Пос киреене – пастағы хаалағлар
27.03.2024
Хабарлар
«Бизнес Юниорның» чиңісчілері (сол саринаң): Алина Ахметова, Герман Никитченко паза Захар Тимаргалеев
ПОС КИРЕЕ: асчабыс, тилітчебіс, парыстанчабыс
Марығ. Кӧрік айында Хакасияның «Минің пос киреем» кіні саарбахтар аразында «Бизнес Юниор» марығ иртірген
Пылтыр кӱскӱзін пастағызын на 14 –17 частығ саарбахтар аразында «Бизнес Юниор» марығ иртірілген. Пӱӱл, тізең, аны хатап иртірерге чарадылған. Марыға тиксі республикадаң 60 айланыс кірген. Пірдең, олғаннар алынҷа даа, ӧменең дее, пос кӧңнінең дее паза улуғлары устаанынаң даа килгеннер. Чоохтирға кирек, пу олаңай ла марығ нимес. Ол саарбахтарның пос кирее школазына тӧӧй. Пастап олғаннар пос киреен тӧстиріне, аны тилідеріне паза парыстанарына ӱгренчелер. Анаң, ол пілістерні ӧзенге алып, пос сағыстарын чуртасха кирерін бизнес-проектте тимнепчелер паза ӧнетін тӧстелген чарғыҷылар ӧмезі алнында арачылапчалар. Чарғыҷылар ідӧк тиксі марығ тузында олғаннарның піліcтерін, ӧткін тудынызын, наа сағыстарын, ӧтіг сағын полчатханын, сыдамахтарын паза пасха даа чахсы сариларын паалапчалар.
Ағбанда «Азия» бизнес-отельнің конференц-залында олғаннар пос проекттерін арачылааннар. Хакасияның экономика тилізі министерствозының пос кирее паза садығ тилізі департаментінің устағҷызы Владимир Наумкин, «Минің пос киреем» кіннің кізілері паза идінҷектер, марығ партнёрлары оларның артыхтарын, таллап, сыйыхтааннар.
Арачылаға сығарылған проекттердең иң артых 15 тоғыс сыйыхха турысхан, оларның ӱзі чиңіcчі санына кирілген. Піс иң артых тимнен килген паза пастағы ӱс орынға турысхан олғаннарнаң чоохтазып алғабыс. Іди ӱзінҷі орын алған Харатастағы гимназияның идінҷек кӧстегліг 11-ҷі класс ӱгренҷізі Захар Тимаргалеев, ікінҷі орында – Ағбандағы 12№ школаның 10 «Б» класстың ӱгренҷізі Алина Ахметова паза пастағы орынға cыххан Алтай аймаандағы Хойбал аалындағы школаның 9-ҷы класс ӱгренҷізі Герман Никитченко. Олар піске марыға хайди килгенінеңер, аның тузазынаңар чоохтап пиргеннер паза чиңіс тутханынаңар кӧңнілерінең ӱлескеннер.
– Минің іҷе-пабам пос киреенең айғаспинча. Позым идінҷектер клазын таллап алғам. Анда ікінҷі чылы ӱгренчем. Позымның проектінде мин Пілӧ кӧлде тынағ орнын азарын тимнеем. Ол хазых чуртас апарчатханнарға кӧстелер. Анда ідӧк туристтерге тынағ чоллары иртіріл турар. Кӧзідімге, «Сибирьдегі тынағ кӱннері», чазағ экскурсиялар паза чорыхтар. Ідӧк тынағ орнында ӱӱҷік ӧскірілер. Туристтернің дее аннаң айғасчаң паза наа ӧскен чир тамаан чіҷең оңдай полар.
«Бизнес Юниор» марығда ікінҷізін араласчам. Пастағы марығда мин кӧп наа піліс алғам паза 15 иң артых араласчы санына кіргем, че чиңісчі полбаам. Аннаңар хатап аралазарға чаратхам. Пос киреен тӧстеҷең сағызымны читіре толдырыбысхам. Спикерлернең хада ирткен полған на урокта араласхам. Салтар – ӱзінҷі орын, – чоохтап пирген Захар.
– Мин «Реклама агенті» курстарын ирткем, анда мағаа диплом алар ӱчӱн проект тимнирге паза арачылирға киректелген. Проектім тадылығ чииснең палғалыстығ. Олар тоңдырылған фрукттар сироптары хозылып тимнелерлер. Аны палалар паза іҷе-пабалар хынып чирлер. Россияда андағ чиис сығарылбинча, аннаңар пу сағыс уғаа хынығ.
«Бизнес Юниорда» мағаа чоох тударға, проектім арачылирға иң чӱрексіністіг полған. Че ӱгредіг тузында мин кӧп тузалығ піліс алғам паза пасха араласчылардаң ӱгренгем, оларның ізестіг тудынчатханын кӧзідімге алғам. Піс кӧп чоохтас турғабыс. Ол саринаң марығда аралазарға уламох хынығ полған, – ӱлескен Алина.
– Мағаа 11 час полған. 2020 чыл, чайғы. Каникуллар. Мин ибде одырчатхам, интернетте кӧзідіглер кӧрчеткенде, оларның пірcі минің хайиим тартхан. Ол таңахтардаңар полған. Сах андох мин сағыныбысхам: «Таңахтар садызып аларға». Піс алынҷа турада чуртапчабыс. Хазаалар пар полған. Мин аны арығлабысхам. Ӱс бройлер алып алғам. Азырап, ӧскір сыххам. Пола-пола ол киректең парыстанардаңар сағыныбысхам. Нинҷе-де тус пазынаң несушкаларны садызып алғам. Нымырхалар садып пастаам. Пӱӱнгі кӱнде нымырха тӧреміл алчатхан чуртағҷылар пар. Мыннаң мындар таңахтар санын 100 пасха читіріп аларға паза кічіг пос киреем тӧстирге пӧгін тутчам.
Пуох проектнең мин Алтай аймаанда «В белом» форумда араласхам. Аймах устағ-пастааның специализі мині андар тартхан. Анда мағаа проектті тимнирге полысханнар. Утып алғам. Анаң «Бизнес Юниорда» аралазарға чаратхам. Аннаңар мағаа Хойбалдағы культура туразында чоохтап пиргеннер. Аралазарға чӧп пиргеннер, че мин ікінҷілеем. Анаң Алтай аймаанҷа «Движение Первых» чӧрім кізізі пу марығдаңар искіріг ыс пирген. Ікі кізі чӧптеенде, аралазарға чарадыбысхам.
Cӧбіреме хабасчатхан ӱчӱн алғызым читірчем. Минің чидиим мағаа ла нимес, че ідӧк Алтай аймаана туза ағылар тіп сағынчам. Ізенчем, проектім аймахтың халых-экономика тилізіне чахсы хозым полар, – теен Герман.
Пос киреенең айғасчатханнар олғаннарның сағыстарына чӧпсінгеннер паза оларның аразында амох тоғындырарға тимде проекттер парынаңар искіргеннер. Чоохтирға кирек, «Бизнес Юниор» осхас марығлар олғаннарға постарын идінҷек киреенде сынап кӧрерге оңдай пирче паза оларға аннаң андар хаалирға чахсы ӧзен полыбысча. Хазнада, тізең, «Кічіг паза ортын пос кирее» нацпроектче ӱгредіг мероприятиелерінең пасха, ідӧк ахчалығ хабазығ читірілче, ол санда 25 час толдырғалах чииттерге.
Піс «Бизнес Юниорның» чиңісчілеріне сағыстарын маңнаныстығ чуртасха киріп аларға алғапчабыс, пасхазына, тізең, пу марығны хайыға алып, аралазарға, посты сынап кӧрерге. Идінҷектернің ӧӧн хыйғызы: «Пір орында одырбасха, хайынарға, пос сағызын чуртасха кирерге».
Тимнеен Наталья Сюптерекова
Автор :
Сом Альбина Чистогашевани
| Пн | Вт | Ср | Чт | Пт | Сб | Вс |
| 25 | 26 | 27 | 28 | 29 | 30 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
