Хакасиядағылар – финалда
03.04.2024
Хабарлар
Хакасиядағы Поповтар паза Пушкарёвтар сӧбірезі
2024 чыл – Сӧбіре чылы. Хакасиядағы сӧбіре тиксі Россиядағы марығның финалына сығып алған
Пу наада Хызылчарда «Это у нас семейное» тиксі Россиядағы марығның чарым финалы иртірілген. Анда Сибирьдегі федеральнай округтағы регионнарның 185 сӧбіре командазы марығласхан, ол санда – Хакасиядағы алты ӧме. Сӧбіре чылына чарыдылған марығны иртірче «Россия – страна возможностей» коммерческай нимес автоном организациязы (АНО), ол президент платформазы полча.
– Сибирьде марығның округ синіндегі чардығының салтарлары иділгенде, 34 cӧбіре чиңіcчі полыбысхан. Олар СФО-дағы тоғыс регионның командалары. Сибирьдегі ынағ тудынчатхан пик сӧбірелернің хайзы-да сӧбіре бизнезінең айғасча, хайзы-да пос чонының кибірлерін паза культуразын хайраллапча, ас-тамах ӧскірче, ӱгретчілер династиялары паза кӧп палалығлар даа пар, – таныхтаан «Россия – страна возможностей» АНО директорының орынҷызы Оксана Ачкасова.
Финалға сығып алған командаларның санында – Хакасиядағы Поповтар паза Пушкарёвтар сӧбірезі. Оларның командазында алты кізі: сӧбіре пазы Павел паза ипчізі Анастасия, ооллары – 14 частығ Владимир паза 9 частығ Виталий, ууҷа Татьяна Анатольевна паза аның іҷезі Александра Андреевна. Прайзы сӧбіре марығларында ӧткін араласча, ідӧк хада спорт ориентированиезінең айғасчалар.
Сӧбіре командалары квизте хыйға пылазып марығласханнар, аймах ойыннарда устарынаң сынасханнар, мастер-класстарда холнаң аймах-пасха нимелер чайап, ідӧк род ағазын чайир устарын кӧзіткеннер паза пасха даа мероприятиелерде араласханнар.
– Піске уғаа хынығ сынағлар иртерге киліскен. Сойан-Сустағы ГЭС-тың македін пӱдірерінҷе тоғыс кӧңнібіске кірген, ол піске чағын полча нооза, – чоохтааннар Поповтар паза Пушкарёвтар сӧбірезіндегілер.
Пу улуғ марығның финалы чайғызын Москвада иртер. Чиңіcчілер пӱӱл 8 июльда – Сӧбіре, кӧӧленіс паза киртініc кӱнінде – чарлалар. Чиңісчі полыбысхан 30 сӧбірее 5 млн салковайға сертификат читірілер, финалда араласхан 300 сӧбірее – прай сӧбіренең чорыхтарға турист путевкалары.
Cом интернеттең
Автор :
Тимнеен Инора Боргоякова
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
