Хазна Чӧбі чыылии паза тоғазығлар
29.12.2023
Хабарлар
Валентин Коновалов паза Андрей Белоусов
Тоғыс чорығы. Хакасия пазы Валентин Коновалов Москвада тоғыс чорығынаң полған
Республика пазы Валентин Коновалов Россия президенті Владимир Путин иртірген Хазна Чӧбі чыылиинда араласхан.
«Чыылығда Ӱгретчі паза ӱгредіг кӧстегҷізі чылының салтарларын, ӱгредіг тоғынҷыларының аарлазын кӧдіреріне кӧcтелген оңдайларны ӱзӱргебіс.
Мин устапчатхан правительство ол кӧстеге алынҷа хайығ салча. 2017 чылдаң пасти піс ӱгредіг сферазына республика бюджедінең ахча позыдарын ікі хати ӧскірібіскебіс. 2019 чылдаң Хакасияда сигiс школа паза 17 олған сады пӱдірілген, 158 ӱгредіг учреждениезінде тиксі тыхтағ толдырылған, колледжтерде паза техникумнарда 29 наа узанҷаң орын тӧстелген.
Піс ӱгретчілерге хабасчаң оңдайларны алғытчабыс. 2023 чылдаң аалдағы ӱгретчілерге чурт ал сыххабыс. Пу чылның сентябрьында ӱгретчілерге чал ахчазын кӧдірібіскебіс. 2024 чылдаң пасти ӱгредіг тоғынҷыларына ипотека аларына пастағы тӧлег ахчазын компенсация оңдайынаң айландырып полызарбыс. Ідӧк піс ӱгретчілернің оклады паза хоза тӧлеглері пӱдізін алыстырарын узарадарбыс, оларның холға алҷаң чал ахчазы ізестіг полар ӱчӱн.
Хазнаның пасха регионнары опыдынаң тузаланып, Хакасия правительствозы ӱгредіг сферазын тилідеріне, пістің ӱгретчілерге паза ӱгредіг кӧстегҷілеріне хабазарына прай кӱзін салар», – пас салған Валентин Коновалов социальнай сетьтерде.
Iдӧк Хакасия пазы Россия правительствозы кнезінің пастағы орынҷызы Андрей Белоусовнаң тоғысчы тоғазығ иртірген.
«Тоғазығда Хакасияның чуртас-экономика тилізі сурығларын ӱзӱргебіс: хара тас отрасльының санкциялар тузындағы тоғызын, республиканың ниме-ноо сығарчатхан промышленнозы предприятиелерін тилітчең оңдайларны.
Таныхтирға кирек, Хакасияның Тиліc cтратегиязында ниме-ноо сығарчатхан производстволар алынҷа орында турчалар. Халғанҷы нинҷе-де чыл аразына піс регион бюджедінең ол кӧстеге ахча позыдарын пілдірте ӧскірібіскебіс паза отрасльны тилідерінҷе Сибирьде 2-ҷі орынға сығып алғабыс, Россияда – 13-ҷі орынға.
Че пістің алнында турчатхан хайзы сурығларны федеральнай кіннің хабазии чох пӧк полбассың.
Андрей Рэмовичке республикаа хайығ салчатханы, Хакасияның чуртас-экономика тилізіне теелчеткен сурығларны пӧгеріне полысчатханы ӱчӱн алғызым читірчем», – искірген Хакасия пазы ол тоғазығның салтарларынаңар социальнай сетьтерде.
Паза Валентин Коновалов тиксі Россиядағы самбо федерациязының президенті Сергей Елисеевнең тоғастыр.
«Хакасияда пу спорт кӧрімін тилідер сурығларны ӱзӱрібіскебіс. Республика правительствозы самбоға алынҷа хайығ салча. Піс чыл сай аймах марығлар иртірчебіс. Пістің кӱресчілер оларда республика ӱчӱн турыстығ турысчалар.
2022 чылда Ағбандағы частнай спортзал республика холына алылған. Аның сылтаанда улам кӧп оол-хысха самбонаң киліcтіре орында айғасчаң оңдай пирілген. Ӱр ниместең пістің регионда «Самбоны – школазар!» проект тоғын сыххан.
Республикада самбоны тилітчең хайзы сурығларны пӧгеріне федеральнай кіннің хабазии киректелче. Сергей Владимирович мин искірген чӧптерні кӧрібізер паза пар кӱснең оларны чуртасха кирерге полызар», – пас салған Хакасия пазы ол тоғазығдаңар.
Сом Валентин Коноваловтың телеграм-каналынаң
Автор :
Тимнеен Альберт Толмашов
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
