Хазна ахчанаң хабазар
16.02.2024
Хабарлар
Россия правительствозының кнес орынҷызы Виктория Абрамченко республика хабарҷыларының сурығларына нандырча
Тоғыс чорығы. Азығ айының 13-14-ҷі кӱннерінде Хакасияда тоғыс чорығынаң Россия правительствозының кнес орынҷызы, Сибирьдегі федеральнай округтың кураторы Виктория Абрамченко пол парыбысхан
Валентин Коноваловнаң тоғазығ
Виктория Абрамченко, Хакасия пазы Валентин Коноваловнаң тоғазып, тиксі хазна тилізінің национальнай пӧгіннерін толдырар ӱчӱн регионнарның экономиказына ӧӧн кӧзідіглер таныхтал парғанын искірген. Виктория Валериевна тоғазығның пӧгінін, Хакасияның чидіглерін паза мыннаң мындар тоғысты айныдарға киректелчеткен кӧстеглерні республика хабарҷыларына чарыт пирген:
– Піс Хакасия пазы Валентин Олеговичнең хада регионның чуртас-экономика тилізін ӱзӱргебіс. Хазна пазының 474-ҷі чахиинда Россияның 2030 чылға теере прай тилізінің национальнай пӧгіннері таныхтал парғаннар. Пӱӱн піс оларны толдырарға кирек кӧзідіглердеңер чоохтасхабыс.
Иң пастағызын, ікінҷілес чох, ол регион чуртағҷыларының парызын ӧскірері. Мында республикаа Сибирьдегі федеральнай округта 9-ҷы орыннаң кӧдіріле халар ӱчӱн кӱcтенібізерге киректелче.
Чидіглердеңер. Хакасия алынҷа инвестицияларны тартарынҷа чахсы салтарлар кӧзітче. Сибирьдегі федеральнай округтағы регионнар аразында ӱзінҷі орында турча. Хомай нимес кӧзідіглер наа тоғыс орыннарынҷа паза ниме-ноо, полызығлар сығарызынҷа. Піс ідӧк регионға ӧӧн кӧзідіглерні толдырарға полызар инвестиция проекттерін ӱзӱргебіс.
Тоғазығда Виктория Абрамченко регионда национальнай проекттернің чуртасха кирілчеткенін таныхтаан. Аның сӧстерінең, национальнай проекттернің кӧзідіглерін толдырарынҷа Хакасияның салтары хомай нимес – толдырылған сині 98,8 процент. Пірее проекттерні республика 100 процентке толдырыбысхан. Че национальнай проекттернің тоғыстарын толдырғанынаң пасха, ідӧк чуртағҷыларның ӱндезіглеріне хайығ айландырарға кирек.
– Пістің паалааныбыстаң, регионда кізілер ӱс ағырсымнығ кӧстегні таныхтапчалар. Ол имнег полызығларының сині паза тузаланар оңдайы, социальнай полызығларны алғанына чӧпсінгені паза ӱзінҷізі – регион операторының тоғыс сині. Орта чоохтаза, сӧп-сап чыылчатхан орыннаң аны хай син удаа паза хай син чахсы сығарчалар паза республикада сӧп-сапты пӧлерінҷе паза тимнирінҷе тоғыс хайди иптелген. Сағам, тізең, хомзынысха, кізілер ол тоғысты кӧрбинчелер, – таныхтаан вице-премьер.
Аннаң пасха, Виктория Абрамченко Валентин Коноваловнаң хада Сибирьдегі федеральнай округтың тиліс стратегиязындағы проекттернің чуртасха кирілчеткенін ӱзӱрген.
– Хакас Республиканың нинҷе-де проекті Россия правительствозы чарадыбысхан 2035 чылға теере Сибирьдегі федеральнай округтың тиліс стратегиязын чуртасха кирҷең планға кирілген. Ол Хакасияның аал хонии промышленнозының кластері тилізі паза сыр сығарарынҷа завод пӱдірии, электродтар ӧртеҷең песті нааҷылиры паза металлургия кластері тилізінҷе алюминий ниме-ноозын сығарарға кӱстерні ӧскірері, ідӧк Пиидегі хара тастығ орында участоктарның тилізі. Ізенчем, инвестиция проекттерін чуртасха киргені, тоғынчатхан инвестиция ачыхтарының тилізі, алынҷа экономика орнын тӧстеені регионның тилізіне паза ӧзізіне пілдірте тӧстег полыбызарлар, – таныхтаан Виктория Абрамченко.
Сӧп-сап реформазынҷа чыылығ
Азығ айының 14-ҷі кӱнінде Россия правительствозының кнес орынҷызы Виктория Абрамченко Сибирьдегі федеральнай округтың регионнарында ТКО реформазы чуртасха кирілчеткенінҷе видеоселектор чыылиин иртірген. Чыылығ соонаң Виктория Валериевна аның салтарларын хабарҷыларға искірген:
– Киҷее (азығ айының 13-ҷі кӱнінде. – Авт.) піс регион правительствозы командазынаң хада ӧӧн пӱдірігні турғысчаң нинҷе-де чир участогын кӧр килгебіс. Ӧӧн пӱдіріге cӧп-сапнаң тоғынар, аны чох идер паза аны хайраллаҷаң амғы тусха килістіре орыннар кирілер. Хазна пазының чахиинҷа піске 2030 чылға теере хайраллалҷаң сӧп-сап синін ікі хати хызырыбызарға киректелче. Аның ӱчӱн сӧп-саптаң тузаланысха парар чардыхтарны таллирына, олардаң ниме-ноо сығарарына паза тузазы чох поғыр-похсахты хайраллирына хайығ айландырарға киректелче. Андағ оңдайнаң сӧп-сапнаң тоғыс чабыл парар.
Амды специалисттер ӧӧн пӱдіріге килістіре чирні таллапчалар: ол логистикаҷа улуғ хорадығларға ағылбасха паза чуртағҷыларға турғызылған пааларны ӧскірбеске кирек.
Виктория Абрамченко Сибирьдегi регионнар
пастарынаң ВКС иртiрчеткен туста
Виктория Валериевнаа ідӧк Хакасияда киректелчеткен сӧп-сапнаң тоғынҷаң заводты пӱдіреріне федеральнай кіннең хабазығ полар ба, аны алып алар ӱчӱн, регион ӱлгӱлері ниме идерге киректер паза хай син ахча позыдылар тіп сурығлар пирілген.
– Регион иң пастағызын чир участогын таллап аларға кирек, андар коммунальнай инфраструктура сетьтерін тартарын, чол суриин пӧгібізерге, проект-смета пічіктерін тимнебізерге, экспертизаларны иртібізерге кирек, аны хоостыра піс федеральнай кіннең хабазығ позытчабыс. Капитальнай грант пирілер алай регионның хорадығларына субсидия позыдылар, – таныхтаан Виктория Абрамченко. – Прай пічіктер тимде полза, сах андох хазна хабазии пирілер.
Вице-премьер ідӧк «Аэросити-2000» регион операторы тоғызын толдырбинчатханынҷа сағыс-кӧрізінең ӱлескен:
– Мин социальнай сетьтерде хоптарны кӧргем, ол иң не ағырсымнығ ӱс сурығ санына кірче. Хазых хайраллирынаң пасха, республикада сӧп-сапты тузында сығарарынҷа сурығ турча. Федеральнай экология операторы республика ӱлгӱлеріне регион операторынаң тоғысты иптирге хабас пирзiн тiп, піс Денис Петрович Буцаевнең («Россияның экология операторы» азых-право компаниязының ӧӧн директоры. – Авт.) ол сурығны ӱзӱргебіс.
Экология – хайығда
Таныхтирға кирек, Виктория Абрамченко Харатас городта тӧреен-ӧскен, аннаңар пістің республика ағаа чахсы таныс. Хабарҷылар аннаң пӱӱнгі республикада ниме харахха тасталчатханынаңар сурғаннар.
– Республиканаң айғазарға кирек, – таныхтаан Виктория Валериевна. – Иң пастағызын, чуртағҷылар чахсы экологияа турыстығлар. Мин Хакасияда илееде тус полбаам, аннаңар иң пастағызын минің хараама хап-хара хар тасталған. Сірер кӧнік парғазар, минің хараама, тізең, андағ харны кӧрерге тың изі чох. Cірер пілчезер, Хакасияның нинҷе-де городы узарадылчатхан «Арығ кии» программаа кирілген, киҷее піс алынҷа экология проекттерін ӱзӱргебіс. Олар чуртасха амох кирілерлер. Ол алынҷа тураларны хара таснаң одынарынаң пасха оңдайнаң чылығ читіреріне алыстырары, аның ӱчӱн регион тирігні алыстырарға хабазар, тураны чарытхы полызиинаң чылыдарға пӧгінчеткен ээлерге пааны тӱзірер. Город транспортын алыстырарын ӱзӱргебіс. Амғы тусха килістіре паза экологияа ӱрег ағылбинчатхан транспортха кірерге киректелче. Промышленность предприятиелерінең алынҷа тоғысты апарарға киректелче. Иң пастағызын, ол хара тас аныпчатхан предприятиелер. Мин позыма андағ тоғазығны иртірерге пӧгінге турғыс салғам.
Валентин Коновалов вице-премьерні Хакасияа читірілчеткен хабазығ паза хайығ ӱчӱн, региондағы ӧӧн сурығларны пӧгерге паза федеральнай синде регион пастағларын кӧдірерге полысчатхан ӱчӱн алғыстаан.
Виктория Абрамченко араласхан сылтаанда «Экология» нацпроекттің «Арығ кии» федеральнай программазына Ағбаннаң Харатасты кирерінҷе тоғыс апарылған, ідӧк Хакасия правительствозының пу проекттің тоғыстарын толдырарынҷа пастаана хабазығ пирілген. Россия правительствозының кнес орынҷызы хабазиинаң Сорығдағы сығарыс комплексін хайраллап халарынҷа сурығ пӧгілген, Хакасия федеральнай кінзер сыххан пасха даа пастағларға чол азылған.
Сомнар Дмитрий Сунчугашевти
Автор :
Наталья Сюптерекова
| Пн | Вт | Ср | Чт | Пт | Сб | Вс |
| 25 | 26 | 27 | 28 | 29 | 30 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
