Киҷее, сілкер айының 12-ҷі кӱнінде, "Россия" кӧзідігде тиксі Россиядағы пастағы той фестивальы иртті!

Ол Хызыл тағыҷах алай Фома кӱніне удур иртірілген. Хызыл нымырха соондағы позырахты іди адапчалар. Іскеркі славяннарның кибірінең, ол часхы пасталчатханын таныхтапча. Ол кӱн тӧстелген хоных часкалығ полар тіп киртініс пар.

Ол кӱн ВДНХ-да 300 азыра кізі хоных хон салған, ол санда Хакасиядаң парған Сабир Боргояковнаң Тарина Бытотова.

– 151 наа сӧбіре тӧстелген. Хоных хончатхан чииттер пос чонының кибірлерін пілчеткені паза кибірліг кип-азаан кис килгені уламох хайығ тартхан. Кӧзідімге, Курск облазындағы ирге парчатхан хыс кирі-кирі ууҷазының фартугын кис килген, ағаа 150 азыра чыл,— чоохтаан "Россия" кӧзідігнің ӧӧн директоры Наталья Виртуозова.

Ӱлӱкӱн кӧңнін кӧдірген хоных хончатхан чииттернің чӧрімі. Артисттернең, цирктегілернең, баяннаң ойнапчатханнарнаң хада ирепчі поларға тимненчеткен чииттер кӧзідігнің тасхархы ӧӧн ачығына читіре парғаннар. Анда пір саңай хоных хонарынҷа пайрамнығ церемония ирткен.

Москваның ЗАГС устанызының пастығы Светлана Уханеваның искіриинең, пӱӱн олар пастағызын на пір саңай ол син чииттерні хондырғаннар.

Наа ла хоных хонғаннарға "Россия чӱрее" тиксі Россиядағы сӧбіре очығының оды пирілген, аны хазна пазы Владимир Путин мындох тамысхан, Сӧбіре чылын азып. Пайрамнығ чардых соонаң чииттерге кӧг-сарын сыйии тимнелген: оларға Полина Гагаринанаң Ирина Дубцова сарнааннар.

Хакасиядаң парып, Москвада хоных хонған Сабир Боргояковнаң Тарина Бытотованы республика пазы Валентин Коноваловтың адынаң аның орынҷызы, Хакасияның Москвадағы тӧреміл кізізі Юлия Исмагилова алғыстаан:

– Сірернің сӧбірее прай чӱреемнең часка паза чахсы чуртас алғапчам. Сірернің чуртазыңар ибіркізіне часкалығ, успас хыныстығ хоныхтың чарых кӧзідімі ползын.

Чоохтирға кирек, килкім Той фестивальы "Россия" кӧзідігде сілкер айының 19-ҷы кӱніне теере узарадылар.

Сомнар Робия Зайнидиновани паза Юлия Исмагилованың страницазынаң