Тӱзімніг тоғыныбысханнар
22.12.2023
Хабарлар
Cпорт министрі Сергей Кочан паза кӱресчі Наталья Малышева
Спорт. Хакасияның физическай культура паза спорт министерствозы артыхтарын таныхтаан
Республиканың спорт сферазына 2023 чыл тӱзімніг ирткен. Анзын спортсменнерібістің чидіглері, тузаланысха кирілген пӱдіріглер киречілепче. Ағбанда толдыра кӱзінең ниик атлетика манежі тоғынча. Анда иртен-иир чон ӱзілбинче. Килер неделяда Ағбан пилтірі посёлокта улуғ спортзал ізиин азар. Ікі спорт объекті «Демография» нацпроекттің «Спорт – чуртас сині» федеральнай программазы хоостыра пӱдірілген. Пӱӱл ідӧк тикcі тыхтағ тоғыстары соонда Тӧӧ пазы посёлокта «Дельфин» бассейнні тузаланысха кирерге кирек полғаннар. Че пӱдірігні 2024 чылда ла тоғындыр поларлар.
Полған на муниципалитетте ГТО ачыхтары пар, спорт площадкаларының саны ӧcче. Чонға спортнаң айғазар иcтіг оңдайлар тӧстирінде спорт ведомствозы ла нимес, Хакасияның ӱгредіг паза наука, национальнай паза территориальнай политика министерстволары ӧткін араласчалар. Оларның хада-пірге тоғызы тикке парбады. Пӱӱнгі кӱнде Хакасияда 250 муң артиинаң кізі физкультуранаң ӧткін айғасча. Анзынаңар 19 декабрьда сыйыхтас тузында искірілген. Спорт сферазында істенчеткеннер «Ағбан» гостиницада чыылысханнар.
Хакасияның физическай культура паза спорт министерствозы артыхтарының артығын он номинацияҷа таныхтаан. Олардаң иң танығлығ «Хакасияның поғдархазы» полча тізе, саба полбас, неке. Аның оңдайларынҷа чылның иң чахсы спортсменнерін паза тренерлерін таллааннар. Олимп спорт кӧрімнерінде Наталья Малышева (ипчілер кӱрезі) паза Денис Чертыков (ниик атлетика) прайзын ас парыбыстылар. Пӱӱл Наташаа чидіглерге пай чыл. Хакас абахай Ярыгиннің турнирінде ӱзінҷі орынға сыххан, Россия чемпионадында алтын медаль холға кирген. Ідӧк кӱскӱзін Наталья Малышеваа тилекей чемпионадында аралазарға ӱлӱс тӱcкен. Денис Чертыков – узун дистанцияларға чӱгӱрерге кӱс. Июльда спортсмен, 15 километр тобырып, Россия чемпионадында кӱмӱс призёр полыбысхан. Октябрьда, тізең, чарым марафонда чиңіс тутхан. Чир-суғҷыбыс 21,1 километрні 1 час 5 минута 41 секунда аразына чӱгӱрібіскен. Денис Михайлович ниик атлетиканаң толдыра кӱзінең 10 чыл артиинаң айғас парир.
Олимп нимес спорт кӧрімнерінде Даниела Колесник (пауэрлифтинг) паза Фёдор Жибинов (гиря кӧдірері) «Хакасияның поғдархазы» атха турысханнар, паралимп спорт кӧрімнерінде – теннисисттер Инна Балахчинанаң Григорий Исаков. Тренерлердең Николай Дружининні (бокс), Михаил Сазоновты (кикбоксинг) паза Ирина Мордакинаны (стол теннизі) таныхтааннар.
Спорт федерацияларына алынҷа марығ чарлалтыр. 2023 чылда иң чахсы салтарлар боксёрлар кӧзіттірлер, пірігістің устағҷызы – Иван Володин. Рингте чиңістерінең Сергей Слободян тӧреміл ӧріндірче. Пӱӱл боксёр чоннар аразындағы класстығ спорт узы нормативін толдырыбысхан. Саяна Казыгашева, тізең, Россия чемпионадында пазох кӱмӱс медаль холға кирген. Слободяннаң Казыгашева – тренер Николай Дружининнің ӱгренҷілері. Гиря кӧдірерінҷе федерацияны ідӧк махтирға кирек. Пірігістегілер Кирилл Жибиновтың устаанынаң, гиря кӧдірерінең пасха, кибірліг спорт кӧрімнеріне хозым итчелер. Олар чох пір дее национальнай ӱлӱкӱн иртпинче. Алынҷа таныхтааннар чир-спортча федерацияны. 2021 чылда кӧбізі пу спорт кӧрімінің парын пілбеен полған. Пӱӱл аннаң айғасчатхан спортсменнер Анастасия Шишпанованаң Мария Кононцева Россия первенствозында чиңіс тутханнар. Федерациянаң Виктория Толстопятова маңнаныстығ устапча.
Ідӧк мероприятие тузында «Россияның спорт узы» аарластығ атха турысхан оолларға – Фёдор Жибиновха, Иван Кулаженковха, Ричард Царёвха, Илья Морозовха, Егор Ваземиллерге, Вадим Феалковскийге – чидіглерін киречілепчеткен танығларны читіргеннер. Вадим Феалковский – хакас оол. Чиит кізі Асхыс аймаандағы Кызлас аалдаң. Ол Хакасияда аймах оңдайлығ харбазығларҷа (СБЕ ММА) пастағы Россияның спорт узы полча.
Сом Валерия Тамбовцевани
Автор :
Майя Кильчичакова
| Пн | Вт | Ср | Чт | Пт | Сб | Вс |
| 30 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
