Спорттың піріктірчеткен кӱзі
06.03.2024
Хабарлар
Сыйыхтас тузында
Чӧрім. Пістің республика «Россияның кӱзі» спорт марафонында араласча
Чӧрім февральның ортызында чарлалған. Аның ӧӧн пӧгіні – кізілерні хазых чуртасха тартары. Акцияа хазнаның прай регионнары хозылғаннар, полғанының позының спорт программазы. Хакасияда марафон хоостыра пастағы турнирлер 17 февральда ирткеннер. Ол кӱн Ағбанның тынағ паркында катанкалығ хоккей марии полған. Арға-мӧрійде улуғлар даа, кічіглер дее устарын кӧзіткеннер. Хазыр харбазығда олғаннарның аразында «Олимп-1» команда (Шира аймаа) чиңіс туттыр, иреннердең Асхыс чоғархы аалдағылар прайзын ас парыбыстырлар.
Че ӧӧн мероприятие 1 мартта Н.Г.Булакиннің адынаң спорткомплексте ирткен. Пайрамда спорт ветераннары, тренерлер, олған-чииттер школаларының ӱгренҷілері, Ағбандағы Олимп резерві училищезінің (техникумының) cтуденттері араласханнар. Тиксі алза, 1500 кізі. Пістің республикада спорт улуғ аарласта, аннаңар чӧрімге Хакасия пазы Валентин Коновалов, Ӧӧркі Чӧп кнезі Сергей Сокол паза Ағбанның пазы Алексей Лёмин хозылғаннар. Мероприятиенің улуғ аалҷызы полған Россияның саналығ чӱгӱрісче федерация президенті, ӱс хати Олимп чемпионы Елена Вяльбе.
Спорт пайрамы «Хакасия – пис кӱстің чирі» улуғ нимес фильмнең азылған. Залда чирібістің хайхастығ чир-чайаанына аптаттырбаан кізі халбаан, неке. Чалбах чазыларға, хойығ тайғаа, пурунғы кӱргеннерге хайди морсынмас. Че сынап кічіг спортсменнер хайхатханнар. Оолағастар паза хызыҷахтар, «Хакасия спорты – Россияның кӱзі» номерні кӧзідіп, чыылған чонны аймах спорт кӧрімнерінең таныстырғаннар. Мероприятие тузында искірілген: Хакасияда 374 муң артиинаң кізі cпортнаң айғасча. Олардаң 13 626 спортсмен волейболда кӱзін сынапча, спорт кӱрезінде – 4146 кізі, меспектіг хоккейде – 3170 оол. Дзюдоисттернің, боксерларның, самбисттернің саны илееде полтыр. Хоос гимнастика секциязынзар, тізең, 115 ле хызыҷах чӧрче. Піс сіліг cпорт кӧрімінің таңдағызына киртінчебіс. Хакасияа позының Евгения Канаевазы кирек нооза.
Ідӧк пайрам тузында «Каданс» хор кӧп ӧрініс сыйлаан. Ӧме араласчылары, Россияның паза Хакасияның гимннерін толдырып, чыылған чонның чӱреен кӧӧреткеннер. Кееркестіг ӱнніг артисттер республика гимнін хайди даа орыс паза хакас тіллерінең сарнапчалар. Оларнаң хада сценаа сыхханнар саблығ ырҷы Артур Марлужоков паза Никита Тихонов. Никита сарыннарны салааларнаң кӧзідіп толдырча.
Пайрам сыйыхтаснаң узарадылған. Артыхтарның артығын таныхтир алнында аарлығ аалҷылар чоох тутханнар. Елена Вяльбе таныхтаан:
– Россия – илбек хазна! Мында пик хуйахтығ, тӧдір пазынмас чон чуртапча. Піс хайдағ даа сидікcіністерні тобырып алар оңдайлығбыс. Прайзына посха киртінерге, алнынзар ла хаалирға алғапчам.
Хакасия пазы Валентин Коновалов Елена Валерьевнаа республиказар тӧреміл килчеткен ӱчӱн алғызын читірген. Хайди чооғында таныхтаан Валентин Олегович, республика чуртағҷылары саблығ спортсменні паза тренерні пос кізізіне санапчалар. Анзы тиктең нимес. Елена Вяльбе саналығ чӱгӱрісті, Россияда ла нимес, Хакасияда тилідерге кӱстенче. Валентин Олегович теен:
– Спорт чииттерні Ада чир-сууна хынарға ӱгретче, чонны піріктірче. Марафон араласчыларына спортсменнерге ӧсчеткен тӧлні паза улуғларны спортнаң айғастырчатхан ӱчӱн алғызым читірчем.
Ідӧк чыылған чонға чылығ сӧстер читіргеннер Сергей Сокол паза Алексей Лёмин. Россия спортының Аарластығ паза алғыстас пічіктеріне, спорт ведомствозының 100 чылына чарыдылған пайрамнығ медальларына 20 артиинаң кізі турысхан, оларның санында саблығ чир-суғҷыларыбыс Алексей Карамашев, Татьяна Карамчакова, Марат Кичеев, Инга Карамчакова паза Лилия Каскаракова.
Таныхтирға кирек, Хакасия ӱлгӱлері спорт сферазын улуғ хайығда тутчалар. Чыл сай республикада наа ГТО ачыхтары, футбол чазылары, спортзаллар, спорткомплекстер тузаланысха кирілчелер. Андағ оңдай пирче «Демография» нацпроекттің «Спорт – чуртас сині» федеральнай программазы. Нацпроекттер Россия президенті Владимир Путиннің пастаанынаң чуртасха кирілчелер.
Сом Альбина Чистогашевани
Автор :
Майя Кильчичакова
| Пн | Вт | Ср | Чт | Пт | Сб | Вс |
| 30 | 31 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
