Прай сынағларны хада тобырарбыс
26.01.2024
Хабарлар

Полызығ. Пірге тоғынардаңар наа чӧптезігде Хакасия пазы Валентин Коновалов паза ЛНР-ның Свердловск муниципальнай округы устағ-пастааның пазы Андрей Сухачев хол салғаннар
Хакасия пазы Валентин Коновалов Луганск Чон Республиказынзар теестегі тоғыс чорығынаң чӧрген. Чорых тузында, 24 январьда, Хакасия правительствозы паза ЛНР-ның Свердловск муниципальнай округы устағ-пастаа аразында пірге тоғынардаңар наа чӧптезіг иділген. Пу ікінҷі чӧптезіг. Пастағызы ирткен чылның май айында иділген.
Хакасия паза Россияның наа регионының муниципалитеді – ЛНР-дағы Червонопартизанск город – аразында пірге тоғыс аймах-пасха кӧстеглерҷе тӱзімніг апарылча.
Часхызын иділген пастағы чӧптезіг соонаң, хаҷан пістің республика ЛНР-дағы городты хайыға алып алған, гуманитарнай тоғысча, полызығ пирерінҷе паза амыр чуртасты оңдайлирына хабазарынҷа, экономиканы азахха турғызарынҷа, чуртасха кирек сурығларны пӧгерінҷе улуғ тоғыс толдырылған.
Андрей Сухачев республика правительствозы ікі сарилығ хайызығларны тилідеріне хозым иткен ӱчӱн Валентин Коноваловха паза ол тоғыста араласчатхан прай кізілерге алғызын читірген:
– Пӱдіріг бригадаларының тоғызы ӱчӱн паза пістің палаларға хазыхтанарға полыс пиргеніңер ӱчӱн алғызым читірчем. Пістің палғалыстар тыыпчалар паза таңдағы кӱнге ізеніс пирчелер, піс чалғыс нимес, илбек хазнаның чардығы полчатханыбысты оңарарға оңдай пирчелер. Пістің чирде пол парған прай аар сынағларны піс сірернең хада, тиксі хазнанаң хада турыстығ тобырарбыс. Киртінчем, піс хайди даа чиңіп аларбыс паза таңдағы тӧллерібіске амыр чуртас пӱдірербіс.
Хакасия пазы пу тӱзімніг апарылчатхан пірге тоғыс мыннаң мындар узарадылар тіп чоохтаан:
– Ізендірчем, пу хабазығны піс узарадарбыс. Ол ӱгредігҷе, спортча, культураҷа пірге тоғынары. Киртінчем, 2025 чылға теере кӧрілген прай пӧгіннерні, хайзын піс пӱӱнгі чӧптезігнең тыыт салғабыс, піс толдыр саларбыс.
Сарилар наа чӧптезіг хоостыра ӧӧн пӧгіннерні паза оларны пӧкчең оңдайларны кӧр салғаннар.
Хакасия правительствозы пір чылдаң ас тусха толдыр салған тоғыстарның сині уғаа улуғ, кӧзідімге Червонопартизансктың ӱгредіг учреждениелерін тиксі тыхтирында. Хакасиядаң парған пӱдіріг ӧмелерi олған садын паза школаны толдыразынаң нааҷылабысханнар, ибіркізін иптеп салғаннар. Прай тоғыстарны, уғаа хысха тус аразына толдырып, азынада тоос салғаннар.
Пу чылға пӧгінде – пазағы ӱгредіг объекттерін, кӧзідімге Свердловск городтағы, нааҷылиры паза тыхтир тоғыстарын апарары.
ЛНР чирінде чылығ пирер тусты хорғыс чох иртер ӱчӱн, Хакасиядаң парған саайларны чох итчең ӧме тоғызын узаратча.
Шеф полызии хоостыра ЛНР-ның Свердловск муниципальнай округына ӱгредіг, культура паза спорт кӧстеглерінҷе хабазығ пирілче.
Іди спортсменнерге спорт кип-азаа паза тиріглер ызылған, тиксі ӱгредіг школаларына – физкультура уроктарын иртіреріне меспектер. Ікі регион пірге марығлар иртірче.
Нинҷе-де муң ӱгредіг паза хоос литература книгалары, наа кӧг оборудованиезі ызылған, кинолар кӧзіділче, кӧзідіглер апарылча.
ЛНР-ның 150-ҷе ӱгренҷізі Хакасия правительствозы алған путевкалар хоостыра Азов талайындағы олған лагерьінде тынан килген.
Пірге тоғынҷаң сурығларны чапчаң паза чахсы толдырар ӱчӱн, Хакасия правительствозының наа регионнарнаң палғалыс тударынҷа чӧбінің кізілері ЛНР-да тӧреміл орныхчалар.
Сом авторни
Автор :
Хакасия пазының паза Хакасия правительствозының пресс-службазы
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 1 | 2 |
Кӱн таңмазы
Хакасияда
Россияда
Тилекейде