Чуртастарын чайаачынаң палғалыстырарға пӧгінчелер
24.01.2024
Хабарлар
Пастағы парта кистінде Артёмнаң Анна одырчалар, кистілерінде – Ангелина паза Сабира, Дарья пасха рядта – оолнаң хада
Таңда – Россияның студенттер кӱнi. Республиканың культура министерствозының хуҷаанда азылған Хакасияның искусстволар колледжi ирткен чылда пастағы студенттернi алған
Пастағы курсха 76 оол-хыс алылған. Олар пис кӧстегҷе ӱгренчелер. Культура министрiнiң тоғызын толдырчатхан Светлана Окольникова Ӱгретчi паза ӱгредiг кӧстегҷiзi чылында апарылған тоғыстың салтарларын идерiне чарыдылған пайрамда оларның саны мыннаң мындар хозылар тiп таныхтаан. Россияның студенттер кӱнi алнында «Кӧг тирiглерiнең ойниры» паза «Хореография» кӧстеглерҷе ӱгренчеткен чииттернең чоохтазып алғабыс.
Ангелина Тохтобина Асхыстаң, 9-ҷы классты Калининдегi школада тоосхан. Анда ӱгренчеткенде, спортнаң айғасхан: ниик атлетика секциязына читi чыл чӧр салған, баскетболға – писче чыл. Iдӧк музыка школазынзар чӧрген, анда баяннаң ойнирға ӱгренген. Колледжсер кiрчеткенде, хакас чонның кӧг тирiглерiнiң пӧлиин таллап алған.
– Баяннаң читi чыл ойнап, пiрее пасха нименең айғазарға сағынғам. Ӱгретчiм Алёна Конусова мағаа кӧп пiлiс пирген, – чоохтапча Ангелина. – Колледжсер оол туңмамның полызиинаң кiрiп алғам тирге чарир. Ағаа тоғыс час, ол музыка школазында тӧртінҷi класста ӱгренче, чатханнаң, тимiр хомыснаң, гитаранаң ойнап полча. Сыныхтағлар иртiбiзер ӱчӱн, мағаа тахпах толдырарға паза iкi произведение ойнирға кирек полған. Ибде читi хыллығ чатхан пар, мин туңмамнаң аннаң ойнирға ӱгрет саларға сурынғам. Пiр сарын паза кӧг ӱгренiбiскебiс. Iди «чатхан» специальностьха кiрiп алғам.
Амғы туста ӱгренерiнең пасха, чиит хыс Хакас филармониязында iстен парча. Ол «Ӱлгер» ӧмеде ыыхнаң ойнапча.
Сабира Мамышева «хомыс» специальностьча ӱгренче. Чиит хыс iдӧк Асхыстаң. 1-ғы класста ол олған искусство школазының хоос пӧлиинзер чӧрген. Че анда тӱрче ле ӱгренген. Мин пiр чирде ӱр сым одыр полбинчам тiпче ол. Аннаңар музыканаң айғас сыххан, хомыснаң ойнирға ӱгренген. 7-ҷі класста ӱгренчеткенде, ол музыка колледжiнзер кiрерге сағыныбысхан. Iҷезi аның сағызынаң чараспинчатхан, че харындазы аны чӧптеп аларға полыс пирген. Сабира колледжте хынып ӱгренче. Мында специальностьча предметке, музыка школазының хыринда, кӧп тус пирiлче, аннаңар узын тилiдерге чахсы оңдай пар тiп чоохтапча ол.
Анна Карачакова, Артём Майнагашев паза Дарья Чебынова теелбек пӧлиинде ӱгренчелер. Анна Ағбаннаң, 24 № школаны тоосхан. Кiчiг полғанда, iҷезi аны «Айас» теелбек студиязынзар пирiбiскен. Андар он чыл чӧрген. 10-ҷы класс соонаң колледжсер кiрген. 9-ҷы классты тоосчатханда, пеер кiрерге алай кiрбеске бе тiп iкiнҷiлеен. Пiр чыл сағынып аларға тус алып алған. Че 10-ҷы класс соонаң ол колледжсер кiрiбiскен. Андағ чарадығ алғанына чиит хыс пiр дее хомзынминча. Мында ӱгренерге уғаа хынығ тiп таныхтапча ол.
Артём Майнагашев iдӧк Ағбаннаң. Теелбекнең пiр чыл артиинаң айғас парир. 1-ғы класста ӱгренчеткенде, ол Хакас филармониязындағы теелбек студиязынзар чӧрген, iкi ай пазынаң тастабысхан, андада теелбектенерге кӧңнiне кiрбеен. Оолах каратенi таллап алған. Iдӧк ол музыка школазында хомыснаң ойнирға ӱгренген, оркестрде тӱӱрнең ойнаптыр. Че ол туста чиит оол чуртазын чайаачынаң палғалыстырарға пӧгiнминчеткен, чааҷы поларға тiп сағынтыр. Че музыка школазын тоосханда, ол сольфеджио ӱгретчiзi поларға сағыныбыстыр, пу предмет кӧңнiне тың кiртiр. 7-ҷi классха Артём Хакас гимназиязар ӱгренерге кiрген. Анда теелбекнең айғас сыххан. Iди ол чуртазын теелбекнең палғалыстырарға чарадығ алған. Амғы туста ол Ағбандағы чииттер ӧргезiндегi теелбек ӧмелерiнзер чӧрче. Колледжте ӱгредиин тоосса, филармонияда тоғынарға халарға паза заочно пӧзiк ӱгредiг аларға пӧгiнче. Саблығ артист поларға итчем тiп ӱлескен сағыстарынаң Артём.
Дарья Пии аймаандағы Салғын аалдаң, 6 – 11 класстарда Хакас гимназияда ӱгренген. Пастап ол кӧг тирiглерiнең ойнир кӧстегнi таллап аларға иткен, че салтарында теелбек пӧлиинзер кiрiп алған. Чиит хыс Ағбандағы чииттер ӧргезiндегi амғы тустағы теелбектер ӧмезiнiң устағҷызы полча. Дарья, Артём паза Анна «Кӱн сузында» iстенчелер, iдӧк музыка колледжiндегi «Шейк» ӧмеде теелбек салчалар.
Ӧткiн чииттер чуртастарын чайаачынаң пик палғалыстырарға, ортын ӱгредiг алып, пӧзiк ӱгредiг аларға пӧгiнчелер. Cағынған сағыстары толзын тiп алғапчабыс.
Сом Дмитрий Сунчугашевти
Автор :
Татьяна Кыштымова
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
