Пічіктеріңні сағыпчабыс!
17.01.2024
Хабарлар

Марығ. «Хакас чирі» республика газетазы «Минің ӱгретчім паза минің ӱгредіг кӧстегҷім» марығның «Улуғларның иң артых тоғызы» номинациязына тоғыстарны аларын узаратча
Пу марығ Россияда чарлалған Ӱгретчі паза ӱгредіг кӧcтегҷізі чылына чарыдылған. Ӱс номинация кӧрілген: «Ӱгренҷінің иң артых тоғызы» (школа ӱгренҷілері аразында), «Студенттің иң артых тоғызы» (ортын паза пӧзік ӱгредіг учреждениелерінің ӱгренҷілері паза студенттері аразында) паза «Улуғларның иң артых тоғызы» (18 частаң улуғ хығырығҷылар аразында). Пастағы ікі номинацияның салтарлары пу кӱннерде иділер, ӱзінҷі номинацияҷа тоғыстар 2024 чылның кӱрген айының 31-ҷі кӱніне теере алылар. Почта штампы турғызылған кӱн санға алылар. Кӧрілген тустаң орай кірген тоғыстар марыға алылбас.
Чайаачы тоғыстар марығның темазына килістіре, хоос оңдайларға пай, араласчының чазы синінҷе пазыларға кирек, тоғыстарның тиксі пазылған оңдайына паалағ турғызыларох. Чарғыҷылар тоғыстарға пу кӧзідіглерҷе 0 – 5 паалағлар турғызарлар. Іди полған на номинацияда чиңісчі паза сыйыхтығ орыннарға турысханнар табылар, иң артых тоғыстар «Хакас чирі» газетада сығарылар. Аннаңар, аарлығ хығырығҷыларыбыс, піс сірернің ӱгретчілеріңнеңер паза ӱгредіг кӧстегҷілеріңнеңер пічіктеріңні cағыпчабыс.
«Улуғларның иң артых тоғызы» номинацияның салтарлары 2024 чылның азығ айының 15-ҷі кӱніне теере иділер. Чиңісчілерге паза сыйыхтығ орынға турысханнарға дипломнар паза сыйыхтар тимнелген.
Кирексіністер:
1. Чайаачы тоғыс «Минің ӱгретчім паза минің ӱгредіг кӧстегҷім» темаа чарыдылзын.
2. Тоғыс хакас тілінең пазылзын.
3. Чайаачы тоғыс Microsoft Word кӧрімде Khakas клавиатуразында 12 кегльде пазылзын паза чоллар аразы 1,5 ползын. Текстті Times New Roman Hak шрифтнең пазарға чарир. Ідӧк холнаң пасхан тоғыстар алылча.
4. Чайаачы тоғысха хоза сомнар паза хоостар пирерге чарир.
5. Авторлар, марығ оңдайларынаң танызып паза аннаң чаразып, марығда пос алынҷа паза пос кӧңнінең араласчалар.
6. Чайаачы тоғысха хоза автор позының ады-солазын толдыразынаң, ӱгредіг алай тоғыс орнын, палғалызар оңдайны (мобильнай телефон номерін) искірче.
Тоғыстарны «Марыға» танығлығ ызарға: «Хакас чирі» газета редакциязының электроннай почта адрезіне: stranahabar@mail.ru паза Россия Почтазынҷа «Хакас чирі» газета редакциязының адрезіне: 655017, РХ, Ағбан г., Щетинкин ор., 34. Посха тоғысты редакция адрезінҷе 15-ҷі кабинетсер ағыларға чарир.
«Минің ӱгретчім паза минің ӱгредіг кӧстегҷім» марығ ӱгретчі тоғызын паза ӱгредіг кӧстегҷізінің тузазын сабландырарға, ӱгредіг тоғынҷыларының, ол санда ӱгредіг кӧстеенең айғасчатханнарның адын кӧдірерге, школаа, ӱгретчілерге паза школа кибірлеріне улуғласты тыыдарға, ӱгренҷілер паза ӱгретчілер аразында хайызығларны пиктирге, хығырығҷыларға чайаачы кӧңнілерін читірер оңдай пирерге, чайаачы паза талааннығ хығырығҷыларны ілезіне сығарарға, ідӧк хығырығҷыларны хакас тілінең чайаачы тоғыстар пазарға кӧӧктірерге иртірілче.
Автор :
«Хакас чирі» газета редакциязы
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 1 | 2 |
Кӱн таңмазы
Хакасияда
Россияда
Тилекейде