Город 872 кӱн хурчағда полған
26.01.2024
Хабарлар

Хакасия пазының орынҷызы Михаил Побызаков хурчағдағы Ленинградтың чуртағҷызы Софья Александровна Серикованы пайрамнаң алғыстаан
Ленинград фашист хурчаанаң позыдылғанына – 80 чыл. Россияның чааҷылар сабланызы кӱні – Ленинград фашист хурчаанаң саңай позыдылған кӱн – хазнада чыл сай 27 январьда таныхталча. Ол танығлығ кӱн федеральнай законнаң турғызылған
Гитлер 1941 чылда Ленинградты саңай чох идер пӧгіннең городты чаалап сыххан. 8 сентябрьда город ибіре хурчағнаң саңай чабылған. Анда 2,5 миллион чуртағҷы, ол санда 400 муң пала полған. 872 кӱн Ленинграднаң палғалыс Ладога кӧлҷе паза кииҷе тудылған. Ыырҷы, тудығ чох городты артиллериядаң атып, бомбалар тастап турған, аны холға кирерге кӱстенген.
Пилетелген ас-тамах, топливо даа уғаа асхынах полған. Городта ӧзӧгiс пасталған, чылығ пирҷең оңдай чох полыбысхан, транспорт чӧрізі тохтап парған, ағаа хоза бомбалар тасталчатханы тохтабин турған. Кiзiлер чӱзер-муңарнаң ӱрепчеткеннер. Че ленинградтағылар iстенерін тохтатпааннар, прай даа учреждениелер, типографиялар, имнег туралары, театрлар тоғынғаннар. Саарбахтар фронтха парыбысхан пабалары орнына заводтарда тоғынғаннар.
18 январьда 1943 чылда Ленинград паза Волхов фронттары, наступлениее парып, хурчағны ӱзе сапханнар. Оларға Балтийскай флот, Ладогадағы флотилия паза авиация полысханнар. Iди городтың хазнанаң палғалысчаң ніске коридор азылған.
1944 чыл пасталчатханда ыырҷы пик оборонада турыбысхан. Совет командованиезі Ленинград, Волхов паза 2-ҷi Прибалтийскай фронттарның армиялары кӱстерiнең паза Балтийскай флотнаң наступление пастаан.
27 январьда 1944 чылда, совет войсколары 872 кӱн узараан фашист хурчаан городтаң саңай суурыбысханнар. Ағаа чарыдып, Ленинградта пайрамнығ салют ирткен.
Хурчағда полған Ленинградта 1,093 миллион кізі ӱреен. Оларға Пискарев паза Серафим сыыраттарының хумартхы ансамбльлары чарыдылчалар. Город ибіре хурчағ чолынҷа Кӧк сабланыс хуры тӧстелген. Хурчағ тузында махачы, сындырлығ паза матыр тудынған ӱчӱн город Ленин орденiнең сыйыхтатхан, ағаа «Матыр город» аарластығ ат пирілген. «Ленинградты арачылаан ӱчӱн» медальнаң 1,5 миллион кізі сыйыхтатхан, 226 город арачылағҷызы Совет Союзының Матыры полыбысхан.
Амғы туссар айланза, Хакасия правительствозының кізілері, Ағбанда чуртапчатхан «Хурчағдағы Ленинградтың чуртағҷызына» танығ пар ветераннарны ӱлӱкӱннең алғыстап, оларға аймах сыйыхтар читіргеннер. Iдӧк ветераннарға Санкт-Петербургтың правительствозы чарадыға алған «Фашист хурчаанаң Ленинград саңай позыдылғанның 80 чылына чарыдылча» аарластығ танығ сыйыхтары читірілген. Амды хурчағдағы Ленинградтың 12 чуртағҷызы Хакасияда чуртапча. Олар прайзы республика правительствозынаң пайрамға аарластығ танығлар паза сыйыхтар аларлар.
– Хурчағдағы Ленинградтың чуртағҷылары махачы тудынғаннар, оларның, посха айабин, сындырлығ тудынызы паза патриотизмі, чонның сағызында хаҷанға даа халып, прай тӧллерге кӧзідім полар. Сірернің алныңарда пазыбыс тӧбін тӱзірчебіс! Сірернің тураңарда хаҷан даа амыр паза чахсы чуртас ползын! Пик хазых, узах чуртас, туған-чағыннарыңның хайии паза хынызы сірерге! – айланған хурчағдағы Ленинградтың чуртағҷыларынзар Хакасия пазының орынҷызы Михаил Побызаков.
Сом r-19.ru сайттаң
Автор :
Тимнеен Николай Султреков
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 1 | 2 |
Кӱн таңмазы
Хакасияда
Россияда
Тилекейде