2024 чыл – Сöбiре чылы. ВДНХ-да «Россия» кöзiдiг-форумда хоных хончатханнаңар санға алылған республикадағы iкi чиит ирепчiнi Хакасия пазы Валентин Коновалов алғыстаан паза улуғ нимес сыйыхтар читiрген.

Пӱӱл Москвада «Россия» чоннар аразындағы кöзiдiг-форумның ачығында пiстiң хазнадағы пастағы Той фестивальында сöбiре тöстеен Хакасиядағы iкi чиит ирепчiнi пу кӱннерде республика правительство туразында чеестееннер. Оларнаң Хакасия пазы Валентин Коновалов тоғазығ иртiрген.

Чоохтирға кирек, Россиядағы пастағы Той фестивальы пiстiң хазнаның ööн городында 12 – 19 сiлкерде иртiрiлген. Ол Сöбiре чылына паза Чоннар аразындағы сöбiре кӱнiне чарыдылған. Андар хоных хончатхан чиит ирепчiлер тиксi 89 регионнаң хығыртылғаннар, ол санда – Хакасиядаң iкi ирепчi. Олар – Асхыс аймааның чуртағӌылары Сабир Боргояков паза Тарина Бытотова, Ағбанда чурттығ Анатолий Курыгин паза Наталья Ли. 12 майда хоных хончатханнаңар 151 ирепчi пiр саңай санға алылчатханда, анда Боргояков ирепчi араласхан, 14 майда 16 ирепчiнiң санында Курыгиннер полғаннар. Хакасиязар айлан килгеннерiнде, оларнаң Хакасия пазы Валентин Коновалов тоғазығ иртiрген. Анда iдöк араласханнар республика пазының орынӌызы Юлия Исмагилова, Хакасияның iстенiс паза социальнай арачыланыс министрi Татьяна Раменская, республиканың юстиция паза регионда хорғыс полдыртпас киректерӌе министерствозының ЗАГС департаментi устағӌызы Светлана Остапец.

– Тиксi Россия фестивальында Хакасия ӱчӱн турысхан ӱчӱн сiрерге алғызым читiрчем. Сынап пiстiң республика ӱчӱн морсымнығ турысхазар паза пiстiң чонның кибiр-чозахтарынаң таныстырғазар. Сöбiреңер пай паза ырыстығ чуртастығ, пик хазыхтығ ползын. Сöбiреде прай ниме чахсы, иптiг ползын тiп алғапчам, – чылығ сöстер читiрiп, тоғазығны пастаан Валентин Олегович.

Пу чылығ тоғазығ тузында чиит ирепчiлер иң пурун алғыс сöстерiн читiргеннер регион правительствозына, постарына хазна синiндегi улуғ фестивальда аралазарға оңдай пирiлген ӱчӱн. Олар, фестивальдаңар паза Москвазар хайди чöр килгеннеңер чоохтап, «Россия» кöзiдiгдеңер сағыс-кöрiстерiнең, iдöк пöгiннерiнең ӱлескеннер. Той фестивальында хакас национальнай кип-азахтығ полғаннар. Хайди таныхталған пу тоғазығда, олар Хакасия ӱчӱн уғаа чахсы турысханнар. Iкi ciлiг чиит ирепчi, национальнай костюм кизiп, чазан салғанда, уғаа морсымнығ кöрiнгеннер, ВДНХ-зар чыылысхан чонның хайиин матап тартханнар. Кöп кiзi, пiстiңнерге öкерсiнiп, оларны хайди даа сомға суурарға, интервью алып аларға кӱстентiр.

Сабир Боргояков паза Тарина Бытотова Той фестивальының пастағы кӱнiнде, 12 сiлкерде, хоных хончатханнаңар санға алылғаннар. Ол кӱн ВДНХ-да пiр саңай 151 чиит ирепчi сöбiре тöстеен. Че ол пайрам иртiрiлчеткен кӱнде Москвада сöрöн полтыр, аннаңар Боргояков ирепчее пасха араласчыларнаң хада, тасхар соохха тооп, сидiктi тобырарға килiскен. Кööленiс чылытхан тiп хормачыланғаннар. Мындағ улуғ пайрам оларның сағызында хаӌанға даа халар. Амды Тарина Евгеньевна Сабир Владимировичтiң фамилиязын ал чöрче.

Анатолий Курыгин паза Наталья Ли 14 сiлкерде Сибирьдегi федеральнай округтың кӱнi таныхталчатхан пайрамда араласханнар, ол кӱн пiр саңай 16 ирепчi хоных хончатханнаңар санға алылған. Анатолий, арғызының тöреен кӱнi ӱлӱкӱннелчеткенде, Натальянаң танызып алтыр. Чииттер, сигiс чыл хада полып, пӱӱл хоных хонарға сағыныбысханнар. ЗАГС-та оларға пу улуғ фестивальда аралазарға чöп пирiлген. Улуғ пайрамда хакас чонның чазағлығ кип-азаан кизiп, ВДНХ-дағы чöрiмде араласханнарына уғаа морсынчалар. Хакасия ӱчӱн турысчатханда, андар национальнай костюм киспин, хайди парӌаң за тiп чоохтанча сöбiре пазы. Ол хоных хонған ирепчiлернi сыбыра хада-пiрге тудынарға, ынағ паза пiр кöрiс-сағыстығ чуртирға алғапча.

Чиит ирепчiлер амды тойларын Хакасияда иртiрерге пöгiнчелер. Боргояков ирепчi пу чыл чайғызын тойын ӱлӱкӱннирге сағынча. Курыгиннер ол сурығны пазағы чылға чылдырчалар. Тойға хығырзалар, регион пазы Валентин Коновалов, оңдай полза, кил парарға кӱстенербiн тiп молӌаан.

Тоғазығның халғанӌызынзар Валентин Олегович чииттерге порчолар паза улуғ нимес сыйыхтар читiрген.

Сом Альбина Чистогашевани

Сомда: тоғазығ араласчылары Светлана Остапец, Юлия Исмагилова, Курыгин ирепчi, Валентин Коновалов, Боргояков ирепчi, Татьяна Раменская