Медальлар утчалар
21.02.2024
Хабарлар
Гаврил Анжиганов (сол саринаң), тренер Владимир Покояков паза Тимур Чепчигашев
Спорт кӱрезі. Пістің оол-хыстар, аймах-пасха синде иртчеткен марығларда аралазып, постарын турыстыра кӧзітчелер
Хакасияның кӱресчілері 2024 чылны хомай нимес пастадылар. Ирткен айда ла спортсменнер ікі улуғ марығда – Россия чемпионадында паза «Иван Ярыгиннің кубогы» чоннар аразындағы турнирде – пістің республикаа медальлар ағылғаннар.
Грек-рим кӱрезінҷе чемпионат 18 – 20 январьда ирткен. Чир-суғҷыларыбыс Гаврил Анжиганов (63 кг) паза Тимур Чепчигашев (87 кг) хола медальлар утханнар. Анзы танығлығ чидіг. Пылтыр оолларыбыс пизінҷі орыннаң пӧзік кӧдіріл полбааннар. Спортсменнер марығларда ікі регион – Хакасия паза Хызылчар крайы – ӱчӱн турысчалар. Оларның амғы тренері – Владимир Покояков. Неделя пазынаң чидіглерінең ікі Наташа ӧріндірген. Малышева Ярыгин турнирінде 53 кг кӧдірімде чиңіс тутхан, Пудованың (50 кг) – хола медаль.
Чииттер паза саарбахтар пӧзік устығ спортсменнердең халбасха кӱстенчелер. Январьда грек-рим кӱрезінең айғасчатханнар Сибирь марығларында постарын турыстыра кӧзіткеннер. 18 часха читкелектер аразында сыйыхтығ орыннарға сыхханнар Алтаир Табурчинов (І орын), Аймир Карамчаков (ІІ орын) паза Руслан Торточаков (ІІІ орын). 16 часха читкелектер Бердскте марығласханнар. Андрей Челбыгашевнең Айдар Кичеев кӱмӱс медальлар холға киргеннер, Глеб Антоневич ӱзінҷізі полыбысхан. Пастағы спортсмен тренер Олег Сенотрусовтың устаанынаң харбасча, ікінҷізі – Геннадий Бурнаковтың. Антоневич – Виталий Чичининнің ӱгренҷізі. Хайди даа Ильяс Палтушевті таныхтирға кирек. Чиит кізі февральда Сибирь первенствозында чиңіс тутхан. Кӱресчілер марыға Барнаулда чыылысханнар. Анда 21 часха читкелектер кӱстерін cынааннар. Палтушев Ағбаннаң, аның пастағы тренерлері – Александр Худяков паза Валентин Кольчиков. Амғы туста Ильяс ідӧк Хызылчар крайы ӱчӱн харбасча. 26 – 28 февральда ол Россия первенствозында аралазар.
Ікі ай аразына илееде медаль кӱресчі хыстар утханнар. 16 часха читкелектернің аразында Сибирь мариинда Кира Бурцева, Мария паза Дарья Черниковалар ікінҷі орынға cыхханнар, Дарина Котожекованаң Ангелина Карамчакова – ӱзінҷі орынға. Чииттер аразында СФО первенствозы Новосибирскте 3-4 февральда ирткен. Салтарлар ӧріндірче. Алина Сагалакова, Валерия Карамчакова паза Алина Дударева алтын медальлар холға киргеннер, Снежана Будегечи – кӱмӱс призер, Ксения Куйрукованаң Агата Торбастаева ӱзінҷі орынға сыхханнар. Тынағ кӱннерінде кӱресчілер Сибирь первенствозында паза чемпионадында устарын кӧзіткеннер. Пастағы марығда 18 часха читкелектер кӱстерін сынааннар. Валерия Косточакова чиңіс тутхан, Екатерина Кичеева кӱмӱс медаль холға кирген. Чемпионаттаңар чоохтаза, Наталья Пудова пастағы орынға сыххан, Алина Сагалакованаң Алина Дударева – кӱмӱс призерлар, Ольга Абрамованың паза Карина Барашкованың хола медальлар.
Хакасиядағы олаңай кӱресте киректер уйан арах парча тирге чарир. Спортсменнердең Сибирь первенствозында Павел Пакачаков ӱзінҷі орынға сыххан. Семён Терещенко чемпионатта чиңіс тутхан. Кӱресчі Сорығдаң. Халғанҷы чыллар Хызылчарда чуртапча. Ідӧк Хакасия ӱчӱн турысча.
Салтарларны кӧрзе, пістің республикада ипчілер кӱрезі чахсы тиліпче. Наталья Малышева чоннар аразындағы марығларға таллағны тӧреміл иртібісче нооза. Пу кӱннерде ол Европа чемпионадында араласхан. Тилекей мариинаң тиңнестірзе, хакас абахай хомай нимес харбазыбысхан. Пылтыр кӱскӱзін Белградта Малышева, турнирнің тӧртінҷі чардығында утыр салып, марығдаң сығыбысхан. Амғы арға-мӧрійде ол ӱзінҷі орын ӱчӱн харбасты. Чир-суғҷыбыс Мария Преволаракиге 6:11 саннаң утыр салған. Россия ӱчӱн харбасхан хыстардаң Милана Дадашева ла сыйыхтығ орынға сыххан, аның хола медаль. Минің кӧрізімнең, пістің спортсменнернің, ол санда Малышеваның, чоннар аразындағы турнирлерде тӧреміл аралазар оңдай полған полза, салтарлар пасха поларҷых. Наташаа киртінчебіс, ағаа поғдархапчабыс. Хоза пір танығ. 1980 чылларда хыстар кӱреснең айғас сыхханнарында, оларға кӧбізі киртінмеен. Амғы туста абахайларның ӱчӱн кізілер матап «ағырчаттырлар».
Сом Тимур Чепчигашевтің архивінең
Автор :
Майя Кильчичакова
| Пн | Вт | Ср | Чт | Пт | Сб | Вс |
| 25 | 26 | 27 | 28 | 29 | 30 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
