Хакасия прай Россиянаң хада чобалча
27.03.2024
Хабарлар
Хакасияның аймах-пасха чоннары Успас отсар чобағ кӱнінде хумартхылап чахайахтар салғаннар
Чобағ. Кӧрік айының 22-ҷі кӱні Россияның тархынында хара кӱн полып хаҷанға даа халар
Чобағ кӱні
Ол кӱн Москва алтындағы «Крокус сити холл» концерт залында «Пикник» ӧменің концертіне чон чыылысчатхан. Кинетін камуфляж кип-азахтығ кізілер холлда паза концерт залында чыылысхан чонзар ат сыхханнар, соонаң чара чачырастар истіле тӱскеннер, анаң концерт залында ӧрт пасталыбысхан. Ӧрт тиксі 12,9 муң квадраттығ метрге тараан, аны кӧрік айының 23-ҷі кӱнінде Москва тузынҷа 01.00 часта ла ӱзіріп алғаннар.
Кізілер тың хорых парғаннар паза ӱрӱккеннер, че, андағ даа полза, махачы тудынғаннар табылғаннар. Андағ кізілер сылтаанда кӧбізі концерт залынаң хазых сығып алған. Атыстаңар искіріг полицияа искірілген соонаң, нинҷе-де минута пазынаң андар пастағы наряд чиде тӱскен, соонаң табырах полызығ читірчеткен пасха службалар килгеннер. Істезігҷілер тынағ кӱннері тооза теракт орнында тоғынғаннар. Ӱрееннер саны сыбыра хозылып одырча. Халғанҷы саннардаң, 137 кізі ӱреені таныхталған, 182 кізі палығлатхан, ағаа хоза сағбазы чох чіт парғаннар пар. Ӱрееннерні туған-чағыннары киречілепчелер.
Сах олох туста теракттаңар Россия президенті Владимир Путинге искірілген. Ол тустаң сығара ағаа теракт сылтаанда ӱрееннердеңер паза палығлаттырғаннардаңар, оларға полызығ читірерінҷе, террористтерні тударынҷа, теракт салтарларын чох идерінҷе тоғыс хайди апарылчатханнаңар искіріг тӧреміл читіріл турғанын чарытхан аның пресс-секретарьы Дмитрий Песков.
Россия президенті кӧрік айының 23-ҷі кӱнінде чуртағҷыларзар айланған паза кӧрік айының 24-ҷі кӱнін чобағ кӱні тіп чарлаан. Москвадағылар, «Крокус сити холл» концерт залы хыринда хумартхы мемориалын тӧстеп, андар чахайахтар паза ойнаҷахтар ағылғаннар. Концерт залы Муслим Магомаевтің адын ал чӧрчеткеннеңер, чуртағҷылар аның «Турналар» сарыны хоостыра андағох аттығ хумартхы чӧрімін пастааннар. Концерт залы хыриндағы хумартхы орында тигірзер учухчатхан ах турналар кӧзідии турғызылған. Олох чӧрім амды социальнай сетьтерде узарадылча. Кізілер ӧнетін тимнелген хоосты паза «Турналар» сарынны пос страницаларында турғысчалар. Андағ оңдайнаң чуртағҷылар кӧрік айының 22-ҷі кӱніндегі чобағнаң ӱлесчеткенін киречілепчелер.
«Крокус сити холл» концерт залы хыринда хумартхы чӧрім иртче
Хакасия хада
Пір кӱнінде иртеезінӧк Хакасия пазы Валентин Коновалов соцсетьтерде Москва алтындағы чобағлығ киректеңер пасхан паза республика адынаң чобағнаң ӱлесчеткенін читірген:
«Хакасияның прай чуртағҷылары адынаң паза позымның адынаң ӱрееннернің туған-чағыннарына хада чобалчатханыбысты читірчебіс. Хада чобалчабыс паза прай кирек полызығны читірерге тимдебіс.
Пу хорғыстығ сайбағны иткен кізілер хайди даа нандырыға тартыларға киректер.
Пу чобағ ӱчӱн пістің республикада ӱлӱкӱн паза кӧп чон чыылысчатхан мероприятиелер иртірілбес».
Кӧрік айының 23-ҷі кӱнінде Хакасия Чыл пазын таныхтирға тимненчеткен. Олох кӱн саблығ учёнай Л.Р.Кызласовтың 100 чазына хумартхы тас азыларға кирек полған. Ол танығлығ кирекке улуғ аалҷылар чыылысхан. Республика пазы алған чарадыға тудынып, Хакасияның культура министерствозы ӱлӱкӱнні паза хумартхы тасты азарын иртірбеске чаратхан.
Олох кӱн ӱлгӱ тураларында Россияның паза Хакасияның флагтары тӱзірілген паза хара чаламалар палғалған.
Тиксі хазна андағ улуғ хорғыстығ терактта айағ чох ӧдірт салған паза палығлатхан кізілер ӱчӱн чобалған. Пістің чобаабысха, пу хорғыстығ кирек Хакасияа теелгенӧк. Терактта Андрей паза Ольга Топоев ирепчінің чуртазы ӱзілген. Оларны чағын туғаннары киречілееннер.
Хакасия пазы Валентин Коноваловтың устаанынаң кӧрік айының 23-ҷі кӱнінде оперативнай штаб чыылии ирткен. Анда республиканың право хайраллаҷаң, ӱлгӱ органнарына Хакасия чуртағҷыларына хорғыс чох поларынҷа прай кирек тоғысты толдырарға киректелчеткені пӱӱнгі кӱннің ӧӧн пӧгіні полчатханы таныхталған. Тынағ кӱннерде республикада ӱтертіс, культура паза спорт мероприятиелерін иртірерге чарадылбаан.
Кӧрік айының 24-ҷі кӱнінде, тиксі чонның чобағ кӱнінде, Хакасиядағы аймах-пасха чоннарның, чир-суғҷыларның халых пірігістерінің, диаспораларның, ідӧк Россия чоннарының ассамблеязының регион пӧлиинің устағҷылары паза кізілері Ағбанда Чиңіс паркындағы Чааҷы сабланызы мемориалның Успас оды хыринзар чахайахтар салғаннар. Андағ оңдайнаң чуртағҷылар, аймах чон кізілері, пу чобағ соонаң хада-пірге тудынарын узаратчатханын паза тиксі хазнанаң хада «Крокус сити холл» концерт залында хорғыстығ терактта ӱреен кізілернің туған-чағыннарының чобаанаң ӱлесчеткеннерін кӧртіскеннер. Кізілерні айағ чох тик чирдең ӧдіргенін пір дее ахтирға чарабас.
Істезіг парча
Теракт полған кӱнӧк Россияның істезіг комитеді уголовнай кирек азыбысхан. Істезіглер апарылған сылтаанда ФСБ терактты толдырарында чіглендірчеткен 11 кізіні тудып алған, ол санда тӧрт кізі терактты кӧнізінең толдырған. Халғанҷылары, сайбағ орнынаң тизіп, Брянск облазында тутырғаннар. Пӱӱнгі кӱнде оларны сілкер айына читіре пиктирінҷе чарғы чарадии алыл парған. Чоохтирға кирек, олар прайзы пасха хазна гражданиннері полтырлар, ол санда Таджикистанның. Террористтер пыролығ полчатханнарынаң чарасханнар. Россия законнары хоостыра оларны чуртас тооза харибге одыртары кӧрілче.
Ӧӧні – хорғыс чох полары
Пу неделяны Хакасия пазы Валентин Коновалов оперативнай штабтың ікінҷі чыылиинаң пастаан. Республика пазы полған на устағҷының амғы тустың пӧгіні терроризмнең тоғыр арачыланар прай оңдайларны тӧстирі паза хорғыстарны чох идері полчатханын пазох таныхтаан.
Кӧрік айының 31-ҷі кӱніне теере республика паза муниципалитеттер синінде кӧріл парған культура, ӱгредіг паза спорт мероприятиелеріне тӱзедіглер кирілген. Оларның чардығы иртірілер, че иртірер оңдайлар паза изерізі алыстырылған. Олар, хорғыс чох поларын тыыдып, право хайраллаҷаң органнар чарадиинаң иртірілерге киректер.
Мында Валентин Коновалов культура тураларынзар, спорт паза ӱгредіг пірігістерінзер иртірҷең оңдай олаңай ла саналбазына хайығ айландырған, теракт алнында кирілген кирексіністер сынында тоғынарға киректер, хайда, тізең, читкіҷе нимес, право хайраллаҷаң органнарны тартып, аны тыыдарға кирек.
Штабта школаларҷа паза олған садтарынҷа рейдтер иртірерге чарадылған. Иң пастағызын, учреждениелер тураларынзар ла нимес, че ідӧк ибіркі чирлерінзер иртірерінде хорғыс чох полары хайди тоғынчатханы сыныхталар. Иртірҷең оңдай чахсы тоғынарға кирек.
Коллаж Дмитрий Сунчугашевти Сомнар интернеттең алылғаннар паза Россия чоннарының ассамблеязының регион пӧлиинің
Автор :
Наталья Сюптерекова
| Пн | Вт | Ср | Чт | Пт | Сб | Вс |
| 25 | 26 | 27 | 28 | 29 | 30 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
