Кӱннің cай медальлар утханнар
27.03.2024
Хабарлар
Диана Мирошниченко Хакасияа 4 медаль ағылған, Егор Ваземиллер – 2.
Спорт. 19 – 22 мартта Ағбан суғҷа чӱзерінҷе Сибирьнің чемпионадын паза первенствозын удурлаан
Тӧрт кӱн, 9 регион, 587 араласчы – ол суғҷа чӱзерінҷе Сибирьдегі федеральнай округ марығлары. Чыылған улус, анда кӱзін сынап, медальлар ла ӱчӱн нимес, Россия чемпионадында паза первенствозында аралазар ӱчӱн харбасхан. Регионнардаң марыға иң улуғ команданы – 80 спортсменні – Новосибирск облазы сығартыр. Пістің республика ӱчӱн 48 оол-хыс турысхан.
Чииттер 24 дисциплинада устарын кӧзіткеннер. Марығ оңдайларынҷа иң кӱстіг спортсменнер чемпионатта араласханнар, первенствода – 14-15 частығ саарбахтар паза 16-18 частығ оол-хыстар.
Суғҷа чӱзерінде дисциплиналар саны 57-ее читче. Ол сылтағнаң спортсменнер нинҷе-нинҷе медаль утып алар оңдайлығлар. Ағбандағы Олимп резерві училищезінің (техникумының) студенті Егор Ваземиллер – Россияның спорт узы. Ол таныхтаан:
– Арға-мӧрійге матап тимненгебіс. Тренировкалар иртен-иир иртчеңнер. Тиксі алза, кӱнде он ікі километр чӱзібісчеңмін. Позым спринтер полчам, хынчатхан дисциплиналарым – 50 паза 100 метрлерні учада чӱзері. Турнир тузында 12 аймах дисциплинада узымны сынадым. Тӧрт кӱн изере марығлазарға майығыстығ полтыр. Первенствода ікі медаль холға киргем. 100 метрні учада чӱзіп, ӱзінҷізі полыбысхам, 50 метрде кӱмӱс медаль утхам. Чемпионаттаңар чоохтаза, пуох дисциплиналарда 50 метрні чӱзіп, пизінҷі орынға сыххам, 100 метрде – тоғызынҷы орынға. Позымның тузымны чахсыландырыбысхам. Амды ӧӧн пӧгін – Россия первенствозы. Ол июльда иртер.
Орындағы спортсменнердең матырға Россияның спорт узы Диана Мирошниченконы санирға чарир. Саарбах, Егор Ваземиллер чіли, тренер Евгений Осиновскийнің холында узын таптапча. Ол аймах дисциплиналарда медальлар утхан. 19 мартта Диана, 100 метрні баттерфляй оңдайынаң чӱзіп, азах меетке ікінҷізі читтір. Пір кӱнінде пістің хыс Хакасияа пастағы алтын медаль ағылған. Дисциплина – 50 метрні учада чӱзері. 20 мартта наа чидіг. Мирошниченко, 50 метрні баттерфляй оңдайынаң 27.76 секундаа тобырып, кӱмӱс призер полыбысхан. Халғанҷы кӱнде Диана пазох чиңіс тутхан. Саарбах 50 метрні пос оңдайлығ стильнең 27 секундаа чӱзібістір. Тиксі алза, Диана Мирошниченко первенствода 4 медаль холға кирген: 2 алтын паза 2 кӱмӱс.
Аның ӧӧрезі Анна Струкова учада чӱзерге кӱс. Саарбах 100 паза 200 метрлерде ӱзінҷізі полыбысхан. Кічіглердең Ярослав Яркинні адирға кирек. Ол 14-15 частығларның аразында марығласхан. Спортсмен пос оңдайлығ стильде узын сынапчаттыр. Ярослав 50 паза 100 метрлерде кӱмӱс медальлар холға кирген, 200 метрде – хола медаль.
Хакасияның командазынзар ӧӧнінде ағбандағылар кірчелер. Спорт школазы республиканың ӧӧн городында орныхча нооза. Че марығ сай саяногорсктағылар хозым идерге кӱстенчелер. Кӧзідімге, пылтыр чемпионатта 9-ҷы класстың ӱгренҷізі Виталий Карпов комплекс чӱзерінде республикаа хола медаль ағылған. Пӱӱл олох чидіге Даниэль Шандро читті. Спортсмен баттерфляй оңдайынаң 200 метрні 2:20.33 тусха чӱзібіскен. Аның тренері – Елена Бобрикова. Елена Андреевна чоохтаан:
– Арға-мӧрійде читі ӱгренҷім араласты. Даниэльдең пасха пірдеезі сыйыхтығ орынға сыхпаан. Піс аның ӱчӱн ӧрінчебіс. Ол пӱӱл 9-ҷы классты тоосча. Ағаа сыныхтағларға тимненерге кирек. Маң чох полза даа, Даниэль иртен-иир тренировкаларға чӧрче. Пу кӱннерде прай округтарда Россия мариина таллағ парған. Піс ідӧк Виталий Карповтың ӱчӱн «ағырғабыс». Ол 9-ҷы класс соонда Санкт-Петербургсар ӱгренерге парыбысхан. Орындағы УОР-да пілістерін алғытча. Аның амғы тренері – Олимп ойыннарының кӱмӱс призеры Елена Дендеберова. Санкт-Петербургтың первенствозында Виталий ікі кӱмӱс медаль утхан.
Елена Бобрикованың ӱгренҷілерінің пірcі – Хакасиядаң сыххан чалғыс чоннар аразындағы класстығ спорт узы Павел Татаренко. Саблығ cпортсмен Саяногорсктағы секцияа чӧрчеткен саарбахтарға тӧреміл мастер-класстар иртірчеттір.
Сибирь марығларынзар айланза, олар хакас спортсменнерге тӱзімніг ирткеннер. Чир-суғҷыларыбыстың 11 медаль: 2 алтын, 5 кӱмӱс паза 4 хола. Пылтырғызынаң тиңнестірзе, пӱӱл оол-хыстарыбыс хай-хай артых чӱзібіскеннер. 2023 чылда Хакасия командазының 3 медаль полған.
Cомнар спорт школазының архивінең
Автор :
Майя Кильчичакова
| Пн | Вт | Ср | Чт | Пт | Сб | Вс |
| 25 | 26 | 27 | 28 | 29 | 30 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
