Пу сурығны соона салдырбин пӧгерге
19.04.2024
Хабарлар
Ӧӧркі Чӧп. Хакасияның Ӧӧркі Чӧбіндегі хазых хайраллирынҷа эксперт чӧбі чыылиинда республикада чааҷы госпитальын паза реабилитация иртчең инфраструктура тӧстирі ӱзӱрілген
Пӱӱнгі кӱнде республиканың имнег учреждениелері ОМС-ча полызығны аймах сылтағларнаң чааҷы службазын тоос салған СВО араласчыларына ла пирчелер. Службадағы чааҷылар, тізең, реабилитацияны хазнаның арачыланыс министерствозы пастыра ла иртчелер. Ағбанға иң чағын госпиталь 400 километр оортах орныхча – Хызылчарда. Аннаңар регионға реабилитация иртчең инфраструктураны амох тӧстирге кирек, чааҷыларға пӧзік квалификациялығ имнег полызиин пирер ӱчӱн. Ӧнетін чаа операциязы тоозылза, олар прайзы ибзер айлан сығарлар нооза.
«Ӧнетін чаа операциязы тоозыл парар. Чӱзерлеп оол, хайзы амды пістің ӱчӱн чааласча, ибзер айлан килер. Республика оларны удурлирға тимде поларға кирек: реабилитация иртіреріне паза оларны амыр чуртасха кӧніктіреріне. Пу сурығны соона салдырбин пӧгерге кирек. Эксперт чӧбінің пӧгіні – пірге кӱстеністернең, сағыс-кӧрістернең, чарадығларнаң паза тоғыснаң СВО араласчыларына имнег реабилитациязын иртчең паза хазыхтандырҷаң мероприятиелер комплексін тимнеп салары. Ол санда оларның сӧбірелеріне, оларға полызығ ідӧк кирек», – таныхтаан Ӧӧркі Чӧп кнезі Сергей Сокол.
Сергей Сокол прай саннарны санабызарға, тоғыныбызарға паза полызығ пирҷең килкім комплекстіг программа тӧстеп саларға киректелчеткенін таныхтаан.
Эксперттер паза хығыртылған аалҷылар, чааҷылар пір саңай айлан сыхса, республика реабилитация полызиин пиреріне сыданмас тіп таныхтааннар. Имнег кадрлары, ол санда реабилитологтар, психологтар, чидіспинчеткені ол сидіксіністі улғаадар. Андағ профессиялығ пір специалистті тимниріне ікі чыл киректелче. Ідӧк республикада лицензиялығ имнег учреждениелері тың кӧп нимес. Оларның санын алғыдыбызарына миллионнар ахча киректелер – имнег тураларын кирек оборудованиенең тиріндірерге паза специалисттер табарға.
Чӧптер аразында реабилитация иртчеткеннерге алынҷа истіг палаталар азарға, имнег полызығлары ӱчӱн тарифтерні хати кӧрерге, санаторий-курорт полызығларын Харатастағы А.И.Лебедьтің адынаң социальнай-хазыхтандырҷаң кінде пирерге: пір саңай аймах-пасха профильліг нинҷе-де смена тӧстирге.
Тоғысты паза пӧгіннерні паалааны эксперттерні Хакасияда чааҷы госпитальын азардаңар сурығҷа тоғынып пастирға киректелчеткеніне ағылған.
«СВО ветераннары паза матырлары, пістің чааҷылар, ибзер айлан килзелер, арачыланыс министерствозы пастыра пирілчеткен имнег полызиин мында ал полбастар. Че олар аны кирексирлер. Реабилитация иртерге нинҷе-де чӱс километр ырах парары кӧбізіне сидік полар. Минің кӧрізімнең, арачыланыс ведомствозынаң пу сурығ хоостыра тоғынарынҷа ӱс регионның кӱстенізін піріктірібізерге чарир. Хакасиядағы госпиталь пістің оолларға ла нимес, ідӧк хонҷых Туваның паза Хызылчар крайының пістің республикаа чағын аал-городтарының – олох Минсуғның паза Минсуғ, Хураған, Ермаков аймахтарының – айланған чааҷыларына полызығ пирҷең кін полыбызар», – салтар иткен Хазна Думазының конкуренцияны арачылирынҷа комитедіндегі эксперт чӧбінің араласчызы Андрей Тенишев.
Эксперт чӧбі чыылииның салтарларынҷа пу пастағ хоостыра Хакасия правительствозынаң хада тоғыныбызарға паза аны Россияның арачыланыс министерствозынзар ызыбызарға чарадығ алылған. Аннаң пасха, СВО араласчыларына паза оларның сӧбірелеріне имнег реабилитациязын иртчең паза хазыхтандырҷаң комплекстіг программаны тимнеп саларға. Ол программаны, тусты паза нандырығлығ полчатханнарны кӧзідіп, закон пастыра тыыт саларға чаратханнар.
Сом Ӧӧркі Чӧп сайтынаң
Автор :
Хакасияның Ӧӧркі Чӧбінің хабарлар пӧлии
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
