Ӱгретчее посха «кӧйерге» кирек
17.04.2024
Хабарлар

Марығ араласчылары (сол саринаң) Оксана Чанкова, Оксана Прощенко, Александр Глухов, Анна Борисова, Виктория Андреева
Марығ. Ағбандағы 31 № школада «Чыл ӱгретчізі-2024» марығның республика сині ирткен
Пӱӱл пу марығ хазнабыста 35-інҷі хати иртірілче. Тиксі республика синіндегі марығның пастағы чардығында прай муниципалитеттердең 14 ӱгретчі араласхан. Оларның санынаң халғанҷы чардығына пис кізі сыххан: Ағбан пилтіріндегі М.Е.Орловтың адынаң школаның орыс тілі паза литература ӱгретчізі Оксана Прощенко, Харатастағы 5 № школаның пасталығ класстар ӱгретчізі Виктория Андреева, Таштыптағы 2 № школаның физика ӱгретчізі Оксана Чанкова, Ағбандағы 9 № школаның тархын паза обществознание ӱгретчізі Анна Борисова, Сорсктағы 3 № школаның обществознание ӱгретчізі Александр Глухов.
Марығның республика синінде ӱгретчілерге мастер-класс кӧзідерге паза «Ӱгретчее сурығ» сыныхтағны иртібізерге кирек полған. Араласчыларны чарғыҷылар паалааннар. Оларның санына Хакасияның ӱгредіг паза наука министрінің тоғызын толдырчатхан Анатолий Бутенко, аның орынҷызы Елена Конева, Россияның чон ӱгредии паза наука тоғынҷыларының пірігізінің республикадағы пӧлиинің кнезі Любовь Барабанова, Хакасияның ӱгредіг тилізінің паза квалификация кӧдірерінҷе институдының проректоры Татьяна Половникова, ӱгретчілер марииның ирткен чыллардағы чиңісчілері Максим Дэка, Андрей Колоухов, Татьяна Немцева паза пасхазы даа кіргеннер. Ідӧк ӱгретчілерні ӱгренҷілер чарғыҷылары паалаан. Андар аймах олимпиадаларда, марығларда, школа чуртазында ӧткін араласчатхан олғаннар кирілгеннер.
Марығ тузында ӱгретчілер ӱгренҷілернең апарчатхан тоғыстарын, тузаланчатхан ӱгредіг оңдайларын прай саринаң кӧзідерге кӱстенгеннер. Олар пілістерін тӧреміл тиліт турарға, амғы туста чуртасха кирілчеткен наа технологияларнаң тузалан поларға, ідӧк тиксі хазна синінде прай школа тоғынҷыларының алнында турғызылчатхан наа пӧгіннерні толдырарға киректер. Марығ араласчылары, уроктарға тимненчетсе, нейросетьтернең ӧткін тузаланчаттырлар. Аның полызиинаң олар хазна, наука тилізіне улуғ хозым иткен саблығ кізілерні «тірілдірчеттірлер». Кӧзідімге, І Пётр олғаннарға хазнада иртірген алызығлардаңар, оларның пӧгіннерінеңер чоохтапча алай ба В.Маяковский кибелізін хығырча. Сын ӱгретчі, олғаннарны ӱгреніске тартар ӱчӱн, позы «кӧйерге» кирек тіп таныхтааннар ӱгретчілер.

Марығ чарғыҷылары
Марығ соонаң жюри, пір чӧпке киліп, чиңісчінің адын адаан. Оларның чарадиинаң пастағы орын Анна Борисоваа пирілген. Ікінҷі орынға Александр Глухов турысхан, ӱзінҷізіне – Виктория Андреева. Марығның халғанҷы чардығының араласчыларына Хакасияның ӱгредіг паза наука министерствозының дипломнары, марығ нанҷыларының сыйыхтары читірілген. Сыйыхтығ орыннарға турысханнар ахчалығ сертификаттар алғаннар. Анна Васильевна амды республикабыс ӱчӱн Россия синіндегі марығда турызар. Анатолий Бутенко, чиит ӱгретчіні алғыстапчадып, ағаа Дмитрий Тодышевтің 2002 чылдағы чидиине чидерге алғаан. Андада Дмитрий Александрович, Россия синіндегі марығда чиңіп, Хакасиязар «Пеликанны» ағыл килген.
Сомнар Дмитрий Сунчугашевти
Автор :
Татьяна Кыштымова
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 1 | 2 |
Кӱн таңмазы
Хакасияда
Россияда
Тилекейде