Ӧменең иткен тоғыс ниик поладыр
31.01.2024
Хабарлар
Виктор Чепчигашев Дмитрий Тодышевке хакас тілін тилідерінде ӧткін араласхан ӱчӱн таңма читірче
Сан пиріс. Наа чыл пасталчатханда, хазна ӱлгӱлері ле нимес, че iдӧк халых пірігістері ирткен чылның салтарларын ӱзӱрчелер
Iди ӱр ниместе хакас чонның Ағбан городтағы улуғлар чӧбі президиумының чыылии ирткен. Анда 2023 чылның салтарларынаңар чоохтасханнар паза 2024 чылның пӧгіннерін турғысханнар. Чыылығны апарған городтағы улуғлар чӧбінің кнезі, Россия МВД-зының ветераны, отставкадағы полковник Виктор Чепчигашев.
Хакасияның Улуғлар чӧбінің Ағбандағы пӧлии позының тоғызында хакас чонның ХIV съездінің чарадығларына тӧстенген. Оларға ӧӧнінде кірчелер: тӧреен тілібісті хайраллиры паза тилідері, полған на хакас сӧбірезінде палалар пос тілінең чоохтазарға киректер; хакас чонның посты улуғлир киктезіне тӧстеніп, чииттерні чир-сууна хынарға ӱгретчең тоғысты тӧреміл апарарға; хакас чонның кибірліг культуразын тилідерге, Ағбан город устағ-пастаанаң хада-пірге городтағы этнокультура ӧргезін азарын пӧгерге; городтағы пӱдіріглер архитектуразында национальнай кӧрімнернең тузаланарға, спорт марығларында хакас чонның спорт кӧрімнерін кирерге паза даа пасха.
Ағбан городтағы улуғлар чӧбінің ӧӧн тоғызын аның президиумы апарча. Сағам андар 13 кізі кірче. Чоохтирға кирек, олар прайзы даа Хакасияда чонға таныс паза саблығ кізілер. Iди хакас тілін ӱгредер киректе улуғ тоғыс апарчалар Хакасияның ӱгредіг паза наука министрінің пастағы орынҷызы Марина Сагатаева, олох министерстводағы национальнай пӧлік устағҷызы Ольга Доможакова, Ағбан городтың ӱгредiг устанызының пастых орынҷызы Дмитрий Тодышев, Н.Ф.Катановтың адынаң Хакас хазна университедiнің доценті, педагогика наукаларының кандидады Андрей Карамчаков, национальнай спорт киреен кӧдiрчелер Артем Асочаков, ол алында кӧп чыл Хакасияның физкультура паза спорт министрінің орынҷызы полған, iдӧк Михаил Кунучаков, ол Ағбан городтағы устағ-пастағда спорт киреен апар турған. Хакасияның искусство паза литератураҷа тоғыстарны маңнаныстығ апарчалар Россияның культураҷа саблығ тоғынҷызы Игорь Боргояков паза Хакасияның чон артизі Герман Танбаев, iдӧк писательлер Альбина Курбижекова паза Илья Топоев. Хазых кирее сурығларын пӧкче саблығ хирург имҷі Сергей Макин. Городта ла нимес, че прай даа Хакасияҷа кізілерге полызарға кӱстенче «Благодарение» фонд устағҷызы Тарика Торокова.
Кӧрчезер, мындағ cаблығ кізілернің тоғыстары хайди хомай парар. Президиум позының тоғызында Ағбан городтағы устағ-пастағнаң, халыхтар пірігістерінең паза алынҷа кирек кізiлернең дее палғалыстар тутча. Чыл пазы, Чир ине, Тун пайрам, Ӱртӱн тойы паза даа пасха ӱлӱкӱннерні иртірерiнде ӧткін араласча. Iдӧк городтағы iстеніс ӧмезiнде пӧліктерде хакас чонның ХIV съездінiң паза хакас чонның посты улуғлир киктезінің чарадығларын чарыт турғаннар, школаларда, олғаннарнаң тоғазып, оларға чир-суубыстың тархынын чоохтапчалар, алыптығ нымахтарнаң таныстырчалар. Мында ӧткін тоғынғаннар тахпахчы Альбина Курбижекова паза Хакасия гимнінің кӧг авторы Герман Танбаев.
Пӱӱл Россияда Сӧбіре чылы чарлалған. Городтағы улуғлар чӧбі республикадағы «Тӧреен тілібіс – чоныбыc худы» сӧбірелер мариин иртiрерінде ӧткін араласча. Тахпахчылар паза ырҷылар марығларында президиум кізiлерi чарғыҷылар полчалар.
Хоза чоохтирға кирек, городтағы улуғлар чӧбi пылтыр 200 муң салковайға республика правительствозының грантын алған. Ол грант ахчазы чоннаң тоғазығларны паза аймах-пасха мероприятиелерні иртірерiне парған. Iдӧк тіл паза культураны тилідерінде ӧткін араласчатханнарға ӧнетін иділген таңмалар сыйлапчалар.
Iди чыылығда, ирткен чылның салтарларын ӱзӱріп, пу чылға пӧгіннер турғысханнар.
Сом Ольга Доможаковани
Автор :
Илья Топоев
| Пн | Вт | Ср | Чт | Пт | Сб | Вс |
| 25 | 26 | 27 | 28 | 29 | 30 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
