Кӱресчі хыстарның чалтырама чидии
31.01.2024
Хабарлар
Наталья Пудова (сол саринаң), тренер Владимир Чучунов паза Наталья Малышева
Спорт. Хызылчарда «Иван Ярыгиннің кубогы» чоннар аразындағы марығ кӱрген айының 25 – 28 кӱннерінде ирткен
Пӱӱл саблығ турнирде 23 хазнаның – Россияның, Белоруссияның, Монголияның, Иранның, Хыдаттың, Ӱстӱнзархы Кореяның, Грузияның, Индияның, Турцияның, Молдавияның, Сирияның, Арменияның, Азербайджанның, Албанияның, Кубаның, Аргентинаның, Венесуэланың, Эквадорның, Казахстанның, Таджикистанның, Туркменияның, Киргизияның паза Узбекистанның – спортсменнері араласханнар.
Хакас кӱресчі Наталья Малышева, тӧрт тоғазығ иртiрібізіп, 53 кг кӧдірімде алтын медаль холға кирген. Таллағ тузында ол Мадина Усмонжонованы (Узбекистан) 7:0 саннаң чиңіп алған. Финалның тӧртінҷі чардығында чир-суғҷыбыс Ирина Ологонованы (Россия) 2:0 саннаң утхан. Чарым финалда Наташа Екатерина Полещукнаң (Россия) харбасхан. Сан – 3:2. Азах меетте хакас абахай Анжелика Ветошкинанаң тоғасхан. «Ыырҷызынаң» Наталья Малышева чахсы таныс. Пылтыр Россия чемпионадында олар ідӧк финалда харбасханнар. Амғы тоғазығ оой нимес ирткен. Харбазығның пастағы чардығында Наташа утчатхан. Анжелика, тӧдір пазынарға хынмин, матап удурланған. Че халғанҷы секундаларда пістің кӱресчі чиңісті кӱснең алып алған. Абахай спортсмен тренерлер Владимир паза Леонид Чучуновтарның устаанынаң харбасча, пастағы тренері – Леонид Бутонаев.
Наталья Пудова 50 кг кӧдірімде хола призер полыбысхан. Тӧӧ чирінең сыххан кӱресчі соон сӱрістіре ӱс «ыырҷызын» – Елена Дьяченконы, Жасмин Иммаеваны паза Анжелика Фёдорованы – чиңіп алған. Че чарым финалда Наташаа оң полбаан. Ол Мария Тюмерековаа 0:7 саннаң утыр салған. Хола медаль ӱчӱн Пудова Венера Нафикованаң харбасхан. Пістің хыс «ыырҷызын» учаландырыбысхан. Чир-суғҷыбыс улуғ спортсар пастағы хаалағларын тренер Евгения Карамчакованың устаанынаң иткен, халғанҷы чыллар Марат Кичеевтің холында узын таптапча. Чоохтирға кирек, Ярыгиннің турнирінде 50 кг кӧдірімде Мария Тюмерекова ікінҷі чылы изере чиңіc тутча. 2021 чылдаң ол Кемеров облазы ӱчӱн харбасча.
Тиксі алза, Россияның командазы 15 алтын, 10 кӱмӱс паза 28 хола медаль утхан. Ікінҷі орынға сыххан Монголияның ӧмезі. Аның спортсменнері хазнаа 4 алтын, 7 кӱмӱс паза 2 хола медаль ағылғаннар. Ідӧк Белоруссияның командазы чахсы харбазыбысхан. Аның 1 алтын, 2 кӱмӱс паза 1 хола медаль.
Сом r-19.ru сайттаң
Автор :
Валерия Тамбовцева
| Пн | Вт | Ср | Чт | Пт | Сб | Вс |
| 30 | 31 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
