Тоғызына хынчатхан кізі хаҷан даа чахсы істенче
19.04.2024
Хабарлар
Наталья Шулбаева
Хосхар айының 21-ҷі кӱнінде – Орындағы пос устаныс кӱні. Ол ӱлӱкӱнге удур Наталья Шулбаеванаң чоохтазып аларға ӱлӱс тӱскен
Ол Мадыр аал чӧбінде 30 чылға чағын тоғын салған. Аның чітіг сағызында кӧп ниме пик тудылча, ол ӱлесче:
– 1986 чылда орғах айының 18-ҷі кӱнінде мині аал чӧбі устағ-пастаанзар чааҷы учёдын апарарға хығырғаннар, ідӧк мин паспорт столын апарғам. Пічіктернең тоғынарға минің кӧңніме кірген, ол тоғысха мин читі чыл чарыт салғам. Анаң муниципальнай службаа тартылғам, пастағы категориялығ специалист пол парғам. Аймах кӧстеглерҷе тоғыс апарарға килісчең: делопроизводство, архив, статистика, чурт фонды, сан пирістер... Юрист тее тоғызын толдырҷаңмын. Кӧзідімге алза, регион законнары сыхса, аны хоостыра пос пічіктерін сығарарға кирек, іди 2003 чылда муниципальнай пӱдістердеңер наа закон сыххан. Ағаа хоза депутаттар чӧбінің пічіктерін апарҷаңмын. Чуртағҷаа пірее пасхаҷыл справка пирчетсе, он хати сағынып, прай нимені орта пазарға кирек. 15 чыл Мадырдағы участковай табығ комиссиязының устағҷызы полғам, хайдағ-да чылда табығ бюллетеньін хакас тіліне тілбестирге чахығ пиргеннер, аннаң хараа тооза одырғам.
Илееде чыл тоғын салған сылтаанда Мадыр аал чӧбіндегі тураларның номерлері, кем хаҷан тӧреені Наталья Алексеевнаның сағызында ам даа халған. Хада тоғынчатханнарға ол хаҷан даа чахсы кӧзідім полҷаң, чаҷыннары ипти чатчаң, тоғызын чапчаң толдырҷаң. «Пір хати «Хакасэнерго» ОАО-даң ипчі килген, ағаа чир участогы хоостыра чарадығ кирек полған, мин ағаа табырах тимнеп пиргем, ол андағ ыраххы аал чӧбінде іди иптіг тоғын парчатханына хайхаан. Республика прокуратуразынаң пістің аймах прокуратуразынзар сығдырадып, чоохтанҷаңнар: «Шулбаеваа теңмеңер, ол прай пічіктерні орта толдырча, тузында ызыбысча». Паза миннең сурынҷаңнар аал чӧбінің специалисттерін тоғырланыстарға орта нандырарға ӱгредерге».
Хада тоғынғаннарынаң Наталья Алексеевна ам даа пик палғалыс тутча. «Ӧменең піс субботниктерге сыхчаңмыс, ӱлӱкӱннерні ынағ таныхтаҷаңмыс. Миннең хада тоғынғаннар: Инна Олеговна Сидеева, Любовь Владимировна Пастернак, Олег Степанович Токчинаков, Елена Геннадьевна Крехтунова. Олар тоғыстарын пӧзік синде толдырҷаңнар, амғы туста мин чіли тынаға парыбысханнар, піс, удур-тӧдір ааллас чӧріп, удаа тоғасчабыс». Тӱзімніг істенізі ӱчӱн Наталья Шулбаева Таштып аймаа устағ-пастааның, Хакасияның юстиция министерствозының, республиканың архивтер кирее комитедінің алғыстас пічіктерінең сыйыхтатхан.
Наталья Алексеевна, тынағда даа полза, ай-тыс пілбинче. Кӧп чахайах одыртча, иб аразында хайынып маң чохха тӱсче. Ӱс палазы ӧс парыбысхан даа полза, пархаларына хайығ саларға кирек. Паза ипчі 2020 чылда шорлар общиназын тӧстеп алған, «Чылтыс» адалча, андар 58 кізі кірче. Пылтыр общинаның олғаннарын Санкт-Петербургсар апар килген, ахчанаң республика пазы Валентин Коновалов, национальнай паза территориальнай политика министерствозы, идінҷектер, олаңай чуртағҷылар хабас пиргеннер. Ідӧк Новокузнецксер чорых полған, анда, шорлар чыылиинда аралазып, чайаачы номернең сыхханнар, пасха даа чорыхтарда удаа аралазарға килісче. Мындағ ӧткін устағҷынаң «Чылтысты» улуғ чидіглер сахтапча, неке.
Сом авторни
Автор :
Тарина Бутонаева
| Пн | Вт | Ср | Чт | Пт | Сб | Вс |
| 25 | 26 | 27 | 28 | 29 | 30 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
