Кӧклӧ театрын пастағызын на кӧргеннер
12.01.2024
Хабарлар
Тоғазығ тузында
Пресс-конференция. «Нымах» Хакас национальнай кӧклӧ театры Наа чыл алнында Россияның наа регионнарының олғаннарын чапсых сыйыхнаң ӧріндірген
«РОСКОНЦЕРТ» федеральнай хазнаның бюджеттіг культура учреждениезі, Россияның культура министерствозының тиксі хазнаҷа гастрольларнаң чӧрҷең пӧгінін толдырып, пістің «Нымах» кӧклӧ театрына ыраххы чорых тӧстеен. 21 – 26 декабрьда олғаннарны ӱтертчең артисттер Донецк Чон Республиказында, Херсон паза Запорожье областьтарында ааллааннар. Олар Туве Янссонның нымахтарынҷа тимнелген «Муми-Тролли и Новый год» ойынны апарғаннар. Спектакльның режиссёры – Россияның паза Бурятияның саблығ артизі Андрей Тимофеев.
Наа регионнарзар тоғыс чорығы хайди салылғанынаңар «Нымах» театрның устағҷызы Игорь Окольников паза артисттер СМИ тоғынҷыларынаң ӱлескеннер. Хабарҷыларнаң тоғазығ «Нымах» кӧклӧ театрында ирткен.
– Наа ла читкенібісте, КПП-ны ирткебіс. Анда мирген ооллар тоғынчалар. Олар чиит тее ползалар, че, атыстар, чара чачырастар алтында тоғынып, кӧп хорғыс кӧргеннері іле пілдірче. Тыып парған хылыхтары хатығ кӧрістерінде кӧрінче. Пістің водитель театр килгенін искіргенде, ооллар чылығ кӱлімзіребіскеннер, «иртіңер-иртіңер» тіп сала маңзыри чол ас пиргеннер. Піс тее андада тың чӱрексіп парғабыс.
Наа чыл алнында піс пу ӱлӱкӱннеңер ойынны апарарға чарат салғабыс. Сценазар сығып, пастап хайдаң килгенібістеңер чоохтап пир турҷаңмыс. Таныхтирға сағынчам, піс спектакльларны кӧзіткен ааллардағы олғаннар чуртастарында пастағызын на кӧклӧ театрын кӧргеннер.
Чуртағҷылар Россиязар нандыра айланғаннарына тың ӧрінчелер. Хай піреезі, минзер пастырып, харах частарын чызынып, харын даа, піс Россияда чуртапчабыс, Владимир Путин узах час чазазын, изен-хазых ла чӧрзін тіп, алғастарын читірген. Наа регионнар Россиязар нандыра айланғаннарында, андағы чуртас тилізі іле кӧрінче: пӱдіріг тоғыстары парча, наа спорт ачыхтары азылча, чоллар нааҷылалча. Піc чахсы чолларҷа чӧргебіс. Итсе, пірее аалларзар, чол тыхталғалахтаңар, чидіп аларға пис час таа парыбысчаң.
Кӱнде ікілер спектакль турғысхабыс. Олох арада мастер-класстар иртіргебіс. Олғаннар постарын ӧткін тудынғаннар, ӧрінгеннер, плесет салғаннар. Піс оларға Хакасияда иділген шоколадтығ конфеттерні сыйлаабыс, – чоохтаан «Нымах» кӧклӧ театрының директоры Игорь Окольников.
Чиит артисттер ідӧк чапсых чорых cағыстарында хайдағ іс артысханын чарытханнар.
– Мин улуғ гастрольларға пастағызын на чӧргем. Наа регионнарда чон хайди чуртапчатханын кӧріп алдыбыс. Мариупользар читкенде, тасхар тубан турған. Че кӱн, сых киліп, чир ӱстӱн чылыт сыхханда, тубан чіт парған, анаң пістің хараабыс алнында изел парған город турыбысхан. Хомзыныстығ. Че город нааҷылалча, анда чуртас «хайнапча», кізілер ідӧк садығ тураларынзар чӧрчелер. Спектакльдаңар чоохтаза, кӧрігҷілер аны чылығ удурлааннар. Олғаннар даа, улуғлар даа тың ӧрінгеннер. Олар, гримёрказар кіріп, піснең хада сомға суурынарға сурынғаннар. Іҷе-пабалар алғыстарын читіргеннер. Мындағ тузалығ чорыхха пар килгенібіс ӱчӱн поғ
дархапчабыс, – теен артист Илья Эмих.
Л.Г.Устиновтың адынаң «Нымах» кӧклӧ театрының артисттері хазнаның наа регионнарынзар мыннаң мындар чапсых ойыннарын ал чӧрерлер.
Сом Альбина Чистогашевани
Автор :
Татьяна Тютюбеева
| Пн | Вт | Ср | Чт | Пт | Сб | Вс |
| 24 | 25 | 26 | 27 | 28 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
