Ағбан ӧңненче
16.02.2024
Хабарлар
Ағбандағы Рублёв орамазындағы сквер
Нацпроект. «Чурт паза город оңдайлары» национальнай проекттiң «Городта истiг оңдайлар тӧстирi» хазна программазы читiнҷi чылы чуртасха кирiлче
Хазна программазы тоғынып пастааннаң Ағбанда 15 сквер паза парк пӱдiрiл парған паза иптелген. Оларның санында «Баранка», «Заречье», «Леопольд», «Мамонтёнок», Советскай, Фадеевтің орамаларындағы скверлер паза кӧп чон чӧрчеткен пасха даа орыннар. Хай пiрее орыннарны нинҷе-де чыл иптирi кӧрiлче.
Ағбан городтың ӧӧн архитекторы Светлана Крылованың чооғынаң, пӱӱл республиканың ӧӧн городында кӧп чон чӧрчеткен 17 орынны иптирiнҷе тоғыстар апарылар, оларның 15-i iкiнҷi алай ӱзiнҷi чылы иптелер. Iкi проект рейтинг талластыриин утып алған.
– 2017 чылдаң сығара программаны чуртасха кирерiне федеральнай ахча пирiлче. Муниципальнай пӱдiстер кӧстеглiг пӧгiннернi толдырарға киректер. Оларның пiрci – иптелген объекттер саны. Анзы пазағы чылға пу пӧгiнге нинҷе ахча пирiлерiнең палғалыстығ. Аннаңар чылдаң чылға иптелчеткен орыннарның санын ӧскiрчебiс. 2017 чылда Ағбанда iкi орын иптелген, пылтыр – 15, пӱӱл – 17. Улуғ объекттер, кӧзiдiмге, «Преображенскай», «Черногорскай», «Чиңiс», Рублёв орамазындағы парктар, Культура паза тынағ паркы нинҷе-де чыл изере иптелчелер паза пӱӱл иптелерлер.
Пу тоғыста ӧӧн сидiксiнiстер – проект-смета пiчiктерiн тимнирiне, подряд организацияларын таллирына тус асхынах пирiлчеткенi. Халғанҷы чылларда, электроннай платформада рейтинг талластырии иртiрiлiп, иптир орыннар табылча. Ирткен чылларда ол хандых айында ирт парҷаң. Проект-смета пiчиин тимнирiне, подряд организациязын тiлирiне тус асхынах халҷаң. Пӱӱл рейтинг талластырии пiр айға ирте ирт парар. Иптеҷең орын кӧп, аннаңар кӧп дизайн-проект, тоғыс проекттерiн тимнирi киректелче. Техничекай чарадығлар орта тимнел парза, иптир тоғыстарны толдырарынаң сидiксiнiстер тың на чох полча. Анзы подряд организациязынаң на палғалыстығ. Орыннарны иптир тоғыстарны толдырчатхан предприятие кӧп нимес. Аннаңар олар пiр саңай нинҷе-де объектте тоғынчалар. Тоғыстар чылығ туста пасталыбысчалар паза хар чағанҷа тоозыл парарға киректер.
Рейтинг талластыриин пылтыр утып алған проекттер пӱӱл иптелерлер. Хосхар айының пастағы кӱнiне теере подряд организацияларынаң чӧптезiг идiбiзерге кирекпiс, – теен Светлана Крылова.
Пылтыр рейтинг талластыриинда Лениннiң проспектiн иптирiнҷе проект утып алған. Аның ӱчӱн Ағбанның 8363 чуртағҷызы ӱнiн пирiбiскен. Север проездіндегі суғ хазы ӱчӱн 6063 кiзi ӱнiн пирген. Пу проект iкiнҷi орынға сыххан.
Лениннiң проспектiндегі Ярыгиннiң орамазынаң сығара Катановтың орамазына теере аллеяны иптирi пӧгiнде турча. Пу уғаа алғым тоғыс, аннаңар проекттi чуртасха кирерiне пiр нимес чыл парыбызар. Пу орын муниципальнай программаа кирiл парған.
Челюскиннер орамазындағы сквер пiр ле нимес чыл пӱдiрiлген. Пiр чыл анда асфальт тӧзелген, анаң олған площадказы пӱдiрiлген. Ӱзiнҷi чылында, пылтыр, анда кӧп кӧстегліг спорт площадказы пӱдiрiлген.
Черногорскай паркта iдӧк кӧп тоғыс толдырылған, ол санда спортнаң айғасчаң орын тӧстелген. Пӱӱл анда сцена тыхталар.
«Преображенскай» паркты иптир тоғыстар ӱзiнҷi чылы изере апарылар. Ирткен чылларда анда олған площадкалары, чолыҷахтар нааҷылалғаннар, пӱӱл «Ангел Мира» паза аны ибiре аллея нааҷылалар.
Ирткен чыл «Чиңiс» паркы тиксi Россияда городта истiг оңдайлар тӧстирiнҷе иң чахсы проекттер марииның чиңiсчiзi полыбысхан. Проект хоостыра хоза аллея, машиналар турғысчаң орыннар тӧстелер, часовня, кӧзiдiг павильоны пӱдiрiлер, интерактивнай стендтер турғызылар паза пасха даа алызығлар полар.
– Ағбанда кӧп орын иптел парған. «Городта истiг оңдайлар тӧстирi» программа хоостыра пирiлчеткен ахча муниципалитеттерге уғаа чахсы хабазығ полча. Хорадығларның 99 %-i – федеральнай бюджет ахчазы. Пiр ле процент муниципальнай ахча, – сағыстарынаң ӱлескен Светлана Владимировна.
Кӧп чон чӧрчеткен орыннар иптирiнҷе проекттер пасхалалчалар. Пiреезiнде кiчiг архитектуралар полча. Оларны скульпторлар тимнепчелер. Че скульптураларға федеральнай ахча пирiлбинче, аннаңар муниципалитеттерге посха хорадынарға килiсче.
Сом «Абакан официальный» ВКонтакте группазынаң
Автор :
Оксана Челтыгмашева
| Пн | Вт | Ср | Чт | Пт | Сб | Вс |
| 25 | 26 | 27 | 28 | 29 | 30 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
