Поғдархас. Пiстiң хыстар Россия чемпионадында Хакасияа iкi медаль ағылғаннар.

Олаңай кӱресче Россия чемпионады Москвада 30 хосхардаң 4 сiлкерге теере ирткен. Арға-мöрiйде иреннер паза ипчiлер араласханнар. Тиксi алза, 500 артиинаң кiзi. Хакасияа пӱӱл оң полды. Республиканың iкi медаль. Алтынны Наталья Малышева холға кирген, Наталья Пудова – хола призер.

Наталья Малышева 53 кг кöдiрiмде узын сынапча. Чемпионат тузында ол ӱс тоғазығ иртiрiбiскен. Финалның тöртiнӌi чардығында чир-суғӌыбыс Надежда Матвееваны (Москва) 10:0 саннаң чиңiп алған, чарым финалда Анжелика Ветошкинаны (Санкт-Петербург) – 4:2 саннаң. Азах меетте Наташаа хатығ чуххан тiп iкiнӌiлес чоғыл. Ол Милана Дадашеванаң (Дагестан) харбасхан нооза. Дадашева – Европа чемпионадының ӱс хати хола призеры, Олимп ойыннарының араласчызы. Че салтарында хакас хыс «ыырӌызын» 7:3 саннаң утып алған. Наталья Малышеваның пастағы тренерi – Леонид Бутонаев. Амғы туста ол Леонид паза Владимир Чучуновтарның холында узын таптапча.

Наталья Пудованың пӱӱл чидiглерге пай чыл. Тöö чирiнең сыххан спортсмен кӱрген айында Ярыгин турнирiнде хола медаль утхан, амды Россия чемпионадында ӱзiнӌiзi полыбысты. Пудова 50 кг кöдiрiмде соон сӱрiстiре Александра Копылованы (Саха-Якутия) паза Натия Сванидзенi (Ростов облазы) чиңiп алған. Че чарым финалда чир-суғӌыбыс пöзiк устығ кӱресчi Надежда Соколоваа (Новгород облазы) чиңдiр салған. Соколова, Наташа Малышева чiли, хосхарда олимп лицензиязын утып алған. Хола медальны Пудова пiрдеезiне пирбеен. Алынай Дарджаанаң (Тува) тоғазығ 13:2 саннаң тоозылған. Наташа Пудова тренер Евгения Карамчакованың устаанынаң харбазарға пастаан, амғы тренерi – Марат Кичеев. Iкi Наташаны Россия чемпионадына чоннар аразындағы класстығ спорт узы, Олимп ойыннарының араласчызы Леонид Чучунов тимнеен.

Iдöк 50 кг кöдiрiмде хола медальны Мария Тюмерекова утхан. 2021 чылдаң Маша Кемеров облазы ӱчӱн турысча. Ханум Велиеваны (Хызылчар крайы) таныхтирға кирегöк. 65 кг кöдiрiмде чиңiс тутхан хыс – Россияның саблығ тренерi Лидия Карамчакованың ӱгренӌiзi. Абахайларыбыс ӱчӱн öрiнчебiс, чидiглерiне поғдархапчабыс, Наталья Малышева пӱӱл Олимп ойыннарында аралас поларына iзенчебiс.

Сом Наталья Малышеваның архивiнең

Сомда: Наталья Малышева (сол саринаң), тренер Владимир Чучунов паза Наталья Пудова