Физкультура ӱгретчiлерi хозылзын
24.01.2024
Хабарлар
Техникумдағы наа мастерскойны тирiндiрерiне 3 миллион азыра салковай хорадылған
Ӱгредiг. Харатастағы кӧп профильлiг техникумда наа ӱгредiг мастерскойы азылған
«Профессионалитет» федеральнай проекттiң «Педагогика» кӧстее хоостыра Харатастағы техникумда физическай культураҷа паза спортча ӱгретчiлернi тимнеҷең мастерской азылды. Iдӧк анда фитнесче тренерлер тимнелер. Чоохтирға кирек, пу проект хазна президентi пастаанынаң чуртасха кирiлче.
Хайди чоохтапча ӱгредiг учреждениезiнiң директоры Людмила Шаркова, наа ӱгредiг мастерскойы мының алнында склад полған орында орныхча. Федеральнай, республика бюджеттерi хабазиинаң паза ӱгредiг учреждениезiнiң ахчазына соох паза тастал парған пӱдiрiг пӱкӱлее тыхталған, чылығлалған паза иптелген. Спорт тирiглерiн аларына iдӧк кӧп ахча хорадылған. Наа мастерскойда студенттерге спортнаң айғазарға паза экзаменнерге тимненерге чарир.
– Наа ӱгредiг мастерскойы азылғаны пiске ӱгредiг программаларын алғыдарға, хазна сыныхтағларын, профессиональнай марығлар иртiрерге оңдай пирче. Пу орын студенттерге хазых пиктеҷең кiн паза алтын медальларға читчең орын ползын, – ӧрiнiзiн чазырбинча Людмила Михайловна.
Чоохтирға кирек, пу техникумның алтынҷы мастерскойы полча, хайзы федеральнай стандарттарҷа азылды. Аның алнында ӱгредiг учреждениезiнде пасха кӧстеглерҷе мастерскойлар тӧстелгеннерӧк.
Техникумда спорт кiнi азылғанынаң студенттернi паза ӱгретчiлернi Хакасия пазы Валентин Коновалов алғыстаан. Хайди ол чооғында таныхтаан, мастерской физическай культураның таңдағы ӱгретчiлерiне кӱстерiн пиктирге, пӧзiк чидiглерге чидерге оңдай пирер.
– Хакасия правительствозы ӱгредiг киреене алынҷа хайығ айландырча. 2017 чылдаң пасти пiс пу кӧстеге iкi хати ахча хосхабыс. 2019 чылдаң республикада сигiс школа, 17 олған садын пӱдiр салғабыс. Ағаа хоза, тыхтағ тоғыстарын кӧп апарчабыс паза колледж-техникумнарда мастерскойлар тӧстепчебiс. «Профессионалитет» проект, тiзең, регионнарға кирек специалисттернi тимнирге паза чииттерге специальность хоостыра тоғынып пастирға оңдай пирче, – теен Валентин Олегович.
Харатастағы кӧп профильлiг техникумнаң пасха, проекттiң «Педагогика» кластерiнзер кiрчелер: Харатастағы отрасльлар технологиялары техникумы, Саяногорсктағы политехническай техникум, Ағбандағы олимп резервi училищезi (техникум). Пу наада оларға хозылардаңар хоза чӧптезiг иткеннер Н.Ф.Катановтың адынаң Хакас хазна университедi паза Ширадағы аал хонии техникумы. Пу профессиональнай ӱгредiг учреждениелерi iдӧк регионға кирек специалисттернi тимнирлер.
Аннаң пасха, «Педагогика» кластерде тоғыс пирчеткеннернiң саны алғыдылған. Алты ӱгредiг учреждениезiне 11 школа паза олған сады хозылған. Оларның аразында Таштыптағы 2№, Ибiгдегi, Катановтағы паза даа пасха школалар. Чӧптезiгде хол салып, олар постарынзар студенттернi практикаа аларға паза дипломнығ специалисттернi постарынзар тоғысха аларға тимдезiн искiргеннер.
Наа мастерскойдағы физическай культуранаң паза фитнеснең айғасчаң амғы тустағы тирiглерге 3 миллион азыра салковай хорадылған. Наа орын азыларын студенттер чидiкпин сахтааннар. Техникумның студентi Диана Замолодинова халғанҷы курста ӱгренче. Тӱрче полза ол дипломнығ специалист полар. Наа мастерской азылғанына ол iдӧк ӧрiнче.
– Амға теере пiс техникумның спорт залында тренировкалар иртiрҷеңмiс. Ол iдӧк улуғ паза чарых, че анда мындағ чапсых тирiглер чох полған. Наа мастерской пiске хазна сыныхтағларына чахсы тимненiп аларға оңдай пирер, – чоохтапча техникумның студентi.
Хайди таныхтаан чооғында Хакасияның ӱгредiг паза наука министрiнiң тоғызын толдырчатхан Анатолий Бутенко, амды республиканың школаларында физическай культура уроктары прай иртiрiлче, че ӱгретчiлер кӧмес чидiспинчеткеннеңер оларға сала кӧп тоғыс апарарға килiсче. «Профессионалитет» федеральнай проект полызиинаң, тiзең, ӱгредiг организацияларынзар чиит ӱгретчiлер килерiне iзенiс пар. Физическай культура ӱгретчiлерi чидiссе, ӱгредiг синi дее кӧдiрiл парарға кирек.
Сом Дмитрий Сунчугашевти
Автор :
Оксана Сунчугашева
| Пн | Вт | Ср | Чт | Пт | Сб | Вс |
| 30 | 31 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
