Чирібіcте амыр ползын
05.04.2024
Хабарлар
Чыылығ Лев Сафьяновтың устаанынаң ирткен
Чыылығ. Пу кӱннерде Хакасияның национальнай паза территориальнай политика министерствозында чыылығ ирткен
Андар пістің республикадағы аймах нациялар диаспораларының устағҷылары хығыртылғаннар. Хакасияның национальнай паза территориальнай политика министрінің тоғызын толдырчатхан Лев Сафьянов, чыылығны асчадып, чоохтанған:
– Піс сірерні пеер тиктең не хығырбаабыс. Постарың пілчезер, Москва хыринда улуғ чобағ пол парған. Ыырҷы пістің чон аразында нация паза киртініс хоостыра ыырлас кирерге кӱстенче. Аннаңар сірердең сурынчам, постарыңның организацияларыңда кізілернең чоохтазыңар, сайбағлар полдыртпас ӱчӱн.
Уғаа чахсы полған, хаҷан теракт соонаң диаспоралар устағҷылары, Ағбандағы Чиңіc паркынзар киліп, Успас от хыринзар, ӱрееннерні хумартхылап, тіріг чахайахтар салғаннар. Аның ӱчӱн улуғ алғызым читірчем. Анзы уғаа орта кирек полған. Іди піс, пір хазнада чуртап, аймах нациялар аразында ынағлас парын кӧзітчебіс.
Алында сірер, Россия гражданнары полып, хазна президентінің табығларында ӧткін араласхазар. Ыырҷы ол табығларны сайбабызарға чоо кӱстенген нооза. Ол киректі ам даа тохтатпинча. Аннаңар Россияның прай даа регионнарында чонны террористтердең арачылир хоза мероприятиелер иртірчелер. Піске, ӧӧнінде, паза андағ хорғыстығ сайбағларны полдыртпасха, прайзына сизіктіг поларға кирек. Халғанҷы тустарда ыырҷылар, нинҷе-де ахча молҷап, олғаннарны сайбағ идерге интернет пастыра кӱстепчелер.
Ідӧк алғызым читірчем аймах диаспораларға, ӧнетін чаа операциязында араласчатхан пістің чааҷыларға гуманитарнай полызығлар ысчатхан ӱчӱн. Ол саринаң махтабызарға сағынчам азербайджаннар диаспоразын. Ізенчем, пу чӧрімні аннаң андар узарадарбыс...
Анаң республиканың істіндегі киректер министерствозындағы экстремизмнең тоғыр кіннің тоғынҷызы Роберт Кириллов нациялар аразында тартыстар полдыртпас ӱчӱн ниме идердеңер чоохтаан. Пастап олар мындағох чыылығны Россия президентіне табығлар алнында иртіргеннер. Амды, Москва хыринда улуғ сайбағ пол парғанда, национальнай диаспоралар устағҷыларына сизіктіг поларға кирек. Пеер наа ла килген чир-суғҷылары ӱчӱн нандырығлығ полчалар. Пірее сайбағ иділерін піл салзалар, сах андох МВД органнарына искірерге. Сынап, піле-тура искірбезе, ол кізі уголовнай нандырыға тартылар.
Пол парар іди, хаҷан пірее нациялардаң тоғыр сайбағлар идерге кӱстенерлер. Анзын ідӧк право хайраллаҷаң органнарзар искірерге кирек. Терроризмнің национальнозы чох поладыр. Аннаңар законҷа чарадылбаан книгаларны хығырбасха, проповедтер испеске паза чарабинчатхан организацияларзар чӧрбеске.
Олған садтарында алай школаларда национальность хоостыра тартыстар поларынаң сизіктіг поларға кирек. Оларны тузында тохтатпаза, соонаң улуғ ыырласха айлан парарға айабас.
Анаң нинҷе-де кӱн пазынаң Хакасияның национальнай паза территориальнай политика министерствозында Лев Сафьяновтың устаанынаң андағох чыылығ ирткен. Анда республикадағы религиознай конфессиялар устағҷыларынаң тоғазығ полған. Ӧӧн сурығ – хайди этническай пірігістерде сайбағлар киреенҷе профилактика тоғызын апарарға.
Религия хоостыра пірігістернің устағҷыларына, абыстарға пазырарға килген кізілернең чоохтазарға сидік нимес. Кізілер абыстарның ӱгредиин, киртініп, чахсы исчелер нооза. Россияда сайбағ итпинчеткен хайдағ даа киртініс чарадылча.
Пу чыылыға Хакасияның чааҷы комиссары Николай Видяйкин паза Ағбан городта чааҷы службазына хығыртчаң пӧліктің пастығы Вячеслав Козлов килгеннер. Олар Россия гражданнары пол парған кізілерні военкоматтарда санға турарын ундутпас киректеңер чоохтааннар. Пасха хазнадаң килген кізілер ӧнетін чаа операциязынзар пос кӧңнінең парзалар, Россия гражданствозын оой алып ал турарлар.
Полиция тоғынҷылары Роберт Кириллов паза Татьяна Тритенбах пасха хазналардаң тоғынарға килген кізілерге патент хайди алардаңар, нинҷе кӱн Россияда чуртирдаңар паза орыс тілінең сыныхтағлар иртірердеңер чоохтааннар. Сайбағ иткен кізілерні чирлерінзер федеральнай бюджет ахчазына ызыбысчаттырлар. Анаң ол кізі чарадылған нинҷе-де тус пазынаң пеер нандыра килерге сағынза, алында ағаа хоратхан ахчаны тӧлирге кирек полчаттыр.
Хакасияда чон амыр паза ынағ чуртапча, аннаңар хорғыстығ сайбағларны полдыртпасха кӱcтенерге кирек.
Сом Дмитрий Сунчугашевти
Автор :
Илья Топоев
| Пн | Вт | Ср | Чт | Пт | Сб | Вс |
| 28 | 29 | 30 | 31 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 1 |
Кӱн таңмазы
Хакасияда
Россияда
Тилекейде
