӱӱл тоосчатхан 600 муң азыра оол-хыс. Сыныхтағ иртiрерiне регионнарда алты муң азыра орын тимнелген. Школалардаң пасха, чуртас оңдайлары хоостыра олғаннар iдöк сыныхтағны имнег тураларында паза ибде тутчалар. ЕГЭ-ны иртiрерiне 300 муң азыра специалист тартылған паза алты муң азыра имнег тоғынӌызы. Ағаа хоза, сыныхтағ тузында кöрiгӌiлер тоғынғаннар. Тиксi 40 муң азыра кiзi. Ӱгренӌiлернiң предметтерӌе толдырылған тоғыстарын 45 муң азыра эксперт сыныхтир тiп кöрiлче.

Предметтердеңер чоохтаза, ööннердең пасха, ӱгренӌiлер хоза предметтерӌе ЕГЭ тутчалар. Пӱӱл школа тоосчатханнарның аразында кöбiзi обществознаниенi таллап алған (43,76 %), iкiнӌi орында – информатика (20,68 %), анаң биология, физика паза тархын предметтер парчалар.

Сом Альбина Чистогашевани