Ноға прайзына тӧлелбинче?
24.04.2024
Хабарлар
Аал хонии. Хосхар айында Ағбан пилтірі аймаа чуртағҷылары чох иділген маллары ӱчӱн компенсация албааны хоостыра Хакасияның Ӧӧркі Чӧбінзер айланғаннар
Хакасияда узелковай дерматит чуғынҷах ағырығ, сығыс киліп, тарап сыххан сылтаанда нинҷе-де муниципалитетте маллар чох иділген. Оларның ӱчӱн компенсация тӧлелген. Че ахчаны прай хоныхтар албааннар. Ағбан пилтірі аймаанда 16 хоныхтың ээзі, ол санда тӧрт кресен-фермер хонии, компенсация ам даа алғалах.
Хосхар айының 10-ҷы кӱнінде сыххан «Хакас чирі» газетада ол хоныхтар ветеринар правилоларын сайбаан сылтағнаң чох иділген мал ӱчӱн тӧлег ал полбинчатханнаңар пасхан полғабыс. Пу кӱннерде Хакасияның аал хонии паза ас-тамах министрі Сергей Труфановнаң, тоғазып, хайдағ сайбағлар сығысханнаңар паза сурығ хайди пӧгілердеңер чоохтасхабыс.
– Кӧрік айының халғанҷы кӱннерінде компенсация тӧлеглері суриина чарыдылған штаб чыылиин иртіргебіс. Анда ветеринар правилоларын сайбаан кізілерге чох иділген мал ӱчӱн тӧлегні пирер-пирбезін Хакас Республиканың правительствозы паза Россияның аал хонии сыныхтаа устанызы пӧгерге кирек тіп чарадығ алғабыс. Олар компенсацияларны пирерге, пирбеске алай чардыхти тӧлирге чарадығ алыбызарға киректер. Чарадығда ідӧк республиканың юстиция паза финанстар министерстволары хол салыбызарға киректер. Амды піс хайдағ чарадығ алыл парарын сағыпчабыс, – теен Сергей Иванович.
Аал хонии паза ас-тамах министрі мал тутчатханнар хайдағ сайбағлар иткеннеңер искірген. Компенсация ал полбааннарның кӧбізі малларын хоныхты санға алҷаң книгазар пічікке кирбеен. Аннаңар мал ээзі полчатханын киречілеп полбаан. Піреезі ағырығ сығысхан аалда малын, ибде тутпин, сығар турҷаң. Іди ағырығ мал аал аразынҷа чӧрчеткені сығысхан. Узелковай дерматит чуғынҷах тарапчатханда, малларға пу ағырығдаң тоғыр вакцина турғыстырарға ынабаан кізілерге ідӧк компенсация ахчазы тӧлелбинче.
– Вакцинация соонаң маллар кӧдіртібісчелер тіп сылтанғаннар кізілер. Че сынында олар мал азии чохтаңар алай хомайдаңар кӧдіртібісчелер.
Піс, чуртағҷыларнаң тоғазып, ол санда компенсация ал полбаан кізілернең, хайдағ сылтағнаң ол пирілбеенін чоохтап пиргебіс. Че тӧлегні алып аларға ізеніс пар. Анзын тус кӧзіт пирер, чарадығ алыл парарын сағып аларға кирек. Піснең чараспинчатхан кізілер чарғызар айланзыннар тіп чоохтаам. Чарғы алған чарадығны толдырарбыс, – теен Сергей Труфанов.
Автор :
Оксана Челтыгмашева
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
