2024 чыл – Сöбiре чылы. Сiлкер айының 12-ӌi кӱнiнең 19-ӌы кӱнiне теере «Россия» кöзiдiгде Россиядағы пастағы Той фестивальы иртче. Анда тиксi хазнадаң хоных хончатхан чииттер чыылысчалар. Пу танығлығ кирек чоннар аразындағы Сöбiре кӱнiне паза пiстiң хазнадағы Сöбiре чылына чарыдылча.

Пiстiң чир-суғӌыларыбыс Асхыс аймаа чуртағӌылары Сабир Боргояковнаң Тарина Бытотова паза Ағбан чуртағӌылары Анатолий Курыгиннең Наталья Ли Москвада хоных хонғаннар санында полғаннар.

Сiлкер айының 12-ӌi кӱнiнде ВДНХ-дағы пайрамда 300 азыра кiзi араласхан. Оларның санында Сабирнең Тарина. Чиит ирепчiлерге «Россия чӱрее» тиксi Россиядағы сöбiре очығының оды пирiлген, аны хазна пазы Владимир Путин мындох тамысхан, Сöбiре чылын азып. Пайрамнығ чардых соонаң чииттерге кöг-сарын сыйии тимнелген: оларға Полина Гагаринанаң Ирина Дубцова сарнааннар.

Сабир Ӱc чул аалдаң, Тарина Политов аалдаң. Тарина паза Сабир Боргояковтар Той фестивальына хайди тимненгеннерiнеңер паза анда араласханнарынаңар ӱлескеннер.

– Хакас кöгенектерiн тiктiрерi ööн сурығ полған. Тiгер кiзiнi Ағбанда таап алғабыс. Iкi неделя аразына кöгенектер паза сигедектер тимде полғаннар. Олар 30 азыра муң салковайға тур парғаннар. Ол ниикке саналча.

Регистрацияа парарға кип-азах паза чалахай кöңнiлерiбiс ле киректелген. Сiлкер айының 11-ӌi кӱнiнде парыбысхабыс, 14-ӌi кӱнiнде иртен иртöк нандыра чиде салғабыс, – теен Тарина.

Сабир Боргояковтың чооғынаң, хайдағ кöгенектер тiктiрерiн пастап интернетте кöрiп алғаннар. Тiкчең ус ипчiзер килгенде, кип-азах тiгер макеттернi кöрiп алғаннар, усха сағыстарын читiргеннер паза аннаң чöптескеннер. Хайдағ öңнiг кип-азах поларын постары таллааннар.

– Ол кӱн Москвадағы «Россия» кöзiдiгде 151 наа сöбiре тöстелген. Че прайзы национальнай кип-азахтығ полбаан. Пiс, чоныбысты сабландырар ӱчӱн, хакас кöгенектер кизердеңер азынада чоохтаабыс, – теен Сабир. – Москвазар сiлкер айының 11-ӌi кӱнiнде читкебiс. Хазнаның ööн городында пастағызын на полғабыс. Андағы чапсых орыннарӌа маңзырабин чöрерге кирек. Пiстiң андағ кöп тус полбаан. Пiс «Россия» кöзiдиин пiр кӱнге тооза кöрерге маңанмаабыс. Анда илееде музей пар.

Сiлкер айының 12-ӌi кӱнiнде 11.00 частаң 17.00 часха теере регистрация ирткен. Ол тасхар полған. Хомзынысха, соох кӱн турған. Хоных хонғанын санға турғызар туста пiс кöгенектiг ле полғабыс, кистiбiсте фонтан, аннаң соох тартхан. Киинiң чылии +8 градус полған. ЗАГС департаментiнiң устағӌызы Светлана Остапец пiснең хада парған.

Регистрация олаңай нимес ирткен. Минiң кöңнiме кiрген. Орғах айында туған-чағыннарнаң той иртiрерге сағынчабыс.

Тарина iдöк сағыс-кöрiзiнең ӱлескен:

– Пicтiң сағызыбыста пу танығлығ кирек хаӌанға даа хал парар. Хоных хонғаны санға алылғаны Москвада ВДНХ-да ирткеннеңер паспортта таныхтал парған. Чииттер пос чонының кип-азаана чазанғаннар, анзы кöңнiме уғаа кiрген. Прайзыбыс соон сӱрiстiре парғабыс. Чыылған чон матап öкерсiнген. Регистрация соонаң пiс городча чöргебiс. Кiзiлер пiстi сомға суурғаннар, пiреезi хада даа суурынған.

Хоных хонғаны ирепчiнiң сағызында хаӌанға даа халча. Таринанаң Сабир паза Анатолийнең Наталья мындағ чапсых оңдайнаң хоных хонғаннаңар пала-пархаларына хынып чоохтирлар.

Сом Робия Зайнидиновани