Ах чарыхтаң парыбысты Владимир Григорьевич Кирбижеков
09.03.2024
Хабарлар
7 мартта, 74 чазын апарчадып, ах чарыхтаң парыбысты Хакасияның саблығ артизi, опера ырҷызы (бас), камернай ырҷы, хакас чонның сын оолғы Владимир Григорьевич Кирбижеков.
Ол 29 июньда 1950 чылда Хызылчар крайындағы Краснотуранскай аймахтың Белоярскай аалында тӧреен.
1986 чылда Ағбандағы музыка училищезiн тоосхан. Анда Россияның саблығ артизi, Хакасияның чон артизi Владимир Терешковтың холында ӱгренген.
1989-2000 чылларда Хакас Республика филармониязында ол тӧстелгеннең сығара ырҷы полып тоғынған.
1991 чылда Москвадағы Гнесиннер адынаң хазна кӧг-ӱгредiг институдын тоосхан. Анда СССР-ның чон артизi Артур Эйзеннiң холында ӱгренген.
1998 чылда 13 мартта Россияның культура министерствозының «За достижения в культуре» пӧзiк танығнаң сыйыхтатхан.
1998 чылда 11 ноябрьда Хакасияның саблығ артизi пӧзiк ат алған.
2000 чылның апрель айынаң сығара 2018 чылның сентябрь айына теере Хызылчардағы хазна опера паза балет театрында ырҷы полып iстенген.
Н.А.Римский-Корсаковтың «Царская невеста» операзында Малютаның партиязын, Ж.Бизенiң «Кармен» операзында – Цунигинi, С.С.Прокофьевтiң «Обручение в монастыре» (пасха ады «Дуэнья») операзында – Мендозаны, П.И.Чайковскийнiң «Иоланта» операзында – Бертранның партиязын, П.И.Чайковскийнiң «Евгений Онегин» операзында Греминнi паза пасхазын толдырған.
Владимир Кирбижеков 2001 чылда Владимир городта ирткен тиксi Россия синiндегi романстар мариинда «Классический романс» номинацияда премияа паза лауреат атха турысхан.
Сӧбiрезiнде Владимир Григорьевич iзестiг паба полған. Ол ипчiзiн, палаларын хаҷан даа сибер хайраллаҷаң. Аннаң хада чуртастың хайдағ даа аар-чӱктерi оой тобырылҷаңнар. Iкi оолғын паза iкi хызын чон аразынзар турыстығ кир салған, оларға профессия ӱгредиин пирерге прай кӱзiн салған.
Владимир Кирбижеков пик хуйахтығ кiзi полған, алнында турғысхан пӧгiннерiн хайди даа толдырҷаң. Аалда ӧскен хакас оол чиит туста чылғы малнаң айғасхан, тракторда тоғынған.
Ол музыка училищезiн тӧрт палалығ полғанда тоосхан. Алында, ахчанаң хызылып, аның анда ӱгренҷең оңдайы чох полған. Владимир Григорьевич студент тузында «Кӱн чахайағы» ансамбльда ӧткiн араласчаң. Андада ағаа тӧрт пӧлiктiг улуғ квартира пиргеннер. Хонғаны Светлана Петровна Владимир Григорьевичке чуртас тооза пик чӧлег полған.
Владимир Григорьевич аңнирға хынҷаң, тайға ағаа кӱс пирҷең. Ол Хакасияның, Туваның, Тағлығ Алтайның тайғаларын ӧтiре пiлҷең, аннаңар археологтар, учёнайлар ӱр чыллар, чайғызын, аны экспедицияларға хада ал чӧрҷеңнер.
Владимир Кирбижеков «Кӱн чахайағы» паза «Ӱлгер» ансамбльларнаң, Хызылчардағы опера театрынаң хада прай чир ӱстӱн ибiр салған. Аның чайаачы программазында хакас, орыс, хырығ озариндағы композиторларның кӧглерi, чон сарыннары паза романстар полҷаң.
Владимир Григорьевич Кирбижековты 12 мартта, вторникте, 11.00-12.00 часта С.П.Кадышевтiң адынаң чон чайаачызы кiнiнең сығара тӱгенҷi чолына ӱдезерлер. Аның ипчiзi, тӧрт палазы паза тӧрт пархазы халған.
Автор :
Ипчiзi паза пала-пархалары
| Пн | Вт | Ср | Чт | Пт | Сб | Вс |
| 30 | 31 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
