Федеральнай кіннең хада-пірге тоғынарбыс
16.02.2024
Хабарлар
Чыылығ тузында
Чыылығ. Хакасияның Ӧӧркі Чӧп кнезі Сергей Сокол, республикада Россияның правительство кнезінің орынҷызы Виктория Абрамченко полып, хайдағ пӧгіннер турғысханы хоостыра чыылығ иртірген
Чыылығда Ӧӧркі Чӧп кнезінің орынҷылары, хай пірее комитеттерінің устағҷылары, iдӧк Ағбан паза Харатас городтар пастары Алексей Лёмин паза Василий Белоногов араласханнар.
Хайди искірген Сергей Сокол, федеральнай органнарнаң тоғыс апарғаны чахсы салтарларға ағылча. Аның сылтаанда республиканы тилідер стратегия планы чарадыға алылған. Піс ам регионны тилідер алынҷа программаа кірiп аларбыс. Ол Ӧӧркі Чӧп пастыра чуртасха кирілер, ағаа хайдағ-да тус киректелер, анзын піс сыныхтағда тударбыс.
Виктория Абрамченко Хакасияның сидікciністіг сурығларын чахсы пілче. Хайдағ мында чуртас-экономика тилізі, экологияа улуғ хайығ айландырарын. Піс чонның парыстарынҷа соона халчабыс, СФО-да пу кӧзідімҷе 9-ҷы орындабыс. Мындағ ам пӧгіннер турғызылча – чонның чуртазын чахсыландырары, экологияны пӧзiк синге кӧдірері. Ол сурығларны Ӧӧркі Чӧптің сессиязында, комитеттерінде ӱзӱрербіс. Сӧп-сапты чыып, аны чох идер сурығны федеральнай экология операторынаң ӱзӱргебіс. Хайдағ объекттерні хайда турғызарын чуртағҷыларнаң тоғазығларда ӱзӱрербіс. Экологияны кiрлепчеткен предприятиелерні республиказар позытпасха кирек.
Россия президентінің чахиинҷа «Арығ кии» программаны 2030 чылға теере толдыр салар план тудылча. Транспорт iдӧк экология кирексіністеріне килістіре ползын. Федеральнай правительство полызиинаң пассажир транспортын алыстырарбыс, аннаңар вице-премьернең чӧптеcкебіс. Республиканың правительствозы андағ чӧптезіглер идіп алар. Прай пу киректерде система ползын. Муниципалитеттер кирексiніcтерін санға аларға кирек. Оларның парыстары пасхалалча, хайзында пӧзік парыстар, пасхазында ол чох чуртапчалар. Кізілернең азых чоохтазығ апарарға кирек, андада прай ниме пілдістіг пол парар.
Харатас «Icтеніс сабланызы город» атха турысча. Анда паркты ла чахсыландырарға нимес, прай городха хайығ саларға кирек. Ағбан городха республика столицазы полчатхан статус алып аларға, аның андағ официальнай статузы ам даа чоғыл. Аны алза, ағаа хоза ахча кірер, андағ чарадығны Ӧӧркі Чӧпче иртiріп, чарадыға алыбызарбыс. Асхыс аймаанда сидікciністіг cурығлар кӧп. Амды киректер хайди парча? Пірее объект пӱдірерге пічіктер, проект тимнелче, экспертиза иртірілче, че ол туста законодательство алыс парча. Iди толдырылған мындағ тоғыс тикке ле парыбысча. Ол пічіктер, проекттер программаа кіріп аларға тимнелчелер. Сынында кирек андағ полбазын. Ахчаны тикке ле хорадарға чарабас.
Коммунальнай похсахты арығлаҷаң пӱдіріглерні нааҷылирға кирек. Мындағ сурығлар Тӧӧ пазында, Палыхтығ суғда кӧрілче. Алтын аныпчатхан компанияларнаң тоғыс апарарға кирек. Ширада пу тоғыс пір орыннаң тибіребісті. «Арығ суғ» программаҷа мындағ тоғыстарға ахча позыдылча. Амды пістің регионда тоғыстар «холнаң устапчатхан режимде» толдырылчалар, аннаңар піске система кирек.
Мыннаң мындар Таштып аймаандағы Мадыр, Индiркi Хурлығас, Ӧлең чазы аалларзар пар килер план тудылча. Пілдістіг, оларда андағох сидікciністер полар. Чоннаң чоохтазарбыс. Россия правительствозынаң ам чахсы палғалыс тудылча. Піccер Россияның экология операторы килер, ол регион операторы тоғызын сыныхтир, ол аны алыстырыбызарға ба, чох па – чарадығ алар. Ағаа кӧп тус киректелбес, пір айға ол тоғыныбызар. Піске ӧӧні – регион операторы чахсы тоғынзын. Мыннаң мындар піс тее, республика правительствозы даа федеральнай кіннең хада-пірге тоғынарбыс.
Сом Ӧӧркі Чӧп сайтынаң
Автор :
Николай Султреков
| Пн | Вт | Ср | Чт | Пт | Сб | Вс |
| 25 | 26 | 27 | 28 | 29 | 30 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
