Парк 40 харағайға пайып парды

Чöрiм. Хакасия пазының орынӌызы Михаил Побызаков паза республиканың экономика тилiзi министрi Роман Ковтун Пос кирее неделязында «Идiнӌектер аллеязында» харағайлар одыртарында араластылар.
Ағбан городтың Культура паза тынағ паркында iкiнӌi тахтаның оң саринда «Идiнӌектер аллеязы» öсче. Республиканың идiнӌектерi аны 2021 чылда тöстеп алғаннар. Алындағы чылларда тиксi 120 харағай одыртылған полза, сiлкер айының 22-ӌi кӱнiнде пос киреенең айғасчатханнар хоза 40 ағас одырт салдылар.
– Пiс кöрчебiс, чöрiмде кöп кiзi араласча, ағастар даа чидiспинче – анзы идiнӌектернiң öткiн тоғызы, – чарытхан Михаил Побызаков. – Хакасияның экономиказында кiчiг паза ортын пос киреенде 80 муң азыра кiзi iстенче. Идiнӌектер республикаа тоғыс орыннарын пирчелер, налогтар тöлепчелер, чуртазыбысты иптiг саринзар апарчалар, пiс кӱннiң сай тузаланчатхан паза наа ниме-ноо сығарчалар. Аннаң пасха, ол илбек чӱректiг чон. Ол кiзiлер ахчадаңар ла сағынминчалар, пiс кöрчебiс, хайди олар ибiркi чирлернi иптирiнеңер, арығ кии ползын, ағастар кöп öссiн тiп сағынчалар. Iдöк олар полызығлығ чöрiмнерде öткiн араласчалар. Аннаңар оларға тоғыстары ӱчӱн алғызым читiрчем, сағыстары толзын, олар, чахсы, öткiн тоғынып, пайызыннар.
Мына ла пiр улуғ нимес öме турған полза, ағас одыртчаң чöрiм азылғаны чарлалғанда, ол чон ачыхча чапчаң тараза халғанда, пiлдicтiг полған: чöрiмде илееде кiзi аралазарға чыылысхан. Олар анда-мында артызылған харағайларны наа орыннарда одыртханнар: кем-де кӱрӌекнең ағаа чирнi тимнеен полза, пiреезi аны тут пир турған, пасхазы, тiзең, кöнек тудынып, суға маңзыраан.
Прай араласчыларға харағай хорбызын хайди орта одыртарға киректелчеткенi чарыдылған. Аны алында öскен чирiнең пöзiк алай тирең одыртарға чарадылбинчаттыр. «Юбказын» (алында öскен чир синiн) тимнелген чирдең сала чабыс тудып, палғаснаң кӱреп пастирға чарир. Тамырларына хыстым полбасха кирек. Наа чир иргi чирiнең тиң ползын. Иптеп одыртылған харағайны суғлирға чарир.
Араласчылар аразында Хакасияның идiнӌектерiне хабасчатхан аймах чыынды-кiннернiң устағӌылары паза кiзiлерi полғаннар: экономика тилiзi министерствозы, тилiс чыындызы, «Минiң пос киреем» кiн, кiчiг кредит компаниязы, гарантия чыындызы паза пасхазы. Чиит идiнӌектер клубы араласханох. Аның араласчызы, чиит идiнӌек Ирина Сафьянова позынаңар хысхаӌахти чоохтап пирген:
– Мин идiнӌек чiли санға турғаннаң пiр чыл даа ирткелек. Айғасчам маркетингнең паза рекламанаң. Пу тус аразына мин маркетинг агентствозын тöстеп алғам, кiчiг паза ортын пос киреенең тоғынчам. Ағас одыртарында пастағызын на араласчам, уғаа чапсых паза тузалығ чöрiм, – таныхтаан Ирина.
IT кöстегӌе идiнӌектерге сабланарға полысчатхан ОDS приложениенi тарадарынаң айғасчалар Екатерина Тугужекованаң Елизавета Кобякова.
– Пӱӱн пiс городыбысты öңнендiрерiне хозым идерге килгебiс. Ағас одыртып, Ағбан уламох сiлiг ползын тiп сағынчабыс. Чöрiмде iдöк пастағызын на араласчабыс, – ӱлескеннер чиит идiнӌектер.
Анӌа кiзi 40 хорбыны пiр час аразына ла одыртыбысхан. Анаң прайзы сомға суурынған. Че, чахсы кирек идiл парған даа полза, араласчылар таразарға маңзырабинчатханнар. Ӱр кöрiспеен арғыстар чiли чоох-чаахнаң турғаннар. Ағбан городтың культура паза тынағ паркы, тiзең, наа ағастарға пайып парған.
Сом Дмитрий Сунчугашевти
Сомда: Михаил Побызаковнаң Роман Ковтун харағай одыртчалар
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 1 | 2 |