Пурунғынаң танызар оңдай
22.12.2023
Хабарлар
Леонид Горбатов Хакас чирiнiң культура ис-пайынаңар чоохтапча
Кӧзідіг. Асхыс аймааның Культура туразында «Хуртуйах тас» музейнің наука тоғынҷызы Леонид Горбатов тимнеен кӧзідіг пайрамни азылған
Кӧзідіг «Хакасия – край каменных изваяний. Назад в будущее» адалча. Пу мероприятие кӧзідіг тӧстегҷізі президент грантында араласхан сылтаанда чуртасха кирiлген. Проект хоостыра Хакасиядағы обаалардаңар ӱс фильм тимнелген. Кӧзідіг азылғанда, Леонид Горбатов таныхтаан:
– Хакасияның культура министерствозына, Россияның культура министерствозына, президентке улуғ алғызым читірчем. Олар проектімні чуртасха кирібізерге, хайдағ сіліг чирде чуртапчатханнарыбысты хати кӧріп аларға оңдай пиргеннер. Мин тимнеен проект «Хакасия – край каменных изваяний. Назад в будущее» адалча. Ноғадаңар? Піс тархыныбысты пілбезебіс, таңдағызы полбас. 301 чыл мының алнында Хакасиядағы обаалар прай тилекейге азылған. Істезіглiг тоғысты пістің чирібісте Даниил Готлиб Мессершмидт апарған. Пу кӧзідігде тархыныбыстың хумартхыларының сомнары сығарылған.
Мессершмидттің соонаң пістің чирібіссер Сибирьнің илбек істезігҷізі Пётр Симон Паллас читкен. 157 чыл мының алнында Хакас чирінде Фридрих Вильгельм Радлов істезіг тоғыстарын апарған. Олар чирібістің сілиин паза пай тархынын прай тилекейге асханнар. Кӧзідіге, Асхыс аймаандағы ла нимес обааларның сомнары, ідӧк прай Хакасиядағы тархын хумартхыластары сығарылған.
Проекттің партнерлары тархын наукаларының кандидады Андрей Готлиб, «Хуртуйах тас» музейнің директоры Оксана Горбатова, пуох музейнің Полтах аалдағы пӧлиинің устағҷызы Светлана Сагалакова, «Усть-Сос» музейнің директоры Мария Ачитаева полчалар. «Хакасфильм» киностудия полызиинаң Хакасияның хумартхыларынаңар фильмнер тимнелген. Паза пасха даа учреждениелер кӧзідігні тимнирге полысханнар.
Асхыс аймаа пазының пастағы орынҷызы Евгений Костяковтың сӧстерінең, пу кӧзідіг Асхыс аймааның паза тиксі Хакасияның культуразынаң таныстырча. Пурунғыларыбыс хайалардағы хоостарнаң пала-пархаларына ниме читірерге сағынғанын піліп аларға сидік. Пӱӱнгі кӱнде культура тоғынҷылары ол хоостарны піске чарыт пирерге кӱстенчелер. Амғы тӧлге ол материаллар тузалығ полчалар. Пістің пӧгінібіс – оларны килчеткен тӧллерге хайраллап халарға.
Россияның пасха ханнар киректерi министерствозының Хызылчардағы представительствозының ікінҷі хачызы Денис Макиннің таниинаң, Хакасия хайалардағы хоостарға сынап пай. Олар республиканың кӧрімін толдырчалар. Хумартхыластар Хакасияның чуртағҷыларына даа, тиксі Россияа даа чапсых поларлар. Пасха хазналардаң килген аалҷыларны республикабыстың танығлығ орыннарынаң таныстырчалар. Оларның санында иң пастағызы «Хуртуйах тас» музей полча. Пылтыр пасха хазналар журналисттеріне Хакасияҷа ікі пресс-тур ирткен, ол чорыхтардаңар Белоруссияда, Киргизияда, Вьетнамда, Ливанда паза Пакистанда сюжеттер паза хабарлар сығарылған.
Денис Макин «Хуртуйах тас» музейнің тоғынҷыларына пасха хазналар киректерінің Хызылчардағы представительствозының алғыстас пічіктерін читірген.
Леонид Горбатов тимнеен проект тоғыстарынаң iдӧк «Хуртуйах тас» музейде танызып аларға чарир.
Сом авторни
Автор :
Антон Чертыков
| Пн | Вт | Ср | Чт | Пт | Сб | Вс |
| 30 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
