Чылны чидіглердең пастапчалар
24.01.2024
Хабарлар
Тимур Чепчигашев ӱзінҷі орын ӱчӱн харбасча
Марығ. Пу кӱннерде грек-рим кӱрезінҷе арға-мӧрійлер ирткеннер
Россияның призерлары
Грек-рим кӱрезіне хынчатхан улус тынағ кӱннерінде маң чохтанды. Москва облазындағы Наро-Фоминск городта Россия чемпионады ирткен нооза. Анда 56 регионның спортсменнері кӱстерін сынааннар. Тиксі алза, 311 кізі. Пістің республика ӱчӱн Гаврил Анжиганов (63 кг, тренері – Владимир Покояков), Юрий Боргояков (67 кг, тренері – Вадим Топоев), Азизбек Абдурахимов (72 кг, тренері – Виталий Чичинин) паза Тимур Чепчигашев (87 кг, тренері – Владимир Покояков) турысханнар. Анжигановнаң Чепчигашев ідӧк Хызылчар крайы ӱчӱн харбасчалар.
Пылтырғы чемпионатта кӱресчілерібіске оң полбаан. Хакасия медальлар чох халған. Пӱӱл кирек хайди парыбызар ни? Боргояков паза Абдурахимов утыр салғанда, Гаврилнең Тимурға ізеніс халған. Ікізі дее пӧзік устығ кӱресчі. Анжиганов Пии аймаандағы Киндірліг пилтірі аалдаң. Ол 2022 чылда Россия мариинда хола медаль утхан, пылтыр Новосибирскте ирткен чоннар аразындағы турнирде чиңіс тутхан. 63 кг кӧдірімде Мордовияның кӱресчілері азах меетке сығып алдылар. Пістің оол ӱзінҷі орын ӱчӱн харбасча. Аның «ыырҷызы» – Анзор Карагулов (Москва). Кӱресчілер пастағы секундадаң кибісте ӧткін хайын сыхханнар. Карагулов утча. Пастап сан 4:5 полған, анаң – 4:10. Анжиганов 5:11 саннаң утыр парир! Залға толдыра хысхырыстар. Пос спортсменi ӱчӱн чон «ағырчатпас па». Хакас кӱресчі, оңдай таап, Карагуловты учаландырыбысты. Хакасияның пастағы хола медаль!
Тимур Чепчигашев ідӧк ӱзінҷі орын ӱчӱн харбасхан. 27 частығ спортсмен Ис аалдаң. Аның пастағы тренері – Александр Михайлович Худяков. 2023 чылда хакас оол пизінҷі орыннаң пӧзік кӧдіріл полбаан. Пӱӱл хылии паза узы чидер ни? Тиктең чӱрексінтірбіс, 87 кг кӧдірімде харбазығ драма чох ирткен. Чепчигашев «ыырҷы» Александр Даниловты (Нижегородскай облаcть) 8:0 саннаң чиңіп алған.
«Хакас чирі» газетаның хабарҷызынаң Россияның хола призерларының пастағы тренерлері сағыстарынаң ӱлескеннер. Гаврил Анжиганов Хакасияның физическай культуразының паза спортының саблығ тоғынҷызы Радион Мылтыгашевтің холында узын таптаан. Радион Иванович таныхтаан:
– Оолларбыстың чидіглеріне прай чӱреемнең ӧрінчем. Спортсменнер, сыйыхтығ орыннарға сығып, тӧреен чирін ырахха сабландырчалар. Гаврил пабазының чолын пасча. Герасим Анжиганов грек-рим кӱрезінҷе СССР-ның спорт узы полған. Хомзынысха, чуртастаң ирте парыбысхан. Ганя минзер, ікінҷі класста ӱгренчеткенде, килген. Аны чахсы харбазар тіп сах андох сизінгем. Чооғымны исчең, чахығларымны толдырҷаң. Ол Ағбандағы Олимп резерві училищезін тоосхан, спорт узына нормативті толдырыбысхан. 2015 чылдаң Хызылчарда чуртапча. Ол тренер Владимир Петрович Покояковтың устаанынаң ікі хати Россия чемпионадында хола медаль утты.
Тимур Чепчигашевтің тренері Александр Михайлович Худяков чоохтаан:
– Тимур кічігдең ачых-чарых кӧңніліг, кӱстенҷік пала полған. Аннаң чахсы кӱресчі сығарына пірдеезі ікінҷілебеен. Тренер Владимир Покояковты махтирҷыхпын. Владимир Петрович Томыҷахтар аалдаң, Хакасиянаң, чир-суғҷыларынаң пик палғалыс тутча. Аның устаанынаң Василий Топоев тилекей чемпионадында араласхан, амды Тимурнаң Гаврил турыстыра харбасчалар. Ооллар чоннар аразындағы класстығ спорт устарының нормативтерін толдырыбызарына ізеніс пар. Кирек киліскен полза, чахсы поларҷых.
Сибирь первенствозы
Олох туста Хакасияда Сибирьдегі федеральнай округтың первенствозы ирткен. Анда 18 часха читкелек саарбахтар араласханнар. Спортсменнер турнирге Сибирьнің тоғыс регионынаң килгеннер, ол санда Новосибирск, Омск областьтарынаң, Хызылчар крайынаң, Алтай паза Хакас республикаларынаң. Тиксі алза, 269 кізі. Олар 12 кӧдірімде кӱстерін cынааннар. Хакасия алнын 49 кізі алған.
Турнирні пайрамни азарында Хакасия пазы Валентин Коновалов паза Ӧӧркі Чӧптің чииттер политиказынҷа, туризмҷе, физическай культураҷа паза спортча комитеттің кнезі Александр Пащенко араласханнар. Аарлығ аалҷылар спортсменнерге чиңіс тударға, сіліг кӱрес кӧзідерге алғааннар.
Марығдаңар чоохтаза, тренерлер Аймир Карамчаковха паза Нурболот Жумакадыровха ізенгеннер. Пастағы спортсмен Асхыс поселоктаң. Амғы туста Олимп резерві училищезінде (техникумында) ӱгренче. Карамчаков 60 кг кӧдірімде харбасча. Пӱӱл СФО мариинда пу кӧдiрiмде 49 спортсмен узын сынады. Пик хуйахтығ Аймир азах меетке сығып алған, че алтын медаль ут полбаан. Саарбахтың тренерлері – Виталий Яковлевич Челтыгмашев паза Артём Михайлович Кулумаев. Нурболот Жумакадыров медаль чох халды. Че 45 кг кӧдірімде Алтаир Табурчинов чиңіс тутхан. 2009 чылда тӧреен спортсмен Ис аалдаң, аның тренері – Степан Самуилович Мамышев. Ағаа хоза, Табурчинов чиңіске кӱcтенген ӱчӱн алынҷа cыйыхха турысхан. Руслан Торточаков 42 кг кӧдірімде Хакасияа хола медаль ағылды. Чиит спортсмен тренер Геннадий Леонтьевич Бурнаковтың холында узын таптапча. Пір сӧснең, СФО первенствозында Асхыс аймааның кӱресчілері сыйыхтығ орыннарға сыхханнар. Марығ оңдайларынҷа Алтаир Табурчинов паза Аймир Карамчаков Россия первенствозында аралазарлар.
Сом WRESTRUS.RU сайттаң
Автор :
Майя Кильчичакова
| Пн | Вт | Ср | Чт | Пт | Сб | Вс |
| 24 | 25 | 26 | 27 | 28 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
