Ӱгредіг учреждениелері нааҷылалча
10.04.2024
Хабарлар
Новомихайловкадағы школада олғаннар робототехниканың ӧӧніне ӱгренчелер
Тоғыс чорығы. Ирткен неделяда Алтай аймаа пазы Ирина Войнова республика СМИ-ларының хабарҷыларынаң Тустығ кӧл паза Новомихайловка ааллардағы ӱгредіг учреждениелерінзер тоғыс чорығынаң чӧрген
Пу школалардағы паза олған садтарындағы алызығларны ідӧк Алтай аймааның депутаттар чӧбінің кнезі Александр Марачков кӧрерге чӧрген. Чорыхта ӱгредіг устанызының пастығы Лариса Гимазутина паза пасха даа специалисттер араласханнар.
Пурун аалҷылар Тустығ кӧл аалдағы школазар чол тутханнар. Анда 9 класс, ол Хубачардағы ортымах школаның филиалы полча. Пӱӱл анда аймах бюджедінең позыдылған ахчаа прай ізіктер алыстырылғаннар. Ирткен чылда школаның тасты нааҷылалған, чылығлалған. Істін иптирінҷе тоғыстар ідӧк апарылчалар, амғы туста кабинеттерзер мебель алылча. Школа хыринда наа спорт ачығы тӧстелген. Сілкер айында олғаннарға ойнаҷаң комплекс турғызылар тіп кӧрілче.
Ӱгреніске кирек ниме-ноо аларынаң пасха, школада ідӧк кружоктар паза секциялар хозылча. Тӱрчедең мында бокс паза холнаң тудысчаң секциялар тоғынып пастирлар. Наа ӱгредіг чылына школа студиязына колонкалар, микрофоннар, прожектор паза пасха даа кирек нимелер аларға пӧгінчелер. Ідӧк килчеткен чылда палаларға чиис тимнепчеткен, олар азыранчатхан орыннарны тыхтирға, полларны алыстырарға сағынчалар.
Тустығ кӧл аалның олған садында даа алызығлар илееде. Пӱӱнгі кӱнде пеер 30 пала чӧрче, ол олған садына чӧрерге чазы чит парған палаларның 100 проценті. Тиксі Тустығ кӧл аалда 400-тең сала асхынах чуртағҷы саналча. Амғы туста олған сады школа полған турада орныхча. 70 чыл аразына аның хыры иргілен парған, наңмыр ӧт сыххан. Аннаңар, чайғыны сахтабин, хырын амох алыстырарға чарадығ алылған. Тыхтағ тоғыстарын пӱдірігҷілер cілкер айына читіре тоос саларға молҷапчалар. Паза олған садының істі иптелер, чарытхы проводказы алыстырылар.
Ідӧк пӧгінде – ікі наа олған ачығын паза палаларға кӱннең чазынҷаң наа веранданы турғызары, сиден алыстырары.
Ирткен чылда Алтай аймааның устағ-пастаа ӱгредіг учреждениелеріне 60 наа ойын комплекстерін алған. Хырығы олған садтарына паза школаларға пиріл парған.
Новомихайловкадағы школа улуғ арах. 2022-2023 чылларда мында тӧрт кабинет, пищеблок, азыранҷаң орын тыхталған, наа кӧзенектер турғызылған. Пӱӱл, тізең, ізіктер алыстырылған. Школаның ибіркізін кӧр чӧрчеткенде, Ирина Войнова хабарҷыларның хайиин наа пӱдірілген гаражха айландырған. Ирткен чылда школаа автобус пирілгенде, аны турғысчаң орын кирек полыбысхан. Гараж пар полған, че автобус андар сыңминчатхан. «Хакасский элемент» кірпис заводы полызиинаң школа тоғысчылары аның стенелерін паза хаалхаларын нааҷылабысханнар.
Хайди таныхталған, Алтай аймааның устағ-пастаа олғаннарның хоза ӱгредиине кӧп хайығ салча. Іди Новомихайловкадағы «Алтын маска» школа театрына ноутбук, кӧг оборудованиезі, радиостанция алылар. Географиянаң айғасчатханнарға саннығ лаборатория, ӧнетін лупалар, компастар паза телескоптар алылчалар. Оборудование сілкер айының соонзар чидер тіп кӧрілче. Ідӧк ікі школада «Ӱгредіг» нацпроектче «Ӧзіс орны» паза «Саннығ ӱгредіг орны» кабинеттер азылған.
Амғы туста ӱгренҷілерні істеніске кӧӧктіреріне хазна синінде хайығ айландырылча. Аннаңар Ирина Войнова школа директоры Галина Еременконаң школа ӱӱҷігін тӧстирінеңер чӧптес салғаннар. Кирек чахсы парза, пастыхтар школаның ибіркізінде наа асфальт тӧзеп пирерге молҷааннар. Таныхтирға кирек, ирткен чылда «Хорбыҷах тикке» акцияҷа аймахха пирілген хорбыҷахтарны чонға ӱлебин салғаннар, оларны ӱгредіг учреждениелеріне пирібіскеннер. Амды полған на олған садының, школаның позының улуғ нимес сады пар.
Новомихайловкадағы олған садынзар 50-ҷе пала чӧрче. Ол мының алнындағы кӧзідіглердең ікіҷе хати артых тіп чоохтапча устағҷы Ольга Покацкая. Анзы садтың тоғынар тузын алыстырғанының сылтаа тіпче ол. Пӱӱнгі кӱнде олған сады 7.00 час иртеннең 19.00 час иирге читіре тоғынча.
«Ӱгредіг учреждениелерін тилідеріне піс кӧп кӱс салчабыс. Мында ахчадаңар ла чоох парбинча. Школаларзар, олған садтарынзар чӧрчеткен палаларыбыс пістің таңдағызы полчалар. Пӱӱнгі кӱнде піс социальнай инфраструктураны тилідеріне кӧп ахча хоратчабыс. Аалдағы ӱгредіг оңдайлары городтағыларнинаң пір дее халбазын тіп. Ідӧк ӱгретчілерге полызарға кӱстенчебіс, олар ӱгренҷілерін пӧзік чидіглерге читірзіннер тіп», – чоохтапча Ирина Войнова.
Алтай аймааның пазы мындағ чорыхтарны кибірге кирерге сағынча. Іди хабарҷылар пастыра устағҷы пасхаларын культура, ӱгредіг, социальнай учреждениелердегі чахсы саринзар алызығларнаң таныстырарға пӧгінче.
Cом авторни
Автор :
Татьяна Кыштымова
| Пн | Вт | Ср | Чт | Пт | Сб | Вс |
| 30 | 31 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
