Істеніс рыногындағы ярмарка
17.04.2024
Хабарлар
Вакансиялар ярмарказының араласчылары
Тоғыс сурии. Хакасияда хосхар айының 12-ҷі кӱнінде «Тоғыс Россияда. Тоғыс табар оңдайлар тузы» тиксі Россияның вакансиялар ярмарказының регион синіндегі чардығы ирткен
Пу алғым мероприятие пістің хазнаның прай регионнарында пір саңай иртірілче. Тиксі Россия ярмарказы – «Демография» нацпроектче иртірілчеткен мероприятие. Хакасияда ирткен неделяда ол ярмарканың регион синіндегі чардығында чуртағҷылар істеніс рыногынаң алты аал-городта танысханнар: Ағбанда, Харатаста, Саяногорскта паза Хубачар, Асхыс, Шира аалларда. Іди ол республикада ікінҷі чылы изере иртіріл парир. Пӱӱл анда тиксі ікіҷе муң кізі араласты. Ол санда тоғыс пирчеткен 63 организация полған, олар 2,5 муңҷа пос тоғыс орнынаң таныстырғаннар.
Ағбанда чуртағҷылар тоғыс орыннары ярмарказына Л.Р.Кызласовтың адынаң чир-суғ ӱгренҷең музейде 10.00 часта чыылызып пастааннар. Музейнің ікі хадылында кӧп чон хайынған. Пастағы хадылындағы фойеде илееде стол турғызылған, полғанының на кистінде ноо-да предприятиенің алай организацияның специализі тоғынған. Олар тоғыс чох алай наа тоғыс орнын тілепчеткен улуснаң чоохтазығлар иртіргеннер, организацияларынзар хайдағ тоғысха кізілер киректелчеткеннеңер чарыда чоохтап турғаннар. Тоғыс тілепчеткен кізее пу пір ле ачыхта тоғыс хоостыра нинҷе-нинҷе организациянаң танызып алар оңдай полған. Аархы фойеде, профессияларнаң таныстырып, консультанттар чииттернең, ол санда улуғ класстардағы ӱгренҷілернең, студенттернең тоғыс ӧткін апарғаннар. Кӧзідімге, пастағы андағ тоғазығ репортёр тоғызына чарыдылған.
Аймах профессияларнаң таныстырарынҷа презентация аннаң андар ікінҷі хадылындағы фойеде узарадылған. Чииттерге пӧзік паза ортымах ӱгредіг организацияларынаң танызып алар оңдай полған. Оол-хыстар хайдар ӱгренерге парҷаң тіп сурыға нандырығ табарға кӱстенгеннер. Орындағы вузтар, колледж-техникумнар матап тимнен килтірлер, буклеттерін сыйлап, постарының ӱгредіг программаларынаңар искіргеннер. Андох аймах мастер-класстар иртір турғаннар. Кӧзідімге, андағ устар кӧзідии тузында Ағбандағы пӱдіріг техникумындағылар стенелерні хоостығ трафарет полызиинаң шпаклёвканаң хайди чахчатханнарын кӧзіткеннер. Ол оңдайнаң техникум оол-хыстарны «Істіндегі пӱдіріг паза декоративнай тоғыстарның узы» тоғысчы специальнозынаң таныстырған. Мының алнында пу специальность «Штукатур-маляр» адалҷаң.
Паза устар ӱгредиин уғаа ӧткін апарғаннар Олимп резерві училищезіндегі (техникумдағы) ІІІ курстың студенттері. Олар ӱс тее кӧстегҷе мастер-класс иртіргеннер. Данил Дубасов ӧрт ӱзірҷең тиріглернең таныстырған арада оларнаң хайди орта тузаланардаңар чарыда чоохтап турған. Ол ӧрт ӱзірҷеңнернің пӧлиинде ӱгренчеткен студент. Аннаң хости тоғынған спортнаң айғасчатхан кӱлӱк оол Виталий Строков. Ол дзюдоҷа спорт узына кандидат, пу кӧрімҷе Сибирьдегі федеральнай округтағы турнирнің призёры, тиксі Россиядағы турнирнің паза чоннар аразындағы пір кӧрімніг кӱресче фестивальның чиңісчізі. Ярмаркада спорт пӧлии ӱчӱн нандырығ тудып, ол «Адаптивная физическая культура» паза «Физическая культура», «Спорт» специальностьтардаңар чоохты хынып апарған. Чиит оол ойда салылған чалбах игір чардыҷахта аар-пеер чайхалчатхан аразында азах узында пик тур халарға алай аннаң орта аңдарыларға ӱгреткен. Тӱгее чіли кӧмес пӱгіл парған чардыҷах «Sibbord» адалча.
– Кӱресте пісті, спортсменнерні, иң не пурун орта аңдарыларға ӱгретчелер. Ит-сӧӧкті пиртіндірбин орта аңдарылары – ӱгредігнің ӧӧні. Анаң на хайди «ыырҷыны» аңдара тастап аларына, кӱстіг полыбызарына ӱгретчелер, – сағыстарынаң ӱлескен студент.
Ікінҷі хадылдох «Финансовай піліс», «Істеніс законодательствозының ӧӧні», «Идінҷек полыбызарға оой» темаларҷа лекциялар иртірілгеннер.
Ярмарканың сала орай пасталған пайрамнығ чардығына чон пастағы хадылда чыылысхан. Кибір хоостыра андағ улуғ мероприятиеде хайди даа улуғ пастыхтарға чоох тударға килісче. Андағ ӱлӱс тӱскен республиканың істеніс паза социальнай арачыланыс министрі Татьяна Раменскаяа. Хайди таныхтаан чооғында Татьяна Николаевна, пылтыр мындағ ярмарка тузында 300 азыра кізее тоғыс таап аларға оң полған. Пу чыл чуртағҷыларға ідӧк алғым программалығ мероприятие тимнелген. Оларға тоғысха кіріп аларға, предприятиелерге постарына тоғынҷыларны таап аларға талаан ползын тіп алғаан. Паза пӱӱл тоғыс тілепчеткен улусты республикадағы аймах-пасха предприятиелернің тоғызынаң таныстырарын узаратчалар, хосхар айының 9 – 12 кӱннерінде оларға производстволарда ӧнетін экскурсиялар иртіргеннер, ол санда «Абаканвагонмаш», «Абазаэнерго» предприятиелерде, Харатастағы кондитерскай концернде паза даа пасхазында.
«РЖД» ОАО-ның Ағбандағы тимір чол дистанциязының кадрларҷа ӧӧн специализі
Татьяна Бейсембиева тоғыс тілепчеткеннернең чоохтасчатхан туста
Ағбандағы вакансиялар ярмарказында пӱӱл тоғыс пирчеткен 20 азыра организация араласхан тіп таныхталған. Оларның пірсі Ағбандағы тимір чол дистанциязы полча. Пу организация – «РЖД» ОАО-ның холында тоғынчатхан Хызылчардағы инфраструктура дирекциязының пӧлии. Ярмаркада пу организациязар кізілерні тоғысха аларынҷа сурығнаң айғасхан кадрларҷа ӧӧн специалист Татьяна Бейсембиева. Аның чооғынаң, предприятиезер ӧӧнінде «тимір чол монтёры» профессиялығ чон киректелче, андағларға 10-ҷа тоғыс орны пар. Тоғысчылар чидіспинчеткен сидіксініске 2023 чылның халғанҷы айынаң урун сыхтырлар. Пастағы сылтағ – пу аар тоғыс. Тоғысчылар, рельстерні, шпалаларны алыстырып, тимір чолны тыхтапчалар, оларға тасхар соохта соох тібин, ізігде ізіг тібин, чилде, наңмырда, хар чаапчатса даа істенерге килісче. Ікінҷі сылтағ – чал ахчазы. Организациязар тоғысха официально алылчалар, аннаңар істеніс книжказы хайди даа киректелче. Хакасияда чал ахчазына «северная надбавка» адалчатхан 30 %-тіг хоза тӧлег кӧріл парған. Че тоғынҷының істеніс стажы чох полза, 30 часха читкелек кізее аны 1,5 чыл тоғын салза ла тӧлеп сығарлар, че 30 час ас парыбысханнарға – пис чыл пазынаң на. Анзы чал ахчазына кӧнізінең теелче нооза. Ідӧк чал ахчазы сині тимір чолның ноо участогында тоғынчатханынаң паза пасха даа хоза тӧлеглернең палғалыстығ полтыр. Кӧзідімге, линейнай участоктағы монтёрларның чал ахчазының ортымах сині 50 – 60 муң салковай полза, стаж чох чиит тоғынҷының чал ахчазы 35 – 40 муң салковайға тиңнелер. Монтёрларға премия сині 80 % тӧлелчеттір. Пу тоғысха ӧнетін ӱгредии дее чох кізілерні алчабыс тіпче специалист. Хынза ол Ағбандағы алай Хызылчардағы ӱгредіг кінінде 2,5 ай ӱгреніп алар. Ол ағаа командировка чіли саналчаттыр. Ӱгредіг паза общежитиеде чуртапчатхан ӱчӱн позы ахча хорадынминча, ағаа хоза, организация суточнай даа, чал ахчазын даа тӧлепче. Ідӧк чол ахчазы тимір чолда аар-пеер тикке полар. Че азыранарға пос ахчазын хорадынарға килізер.
Ярмарка тузында «Абаканвагонмаш» предприятиезер илееде кізі тоғыс сурап айлан турған. Анда кӧп вакансияа тоғынҷылар киректелчелер. Аннаңар искірген предприятиенің кадрларҷа ӧӧн специализі Елена Якимова. Ол тоғыс орыннарынаңар искіріглер чонға тоғыс тапчаң службаның сайтында сыбыра пирілчеттір. Ӧӧнінде поезд вагоннарын тыхтаҷаң слесарьлар, автомат паза полуавтомат машиналарына электрогазосварщиктер, стропальщиктер паза сырлаҷаң устар киректелчелер. Тоғысха опыттығ паза ӧнетін ӱгредігліг чонны кирексіпчелер. Предприятие алғып одырча, кӧп чахығҷа тоғынча, аннаңар істенҷілер саны даа хозылча, оларға кирексініс сыбыра ӧслече. Ярмаркада пу сурығны пӧгер ізеніснең араласчабыс тіп таныхтаан специалист.
Сомнар Альбина Чистогашевани
Автор :
Инора Боргоякова
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
