Хабарҷыларның чайаачы паза нандырығлығ тоғызы ӱчӱн
17.01.2024
Хабарлар

Сыйыхха турысхан хабарҷыларыбыс (сол саринаң): Антон Чертыков, Наталья Тюкпеева, Наталья Сюптерекова паза Дмитрий Сунчугашев
Сыйыхтас. Хакасия пазы Валентин Коновалов Россияның печать кӱніне удур республиканың газета, радио, телевидение паза искіріг агентстволары хабарҷыларына хазна сыйыхтарын паза алғыстастарын читірген
Пайрамнығ тоғазыға республиканың паза город-аймахтарның СМИ устағҷылары, хабарҷылары паза пасха тоғынҷылары чыылысханнар, оларның санында полғаннар «Хакас чирі» республика газетазының ӧӧн редакторы Радион Сунчугашев, аның орынҷызы Наталья Сюптерекова, хабарҷы Наталья Тюкпеева, пос хабарҷызы Антон Чертыков паза сомҷы Дмитрий Сунчугашев.
Валентин Коновалов, прай хабарҷыларны профессия ӱлӱкӱнінең алғыстап, тӱзімніг тоғыстары ӱчӱн алғызын читірген паза чайаачы чидіглерге чидерге, сынға паза пос кӧрізіне тудынарға алғаан. Россияның печать кӱні прай хабарҷыларның профессия кӱніне саналза даа, ол газета-журналлар хабарҷыларының ӧӧн ӱлӱкӱні полча, аннаңар республика пазы газеталар амғы интернет паза телевидение тузында сыдамах тудынчатхан ӱчӱн, иң ыраххы ааллар чуртағҷыларына хабарларны читірерін узаратчатхан ӱчӱн алынҷа алғыстаан.
Аннаң пасха, Россиядаң тоғыр апарылчатхан чаа СМИ тоғынҷыларына тарапчатхан хабарларға уламох нандырығлығ хайарын киректепче. Хакасия пазының таниинаң, ол республика хабарҷыларына ідӧк теелче.
– Сынында сірер искіріг фронтында турчазар, – теен Валентин Олегович. – Хығырығҷыларға, кӧрігҷілерге, исчеткеннерге хазнаның кирексіністерін арачылапчатхан сын паза орта искірігні читірерге киректелче. Ол ідӧк сын чаалазығ парчатхан фронтта чидіглерге чӧлег полча.
Валентин Коновалов Хакасия правительствозының Аарластығ пічиин, Хакасия пазының алғыстазын, республика правительствозының алғыстазын тиксі 15 хабарҷаа читірген. Іди «Профессия пірігізі алнындағы чахсы киректер ӱчӱн» Россияның хабарҷылар пірігізінің Аарластығ таниин «Хакас чирі» република газетазының ӧӧн редактор орынҷызы Наталья Сюптерекова алған. Наталья Чорыевна хакас газетазының редакциязында 2007 чылдаң сығара істен парир. Хакасия правительствозының Аарластығ пічиин алғаннар «Хакасия» искіріг агентствозының ӧӧн редакторы Лариса Мазунина паза РТС телекомпанияның ӧӧн режиссёры Дмитрий Ипполитов.
Хакасия пазының алғыстазына турысхан хабарҷылар санында «Хакас чирі» газетаның хабарҷылары Наталья Тюкпееванаң Антон Чертыков полғаннар, Хакасия правительствозының алғыстазын алғаннар санында – сомҷы Дмитрий Сунчугашев. Оларға алғыстас тӱзімніг тоғыстары, республиканың чуртас-экономика тилізіне, хакас тілін, культуразын хайраллирына паза тилідеріне пос хозымнары ӱчӱн чарлалған. Республика пазының алғыстастарына турысханнар «Хакасия» газетаның хоос редакторы Лариса Баканова, «Хакасия» ГТРК-ның радио хабарҷызы Алевтина Букванова паза пасхазы.
Сыйыхтас соонаң Валентин Коновалов СМИ устағҷыларынаң паза хабарҷыларынаң чоох алысхан. Хабарҷылар республика пазына 2023 чылда гранттарнаң хабасхан ӱчӱн, СМИ тоғынҷыларын сыйыхтапчатхан ӱчӱн паза Хакасияда чахсы хабарларға оңдайлар тӧстепчеткен ӱчӱн алғыс сӧстерін читіргеннер. Чоох алызып, чей іскен соонаң пайрамнығ чыылығ араласчылары Хакасия пазы Валентин Коноваловнаң хада-пірге сомға суурынғаннар.
Олох кӱн сыйыхтар читірері «Хакасия» республика газетазында узарадылған. Хакасияның хабарҷылар пірігізінің кнес орынҷызы, «Ширинский вестник» газетаның ӧӧн редакторы Леонид Щепцов Россияның хабарҷылар пірігізінің Аарластығ пічіктерін читірген. Ағаа турысханнар «Хакас чирі» газетаның пӧлік редакторы Оксана Челтыгмашева паза хабарҷы Татьяна Кыштымова.
Таныхтирға кирек, чылдаң чылға Россияның печать кӱніне піcтің газета редакциязы ідӧк ӧменің тоғыс салтарларын итче. Пӧзік кӧзідіглерге читкен тоғынҷылар редакцияның Аарластығ пічиинең паза алғыстазынаң таныхтатчалар. 2023 чылның тоғыс салтарларынҷа «Хакас чирі» республика газетазының Аарластығ пічиине турысханнар: ӧӧн редактор орынҷызы Альберт Толмашов, пӧлік редакторлары Оксана Ивандаева, Николай Султреков, Анатолий Султреков, Татьяна Тютюбеева; алғыстас пічіктеріне – «Тӧреен тілім – хакас тілім» республика диктантының чиңісчілері, хабарҷы Татьяна Кыштымова паза корректор Елена Пастаева.
Пу неделяда, тізең, алғыстастар узарадылған. Кӱрген айының 15-ҷі кӱнінде «Хакас чирі» республика газетазының редакциязынзар Хакасияның ис-пай паза чир хайызығлары министрі тоғызын толдырчатхан Евгений Тарасов ааллап килген. Ол хакас газетазының тоғынҷыларын Россияның печать кӱнінең алғыстаан:
– Аарлығ арғыстар, сірерні профессия ӱлӱкӱнінең алғыстапчам! Полған на статья, полған на чоохтазығ, полған на репортаж – ол халыхтарны тӧстиріне теелчеткен ӧӧн оңдайлар. Сірернің полызииңарнаң піс республиканың аймах кӧстеглеріндегі чидіглердеңер, полчатхан киректердеңер паза сидіксіністердеңер піліп алчабыс.
Полған на кӱн хынығ искіріге сылтағлар табарға, сығарыста сағыстарыңны толдырып одырарға, ӧӧн халых киректерінде алнында поларға паза оларны тирең оңарарға алғапчам. Тоғыстарың турыстыра паалалзын, алнынзар хаалаҷаң кӧңніңер успазын. Хабарҷының полған на наа кӱнінде сірернең хада хаҷан даа киртініс паза чидіг ползыннар. Ӱлӱкӱннең!

Хакасияның ис-пай паза чир хайызығлары министерствозының
алғыстазына турысхан хабарҷылар Татьяна Тютюбееванаң Николай Султреков
Евгений Борисович пӧзік профессия узы, киртінізі паза пос тоғызына чайаачы кӧрізі ӱчӱн «Хакас чирі» республика газетазының ӧӧн редакторы Радион Сунчугашевке Хакасияның ис-пай паза чир хайызығлары министерствозының Аарластығ пічиин читірген, пӧлік редакторлары Николай Султрековнаң Татьяна Тютюбееваа – алғыстас пічіктерін.
Сомнар Лариса Бакановани паза Дмитрий Сунчугашевти
Автор :
Наталья Сюптерекова
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 1 | 2 |
Кӱн таңмазы
Хакасияда
Россияда
Тилекейде