Улуғ тӧлге – наа кін
22.03.2024
Хабарлар
Людмила Иванова (оң саринда) аалҷыларны наа кіннең таныстырча
Танығлығ кирек. Пу неделяда Харатаста улуғ тӧлге чоох алысчаң кін азылған
Россияның Социальнай фондының (СФР) Харатастағы пӧлиинде улуғ тӧлге, тоғазып, чоох алысчаң кін тӧстеп алдылар. Ол пу пӧліктің пастағы хадылында 109 № кабинетте орныхча. Аны пайрамни азарында ідӧк Хакасияның істеніc паза социальнай арачыланыс министерствозының паза халых организацияларының кізілері араласханнар.
Пеер чыылысхан чонны тасхар «Движение» теелбек клубындағы чайаачы ипчілер удурлааннар. Олар, хара-сарығ ӧңніг костюмға чазанып, амғы тустағы кӧглерҷе теелбектер салып, кізілернің кӧңнін кӧдіргеннер. Анаң тура іcтінде хызыл лента хыплалған. СФР-ның региондағы пӧлиинің устағҷызы Людмила Иванова аалҷыларны кіннең таныстырған. Анда компьютер, телевизор, улуғ нимес библиотека пар, ікі стол, узун ікі кушетка турғызылған. Шахмат паза нарды даа ал салтырлар. Кабинетте уғаа истіг. Че анда пір саңай кӧп кізі чыылыс турарына тарғынах. Аннаңар тоғазығ аннаң андар актовай залда иртірілген.
– Хакасияда амды мындағ ікінҷі кін азыл парды. Улуғ тӧлге андағ пастағы кін 2021 чылда Таштыпта тӧстелген. Аны тӧстирі – Социальнай фондтың сынағлығ проектінің чардығы, ол прай регионнарда чуртасха кирілче. Наа кінні улуғ частығларның чуртазын чахсыландырар, хынығ идер, пасхазынаң таныстырар кӧстегнең асчабыс. Ідӧк ол халых чуртаснаң ӧткін айғасчаң, ӱтертчең кін полча. Харатаста 14 муң азыра пенсионер чуртапча. Ізенчем, оларның кӧбізі пістің кінзер удаа ааллап кил турар. Мында ідӧк ӱлгӱдегілернең, халых организацияларынаң тӧреміл тоғазығлар иртірілер. Паза пу кінге городтағы библиотека хайығ айландырза, піске ӧрініcтіг полар, – таныхтаан чооғында Людмила Васильевна.
Устағҷының чооғынаң, сағам СФР пӧлиинің специалисттері, ӧткін чуртағҷыларның чӧптерін санға алып, чағынғы тусха аймах мероприятиелер планын тимнеп салғаннар. Кӧзідімге, пеер килчеткен улусха тузалығ ас-тамахтаңар, Харатастың тархынынаңар лекциялар иртірілер, улуғлар шахмат паза шашка турнирінде хыйғазынаң сыназарлар. Мыннаң мындар национальнай ас-тамах паза пасха даа чиисті тимнирінҷе мастер-класстар иртірерге пӧгінчелер. Маңнығ туста ӱтертінерге сағынчатхан улусты пу кінзер ааллап чӧр турарға хығырчалар. Ол Харатаста пу адресче орныхча: Суриковтың орамазы, 11 А. Кӧзідімге, Таштыптағы кінде 2022 чылда улуғ тӧлнең 42 мероприятие иртірілтір.
Наа кінні азарында араласчатхан аалҷылар, чоохха хозылып, СФР-ның региондағы пӧлиинің устанызын, махтап, тынаға сых парған чонға хабазарға кӱстенчеткенін таныхтааннар. Хакасияның Халыхтар палатазының кнезі Ольга Левченко, чылығ сӧстер читіріп, кіндегілерге хабас турарға тимдебіс тіп искірген, чидіглерге чит турарға алғаан.
Хакасияның істеніс паза социальнай арачыланыс министрінің орынҷызы Светлана Лавриненко таныхтаан, мындағ кіннер азылчатханы ӧріндірче. Оларның полызиинаң улуғ тӧл чоннаң тиңе ӧткін чуртаснаң айғас турча. Министерстводағылар андағ кіннернең аймах-пасха мероприятиелерні пірге иртірерге пӧгінчелер.
Халғанҷызынзар аалҷылар ӧткін пенсионерлернең, cтол кистінде чей ізіп, чоох алысханнар. Улуғ частығлар чуртаста постарын сағыссыратчатхан сурығларны пастыхтарға пирер оңдайнаң тузаланғаннар.
Сом Альбина Чистогашевани
Автор :
Инора Боргоякова
| Пн | Вт | Ср | Чт | Пт | Сб | Вс |
| 24 | 25 | 26 | 27 | 28 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
