Сӧбіре чылына удур тӧреен оолах
17.01.2024
Хабарлар

Валерия паза Степан Шулбаевтер Тимофей оолғыҷаанаң
2024 чыл – Сӧбіре чылы. Андағ чарадығ алыбысхан Россия президенті Владимир Путин
Хаҷаннаңох хакас чон туған-чағыннарының пик палғалызынаң сабланча. Чуртаста ӧӧні сӧбіре полча. Чиит тӧл іҷе-пабаларынзар, аға-ууҷаларынзар хаҷан даа улуғласнаң хайча, улуғлары, тізең, паарсазын, хынызын иркеҷектеріне хаҷан даа читірчелер. Сӧбіре пазы ир кізі полча, аның иңніне прай сидіксіністер артылча, ипчінің холында, тізең, сӧбіре часказы паза оды тудылча. Чоныбыстың пурунғы кибірлерін ундубин чуртазабыс, ырыстығ поларбыс. Россия президенті Владимир Путин хазнада сӧбірелернің чуртазына чахсы хайығ салча, палалығ сӧбірелерге аймах хабазығлар пирілче. Хазна регионнарында даа оларға хабазығлар тӧстелче. Россия президенті 2024 чылда тиксі хазнада Сӧбіре чылы тіп чарлаанда, сӧбірелерге хазна хабазығлары уламох хозыларын киречілепче тіп сағынчам.
Ағбан городта хаҷаннаңох Наа чылда тӧреен пастағы паланы чеестирі чахсы кибірге айлан парған. Чыл сай кӱрген айында сыйыхтар «матыр» ыңааҷахтың іҷе-пабазына читірілче. Пӱӱл пу кибір уламох танығлығ пол парча, 2024 чыл тиксі хазнада Сӧбіре чылы полчатханнаңар. Аннаңар мындағ чалахай сыйыхтаста аралазарға ӧріністіг полған. Пӱӱл Ағбан городтың перинатальнай кінінде пастағы ыңааҷах хакас сӧбірезінде тӧреені уламох поғдархастығ полған.
Ирткен чылда хоных хонған Валерия паза Степан Шулбаевтернің Тимофей пастағы палазы полча. Аннаңар ирепчінің палаа паарсазы, хынызы іле кӧрінчеткен. Валерия «Дюймовочка» олған садында кічіг воспитатель полча, Степан Ағбандағы чааҷы частьында чӧптезіг хоостыра службазын апарча. Чиит іҷе-пабаны Ағбан город пазы Алексей Лемин, танығлығ кирекнең алғыстап, сыйыхтар читірген.
– Сірерні тун оол тӧреенінең алғыстапчам. Ол уғаа ӧріністіг паза чахсы кирек. Сӧбіреңер чылығ пілізіснең паза часканаң толча. Сірернің полған на кӱн иркелеснең иртсін, Тимофей оолларың хазых паза часкалығ ӧссін. Іҷе-пабазының паза аға-ууҷаларының поғдархазы паза ӧрінізі ползын, харындас-пиҷелер хозылзын. Андада Тимофей паарсаста, ырыста чуртир паза сӧбіреңер часкалығ полар. Алғыстапчам сірерні мындағ танығлығ кӱннең! – алғыстаан Алексей Викторович.
Анаң Валерия паза Степан Шулбаевтерге танығлығ сыйыхтар читірілген: Ағбан город пазының алғыстас пічии паза спонсорларның сыйыхтары (робот пылесос, утюг паза «Илона» садығ туразының пис муң салковайға сертификады). Олар кічіг палалығ сӧбірее уғаа тузалығ поларлар.
Шулбаев ирепчідең тун оолғын хайди сахтааннарын паза имнег туразынзар хаҷан айланғаннарын прай сурастырып алғабыс.
– Піс палабыс ол кӱн тӧрир тіп сағынмаабыс. Имҷілер оолғыҷаам 19 январьда тӧрир тіп сананғаннар. Аннаңар ам даа илееде тус пар тіп пілдірчеткен. Улуғ хырлас айының 31-ҷі кӱнінде пайрамнығ стол саларға тимненчеткем. Чапсых чиистер пызырғам, че изі чохтаныбысхам. Пала тапчаң тус чағдапчатса, «тайма схваткалар» полчатханнаңар имҷілер чоохтаан полғаннар. Аннаңар анзына тың на хайбин турғам. Нинҷе-де тус пазынаң хонғаным чочыныбысхан. «Син, арса, пала таапчазың?» – сурған. Ойынға ла айландырыбысхам, ам даа ирте нооза тіп нандырғам. Тӱрче полғанда, имнег туразынзар чол тутхабыс.
Наа чылда имҷілер тоғынчатханнаңар аймах чоохтар чӧрчелер, олар кізіні дее чочындырчалар. Че піс килгенде, имҷілер иптіг чоохтасханнар, чахсы удурлааннар. Сыныхтабысханнар, анализтер алып алғаннар. Таныхтирға кирек, пірдеезі дее сағынмаан, пала іди табыраанҷа тӧрир тіп. Тимофей 00.30 минутада ах чарых кӧрген, акушерлер, турып, удур-тӧдір пахласчатханнар. Пасха пӧлікте кесарево итчеткеннер, аннаңар олар кем пастап тӧрееннеңер ікінҷілепчеткеннер. Анаң операционнайдаң минің оолғым пурун тӧреен тіп чоохтап пиргеннер. Акушерлер ноға-да уғаа ӧрін парғаннар.
Іҷе-пабама пала тӧрееннеңер сығдыратханда, олар мині Наа чылнаң алғыстааннар. Мин, тізең, оларны аға-ууҷа пол парғаннарынаң алғыстаам. Олар ӱрӱк тее парғаннар, іҷем ӧрінгеніне ылғабысхан. Хонғанымның даа, минің дее іҷе-пабамның Тимофей пастағы парха полча, аннаңар аның тӧрирін прайзы чидікпин сахтаан, – чоохтаан Валерия Шулбаева.
Ипчі имнег туразында чатчатхан туста иреннерге дее оой полбинча. Ибде одырып, сағба сахтапчадарға кирек, олох туста полысчаң оңдай чоғылын пілерге ниик ле нимес.
– Мин, тізең, Валерияны имнег туразынзар апар салып, сым одыр полбиныбысхам. Полған на отыс минута пазынаң сығдырат турғам, хазиинаңар пілібісчеткем паза пала тӧреен ме тіп сурыбысчаңмын.
Пӱӱл Наа чылны мағаа чалғысхан удурлирға киліскен, че мин аның ӱчӱн сағыссырабаам даа, мында саңай пасха сағыссырастар полған. Чӱреем талбырапчатхан, паба пол парарымны чидікпин сахтаам. Оолғым тӧреенде, уғаа ӧрінгем, чӱреем кӧксімнең сығара сегірібізер осхас полған. Имҷілер оолғыҷах полар тіп азынада чоохтаан полғаннар, че хаҷан пала тӧрееннеңер искіргеннерінде, пастағызын на піліп алған чіли пілдірген, – ӧрінізінең ӱлескен чиит паба Степан Шулбаев.
Чиит іҷе-пабаны алғыстаан туста Тимофей амыр узаан, ылғап, сайланмаан. Уғаа амыр, ачыныстығ иркеҷек пабазының холында истенчеткен. Шулбаевтер сӧбірезіне пілізізіп, ынағлазып чуртирға паза оолғын, иркеледіп, ӧріністе ӧскірерге алғапчабыс!
Сом Альбина Чистогашевани
Автор :
Наталья Тюкпеева
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 1 | 2 |
Кӱн таңмазы
Хакасияда
Россияда
Тилекейде