«Россия» кӧзідігні 10 миллионынҷы аалҷы кӧрді
12.04.2024
Хабарлар
ВДНХ. Хосхар айының 6-ҷы кӱнінде «Россия» кӧзідіг-форумда пайрамнығ он миллионынҷы аалҷы полды, ол – Ярославль городтың чуртағҷызы Константин Панфилов
«Піс кӧзідігде пастағызын на араластыбыс. Сағыбаан чапсых сыйыхнаң таныхтатханына тың ӧрінчебіс», – теен Константин Панфилов. «Харын, піс пу туста пеер килгебіс», – хозылған ипчізі Екатерина.
Константинге паза Екатеринаа «Россия» чидіглер кӧзідии дирекциязы» АНО-ның паза «Росатом» хазна корпорациязының сертификады читірілген. Аны хоостыра ирепчі Мурмансксар тынанарға парар. Анда «Ленин» атом ледоколын кӧріп аларлар. Ол тилекейде ядернай энергетика тирігліг иң пастағы судно полча. Паза «Атомфлот» атом ледоколларынаң айғасчатхан предприятиеде поларлар. Аннаң пасха, чорых тузында Панфиловтар саблығ Кольскай атом чарытхы станциязынаң танызарлар. Алында сӧбіре орыс Северде хаҷан даа полбаан.
«Хосхар айының 4-ҷі кӱнінде тоғызыбыс пасталғаннаң пис ай толған. 6-ҷы кӱнінде кӧзідігні кӧрерге он миллионынҷы аалҷы кірген. Ноға ВДНХ-дағы кӧзідіг піди сабланча? Аны тиксі Россия иртірче. Піс, хазнаның чуртағҷылары, пірігізіп алып, поғдархазыбысты прайзына кӧзітчебіс. Мында хыныс паза улуғлас чуртапча, олар кізіні тартчалар. Пу кӱннерде кӧзідіг наа, улуғ паза чарых часхы-чайғы программанаң таныстырар. Пістің ам на прай ниме пасталча!» – таныхтаан «Россия» чидіглер кӧзідии дирекциязы» АНО-ның ӧӧн директоры Наталья Виртуозова.
Пайрамнығ аалҷаа Мурманскча алғым экскурсия иртірерлер, Териберка аалзар апар килерлер. Чорыхтың тӧстегҷілері Панфиловтар сӧбірезіне Ярославльдаң сығара чол ахчазын тӧлирлер паза чуртаҷаң орын пирерлер.
«Чорых чапсых паза уғаа тузалығ полар. Пӱӱл улуғ хырлас айының 3-ҷі кӱнінде «Ленин» тилекейдегі пастағы атом ледоколында хазна флагын кӧдіргеннең пеер 65 чыл толар. Ол атом ледоколы флодының тӧреен кӱніне саналча. Сірер тархын суднозын паза тоғынчатхан ледоколны кӧріп аларзар. Ідӧк флотнаң хайди устапчатханын кӧзіт пирерлер. Пу чорых сағыстарыңда хаҷанға даа халар паза чуртасха кӧрістеріңні алыстырар», – теен «ГлавСевморпуть» ФГБУ-ның ӧӧн директоры Сергей Зыбко.
Алында, кӧрік айының 20-ҷі кӱнінде, 9 миллионынҷы аалҷы Пӱрӱт чирінің чуртағҷызы Андрей Баторов полған, олох айның 6-ҷы кӱнінде 8 миллионынҷы аалҷы – 14 частығ Вадим Лейзер (Тюмень). Азығ айының 22-ҷі кӱнінде «Россия» кӧзідігде 7 миллионынҷы аалҷы пол парыбысхан, ол – Волгоград облазындағы Волжский городтың чуртағҷызы Алексей Максимов. Олох айның 4-ҷі кӱнінде кӧзідіге 6 миллионынҷы кӧрігҷі, Москва городтың чуртағҷызы Дмитрий Ершов килген.
5 миллионынҷы аалҷы кӧзідігде кӱрген айының 17-ҷі кӱнінде таныхталған. Андада ВДНХ-да Курган облазындағы Катайск городтың 7 частығ чуртағҷызы Полина Дмитриева іҷе-пабазынаң хада полған. Наа чыл ӱлӱкӱннерінде, кӱрген айының 5-ҷі кӱнінде, кӧзідігнің 4 миллионынҷы аалҷызы Туладағы Дарья Молодцова пол парған. Барнаулның чуртағҷызы Алексей Козырев, хазнаның ӧӧн городынзар чидіп, «Россия» кӧзідігнің 3 миллионынҷы кӧрігҷізіне саналча. 2 миллионынҷы аалҷы – Хазандағы Марат Сабитов, 1 миллионынҷы аалҷы – Пензадағы Светлана Сулейманова. Чарым миллионынҷы кӧрігҷі пылтыр кічіг хырлас айының 8-ҷі кӱнінде таныхталған, ол – Ростовтың 7 частығ чуртағҷызы Матвей іҷезінең хада.
Пайрамнығ аалҷыларға аарлығ сыйыхтар паза ыраххы чорыхтарға сыхчаң сертификаттар пирілчелер. Таныхтирға кирек, мындағ чахсы проект полызиинаң Марат Сабитов ипчізінең хада Сойан-Сус ГЭС-ты кӧріп алғаннар.
«Россия» чоннар аразындағы кӧзідіг-форум – хазнаның пір ачыхта чыылған ӧӧн чидии. Анда прай 89 регион ӧткін араласча. Ол ВДНХ-да пылтыр кічіг хырлас айының 4-ҷі кӱнінде азылған. Кӧзідіг от айының 8-ҷі кӱніне теере тоғынар.
Автор :
Тимнеен Татьяна Тютюбеева
| Пн | Вт | Ср | Чт | Пт | Сб | Вс |
| 30 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
