Ӱгредіг киреенің таңдағызы чииттернің холында
24.04.2024
Хабарлар
Марығ араласчылары
Марығ. Хакасияның ӱгредіг тилізі паза квалификация кӧдірҷең институдында «Чиит ӱгретчі-2024» марығның халғанҷы чардығы ирткен
Марығны Хакасияның ӱгредіг паза наука министерствозы республиканың ӱгредіг учреждениелерінде істенчеткен чиит, чайаачы ӱгретчілерні табар паза оларға хабазар пӧгіннең иртірче. Пастағы чардыхха араласчылар уроктың паза ӱгредіг киреенің ӱзігін, видеоға суурып, ызарға кирек полғаннар. Пӱӱл анда аралазардаңар тиксі 37 сурыныс пічии кірген. Анзы марығ иртірілчеткен чылларға иң улуғ кӧзідіг тіп таныхталған.
Оларның санынаң ікінҷі чардыхта аралазарына алты кізі табылған – пизінің адын жюри адаан, алтынҷызы ВКонтакте соцсетьтегі «Хакасияның чиит ӱгретчілер пірігізі» ӧмезінде ирткен ӱн пиріс хоостыра табылған. «Методический аукцион» тіп адалған чардыхта араласханнар: Татьяна Куюкова, Н. Ф. Катановтың адынаң национальной гимназия-интернаттың англия тілі ӱгретчізі; Олеся Каменщикова, Ағбандағы 12 № школаның биология ӱгретчізі; Алина Матвеева, Ағбандағы 19 № школаның англия тілі ӱгретчізі; Наталья Скрипникова, Харатастағы гимназияның пасталығ класстар ӱгретчізі; Юлия Соломатова, Кӧк хайадағы школаның орыс тілі паза литература ӱгретчізі; Яша Хрикули, Ағбандағы 31 № школаның физкультура ӱгретчізі.
Чиит ӱгретчілерге читі минута аразына тоғыстарында тузаланчатхан ӱгредіг оңдайларынаңар чоохтирға киректелген. Ам палалар ӱгренерге дее, книгалар хығырарға даа пір дее хынминчалар тіп удаа истерге чарир. Аннаңар ӱгретчілерге оларны ӱгреніске тартып алар, чидіглерге чидерге кӧӧктірер ӱчӱн улуғ тоғыс апарарға килісче. Хайди кӧзіткен марығ, полған на ӱгретчі ӱгренҷілерінің хайиин пос оңдайынаң тартча: кем-де саннығ технологияларнаң ӧткін тузаланча, кем-де олғаннарны, ӧмее піріктіріп, істезігліг тоғыс апарарға кӧӧктірче, ӱзінҷізі палаларны уроктағы тусты, орта чарып, тузалығ иртірерге ӱгретче паза даа пасхазы. Чоох тутхан соонаң марығ араласчылары чарғыҷыларның сурығларына нандырғаннар.
Таныхтирға кирек, чиит ӱгретчілерні чарғыҷыларның ікі ӧмезі паалаан: чарғыҷылар кнезі, Хакасияның ӱгредіг паза наука министрінің орынҷызы Елена Конева, ӱгредіг тилізі паза квалификация кӧдірҷең институттың проректоры, педагогика наукаларының кандидады Елена Логинова, чиит ӱгретчілер пірігізінің кнезі Анна Борисова паза ӱгредіг киреенің пасха даа специалисттері кирілген ӧӧн чарғыҷылар паза ӱгренҷілердең пӱтчеткен чарғыҷылар.
Марығ салтарларынҷа ӱзінҷі орын Татьяна Куюковаа пирілген. Татьяна Сергеевна Кемеровтағы институтты тоосхан соонаң гимназияда ікінҷі ле чылы тоғынча. Позы ол Асхыстаң. Школада ӱгренчеткендӧк, англия тілі аны аптап алған. Уроктардаң пасха ол тіл курстарына чӧрген. Пастап тілбесчее ӱгренерге сағынған, че пола-пола чиит хыс пілістерінең ӱлезерге сағыныбысхан. Іди ол ӱгретчі профессиязын таллап алған. Татьяна Куюкова ирткен чылда пу марығда араласханох, че финалға сых полбаан. Пӱӱл, тізең, сыйыхтығ орынға турысты.
Ікінҷі орында Наталья Скрипникова пол парған, пастағы орынны Олеся Каменщикова холға кирген. «Ӱгренҷілернің тании» дипломнаң Юлия Соломатова таныхтатхан. Сыйыхтығ орыннарға турысханнарға Хакасияның ӱгредіг министерствозының дипломнары паза ахчалығ сертификаттар читірілген. Пасха даа араласчылар Россияның ӱгредіг профсоюзының, Хакасияның чиит ӱгретчілер пірігізінің ӧнетін сыйыхтарын алғаннар.
Сом Дмитрий Сунчугашевти
Автор :
Татьяна Кыштымова
| Пн | Вт | Ср | Чт | Пт | Сб | Вс |
| 30 | 31 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
