Хайылчатхан хар даа харығ нимес
15.02.2024
Хабарлар
Амох... амох чидіп алар алнындағыларға
Саналығ чӱгӱріс. Сыбыра кӧп кізі араласчатхан тиксі Россия синіндегі «Лыжня России» саналығ чӱгӱрер арға-мӧрiй пӱӱл Ағбанның тынағ паркында 42-ҷі хати иртірілді
Хысхының иң соох айында хар хайылчатханы саналығ чӱгӱрер марығда аралазарға килген улустың кӧңнін тың на тӱзір полбаан. Аннаңар Ағбанның тынағ паркында кӧгліг суулас, хатхы-кӱлкі ӱр нимеске дее тохтабинчатхан.
– Пӱӱн уғаа танығлығ кӱн. Iскеркі чон Наа чылны таныхтапча. Хонҷых Тувада андағох ӱлӱкӱн пайрамналча. Піс Чыл пазын март айда таныхтирбыс. Тынағ паркынзар піди кӧп кізі чыылысханын кӧрерге ӧріністіг. Олар прайзы тиксі Россия синінде чыл сай иртiрілчеткен саналығ чӱгӱрер марығда аралазарлар. Спортнаң айғасханы – хазыхты пиктеені паза тыытханы. Аннаңар прайзына улуғ алғызым читірчем. Арға-мӧрійде араласханы хаҷан даа ынағлас оңдайында иртче, – мындағ чылығ сӧстернең асхан теестегі саналығ чӱгӱрер марығны Хакасия пазы Валентин Коновалов.
Валентин Олеговичтің соонаң сӧс пирілген Ағбан город пазы Алексей Лёминге. Алексей Викторович позының чооғында тилекейдегі хазналар Россияда спорт тилізін чабыра пазып аларға хайди матап харасчатханнарын таныхтаан.
– Че пістің хазнадағы спортсменнер хайдағ даа марығларға уламох кӱстеніп тимненчелер. Кӧзідімнері хоостыра чир ӱстӱндегі иң кӱстіглер санына кірчелер. Уламох саналығ чӱгӱрчеткеннер, – улуғ ӧріністе искірген Ағбан город пазы.
Анаң Алексей Лёмин саналығ чӱгӱрер марығларны пастирдаңар чарадығ пирген. Иң пастап постарының устарын сынааннар прайзынаң кічіглері. Оларның хыринда iҷе-пабалары, аға-ууҷалары оңнығ ла ӧткін хайыныспинчалар, ӧнетін тимнелген саналарға килістіре турғыс саларға кӱстенчелер. Марығ араласчылары аразында иң кічиине 2,5 час. Ағаа 100 метрні иртібізерге кирек. Туған-чағыннары полысчалар.
Егор Шулбаевке, тізең, 3 час. Пу марыға ол ӧнетін тимненминдір. Че санаа ол позы турып алған, 100 метрні пір дее аңдарылбин иртібіскен, хыринҷа пастырчатхан iҷезінің полызиинаң тузаланмаан. Прайзы аны, махтап, кӧӧктір турған.
– Минің ӱс пала. Прайзы спортнаң айғасча. Улии Арсений бассейнге чӧрче, суғҷа чӱсче. Iдӧк ол самбо секциязында кӱннер иртірбеске харасча. Хызым теелбектер кружогына чӧрче. Амды очызы санаа турыбысты, – ӧрінізін чазырбинча хазых чуртасха тартылчатхан палаларның паарсах iҷезі Вера Шулбаева.
Паза пір кiчiг частығ спортсмен сомға суурынарға матап хынчатхан полтыр. Ол тиң частығлар аразында чиңic тударға матап кӱстенген. Тадылығ сыйых алып алғанына Матвей оңнығ ӧрінминче. Ағаа 4 час.
– Олған садынзар киліп, оолағастарны саналығ чӱгӱрер марығда аралазарға чӧптеп сыхханнарында, оолғым сах андох ынабысхан. Амды чыл сай араласча, – махтапча палазын Матвейнің iҷезі Анжела Килижекова.
– Пістің сӧбіредең пу марығда тӧрт кізі араласча. Палаларымны саналығ чӱгӱрерге ӱгрет салғам. Амды конькиліг чыларға кӧніктірчем, – чоохтапча Екатерина Морозова, хайзы-да палазын чиңicке кӧӧктірчеткен туста.
Иң улуғ частығ араласчы Борис Бабанаков полча. Ағаа 85 час. Аның ӧӧн пӧгіні – сыйыхтығ орынға сығып алары. Тиң арах частығлар санында хаҷан даа кізі соона халбаҷаң. Ам даа аның холы хуруғ нимес.
Тиксі Россия синіндегi саналығ чӱгӱрер марығның прай араласчыларын, сыйыхтығ орыннарға сыхханнарны спорт пайрамынаң чылығ алғыстааннар.
Сом Хакасия пазының телеграм-каналынаң
Автор :
Тимнеен Анатолий Султреков
| Пн | Вт | Ср | Чт | Пт | Сб | Вс |
| 30 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
